ସିଓଲ,୩୦ ।୧୦: ଦକ୍ଷିଣ କୋରିଆର ରାଜଧାନୀ ସିଓଲରେ ବଡ ଦୁର୍ଘଟଣା ଘଟିଯାଇଛି । ଶନିବାର ୨୯ ଅକ୍ଟୋବର ୨୦୨୨ରେ ହଲୋଇନ ଫେଷ୍ଟିଭାଲ ପାଳନ କରିବାକୁ ପହଞ୍ଚିଥିବା ଲୋକଙ୍କ ମଧ୍ୟରେ ଦଳାଚକଟା ହୋଇ ଉତ୍ସବର ପରିବେଶ ଆଖି ଲୁହରେ ଭିଜି ଯାଇଛି । ଲୋକେ ଜଣେ ଜଣକୁ ଦଳି ଚକଟି ଦୌଡିବାକୁ ଲାଗିଥିଲେ । ଯେଉଁମାନେ ଦୌଡିପାରିଲେନି ସେମାନେ ପ୍ରାଣ ହରାଇଲେ । ଏବେ ପର୍ଯ୍ୟନ୍ତ ଏହି ଘଟଣାରେ ୧୫୧ ଜଣଙ୍କ ମୃତ୍ୟୁ ହୋଇଥିବା କୁହାଯାଉଛି । ଏମାନଙ୍କ ମଧ୍ୟରେ ୧୯ ଜଣ ବିଦେଶୀ ନାଗରିକ ଥିବା କୁହାଯାଉଛି । ଏବେ ଶହ ଶହ ଆହତଙ୍କର ଚିକିତ୍ସା ଚାଲିଛି । କେତେଜଣ ଗୁରୁତର ଥିବାରୁ ଆଗକୁ ମୃତ୍ୟୁ ସଂଖ୍ୟା ବଢିବା ଅନୁମାନ କରାଯାଉଛି ।
ସୂଚନାଯୋଗ୍ୟ, ଶନିବାର ସନ୍ଧ୍ୟାରେ ସିଓଲର ଇଟାୱନ ଅଞ୍ଚଳରେ ପ୍ରସିଦ୍ଧ ନାଇଟ ସ୍ପଟରେ ଏହି ଲୋକେ ମାସ୍କ ହଲୋଇନ ପାଳନ କରିବାକୁ ଏକାଠି ହୋଇଥିଲେ । କୋଭିଡ ମହାମାରୀ ପରେ ଏହା ପ୍ରଥମ ହଲୋଇନ୍ ଉତ୍ସବ ଥିଲା । ତେଣୁ ଲୋକଙ୍କ ପ୍ରବଳ ଭିଡ ହୋଇଥିଲା । ଭିଡରେ ଲୋକେ ଏଣେତେଣେ ଦୌଡିବାରୁ ଅଘଟଣ ଘଟିଥିଲା । ରାତି ପ୍ରାୟ ୧୦ଟା ୨୦ ମିନିଟରେ ଏହି ଘଟଣା ଘଟିଥିଲା । ଲୋକେ ଜଣଙ୍କ ଉପରେ ଜଣେ ମାଡି ଚକଟି ଦୌଡିବାକୁ ଲାଗିଥିଲେ । ମହିଳା ଓ ଶିଶୁମାନେ ନିରୁପାୟ ହୋଇଯାଇଥିଲେ । ଏହି ସମୟରେ ଚିତ୍କାର ଏତେ ଜୋରରେ ହୋଇଥିଲା ଯେ ସିଓଲ ସହର ଥରି ଉଠିଥିଲା । ଏହି ଘଟଣାରୁ ନେଇ ଦକ୍ଷିଣ କୋରିଆ ରାଷ୍ଟ୍ରପତି ରାଷ୍ଟ୍ରୀୟ ଶୋକ ଘୋଷଣା କରିଛନ୍ତି ।
