ଲକ୍ଷ୍ନୌ,୧୩।୪: ଉମେଶ ପାଲ ହତ୍ୟାକାଣ୍ଡର ଅଭିଯୁକ୍ତ ଅତିକ ଅହମଦଙ୍କ ପୁଅ ଅସଦ ଅହମଦ ଫେରାର ଥିବା ବେଳେ ଗୁରୁବାର ଉତ୍ତର ପ୍ରଦେଶ ଏସଟିଏଫ ଝାନ୍ସିରେ ଏନକାଉଣ୍ଟର କରିଛି। ଏହି ଏନକାଉଣ୍ଟରରେ ଅସଦ ନିହତ ହୋଇଛନ୍ତି। ଏହି ଏନକାଉଣ୍ଟରରେ ଅସଦଙ୍କ ସହ ତାଙ୍କ ସହଯୋଗୀ ଗୁଲାମ ମହମ୍ମଦ ବି ନିହତ ହୋଇଛନ୍ତି। ଏହି ଏନକାଉଣ୍ଟରକୁ ନେଇ ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବଙ୍କ ପ୍ରଥମ ପ୍ରତିକ୍ରିୟା ସାମ୍ନାକୁ ଆସିଛି। ଅଖିଳେଶ ଯାଦବ ଏହାକୁ ମିଥ୍ୟା ଏନକାଉଣ୍ଟର ବୋଲି କହିଛନ୍ତି।
ସପା ଅଧ୍ୟକ୍ଷ ଅଖିଳେଶ ଯାଦବ ଟୁଇଟରେ ଲେଖିଛନ୍ତି, ମିଥ୍ୟା ଏନକାଉଣ୍ଟ କରି ଭାରତୀୟ ଜନତା ପାର୍ଟି(ଭାଜପା) ସରକାର ସତ ପ୍ରସଙ୍ଗ ଉପରୁ ଧ୍ୟାନ ହଟାଇବାକୁ ଚାହୁଁଛନ୍ତି। ଭାଜପା ନ୍ୟାୟାଳୟ ଉପରେ ଭରସା ନାହିଁ। ଆଜିର ଏହି ଏନକାଉଣ୍ଟରକୁ ବି ଯାଞ୍ଚ କରାଯାଉ ଓ ଦୋଷୀଙ୍କୁ ଦଣ୍ଡ ଦିଆଯାଉ। ଭୁଲ-ଠିକ ନିଷ୍ପତ୍ତିର ଅଧିକାର ଶାସକର ହୋଇ ନ ଥାଏ, ଭାଜପା ଭାଇଚାରା ବିରୋଧି।
ଏପଟେ ଉତ୍ତର ପ୍ରଦେଶ ଏସଟିଏଫ ଦ୍ୱାରା କରାଯାଇଥିବା ଏନକାଉଣ୍ଟର ଉପରେ ଏଡିଜି ଲ ଆଣ୍ଡ ଅର୍ଡର ପ୍ରଶାନ୍ତ କୁମାର ପ୍ରେସ କନଫରେନ୍ସ କରି କହିଛନ୍ତି ଆମେ ଏମିତି ମାଫିଆ ଓ ଦୁର୍ଦ୍ଦାନ୍ତ ଅପରାଧିଙ୍କ ବିରୋଧରେ ଜିରୋ ଟଲରାନ୍ସ ନୀତି ଆଧାରରେ ଅଭିଯାନ ଜାରି ରଖିଛୁ। ଯାହାର ସାର୍ଥକ ପରିଣାମ ଆସିଛି। ଫେବୃୟାରୀ ୨୪ରେ ଏକ ବଡ ଘଟଣା ପ୍ରୟାଗରାଜର ଘୁମନଗଞ୍ଜ ଥାନା ଅଞ୍ଚଳରେ ଘଟିଥିଲା। ଯେଉଁଥିରେ ଜଣେ ମୁଖ୍ୟ ସାକ୍ଷୀ ଉମେଶ ପାଲଙ୍କୁ ହତ୍ୟା କରାଯାଇଥିଲା। ଏଥିରେ ଆମର ଦୁଇ ବାହାଦୂର ସାଥୀ ଯେଉଁମାନେ ସେହି ସାକ୍ଷୀଙ୍କୁ ସୁରକ୍ଷା ଦେଉଥିଲେ ସେମାନେ ବି ଶହୀଦ ହୋଇଯାଇଥିଲେ।
