ଖଇରା, ୧୬।୫(ଡି.ଏନ.ଏ.)-ବାଲେଶ୍ୱର ଜିଲା ଖଇରା ତହସିଲ ଅଧୀନ ଶାରୀଶୂଆ ପାହାଡର ୯୭ ଖଣିରେ ୧୪୪ଧାରା ଲାଗୁ ସତ୍ତ୍ୱେ ପଥର ଚୋରା ଚାଲାଣ ଅବ୍ୟାହତ ରହିଛି। ଖଇରା ତହସିଲର କେତେଜଣ ଅସ୍ଥାୟୀ କର୍ମଚାରୀ ଓ ଖଣି ବ୍ୟବହାରୀଙ୍କ ମଧ୍ୟରେ ଭିତିରି ବୁଝାମଣା ଯୋଗୁ କୌଣସି ଅଧିକାରୀ ଖଣିମାଫିଆଙ୍କ ଉପରେ ଅଙ୍କୁଶ ଲଗାଇବାକୁ ସକ୍ଷମ ହୋଇ ପାରୁ ନ ଥିଲେ ା ମହେନ୍ଦ୍ର ପ୍ରସାଦ ବେହେରା ଖଇରା ନୂତନ କରି ତହସିଲଦାର ଭାବେ ଯୋଗଦେବା ପରେ ଏଭଳି କାର୍ଯ୍ୟ ଚାଲିଥିବା ହୃଦୟଙ୍ଗମ କରି ଏହା ଉପରେ କାର୍ଯ୍ୟାନୁଷ୍ଠାନ ପାଇଁ ପଦକ୍ଷେପ ନେବାକୁ ଅଣ୍ଟା ଭିଡିଛନ୍ତି ା ପ୍ରଥମେ ପାହାଡର ସୁରକ୍ଷା ପାଇଁ ଏପ୍ରିଲ ୨୯ତାରିଖରେ ପତ୍ର ସଂଖ୍ୟା ୧୨୬୫ରେ ୧ ପ୍ଲାଟୁନ ଫୋର୍ସ ଯୋଗାଇ ଦେବାକୁ ଅନୁରୋଧ କରିଥିଲେ। ତହସିଲଦାର ଚିଠିକୁ ଭିତ୍ତି କରି ଉପଜିଲାପାଳ ମେ’ ୭ତାରିଖରେ ପତ୍ର ସଂଖ୍ୟା ୮୨ରେ ତହସିଲଦାରଙ୍କୁ ସହାୟତା ପାଇଁ ୧ପ୍ଲାଟୁନ ଫୋର୍ସ ଯୋଗାଇ ଦେବାକୁ ଏସ୍ପିଙ୍କୁ ଅବଗତ କରାଇଛନ୍ତି ା
ଶାରୀଶୁଆ ପାହାଡରେ ଜୈବବିବିଧତା ନଷ୍ଟ ହେବା ଏବଂ ହାତୀମାନେ ଅସୁରକ୍ଷିତ ହୋଇ ପଡୁଥିବା ଉପରେ ଉଦ୍ବେଗ ପ୍ରକାଶ କରି ଜାତୀୟ ଗ୍ରୀନ ଟ୍ରିବ୍ୟୁନାଲ ୨୦୧୯ରେ ପାହାଡରେ ଚାଲିଥିବା ଖଣି ଖୋଳାକୁ ବେଆଇନ ଦର୍ଶାଇ ଏହା ଉପରେ କାର୍ଯ୍ୟାନୁଷ୍ଠାନ ନେବାକୁ ଦାବି କରିଥିଲେ। ପରବର୍ତ୍ତୀ ସମୟରେ ୧୪୪ଧାରା ଜାରି କରାଯାଇଥିଲେ ମଧ୍ୟ ଏହି ଅଞ୍ଚଳରୁ ରାତି ଅଧିଆ ଚୋରାରେ ଲଘୁ ଖଣିଜ ଖଣିଜ ପଦାର୍ଥ ପରିବହନ କରାଯାଉଥିବା ନେଇ ପାହାଡ ସଂଲଗ୍ନ ଗୁଆପାଳ, ବଗେଇପୁର, କଦଳୀଗଡିଆ, ଶରତ, ରମଦା, ବାଉଁଶଗଡିଆ ଆଦି ଗ୍ରାମର ବାସିନ୍ଦା ଅଭିଯୋଗ କରି ଆସୁଥିଲେ।
