ନୂଆଦିଲ୍ଲୀ,୭।୩ : ଆସନ୍ତା ୨୬ ତାରିଖରୁ ଆରମ୍ଭ ହେବାକୁ ଯାଉଛି ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ୧୫ତମ ସଂସ୍କରଣ। ଏହି ସିଜନରେ ଦକ୍ଷିଣ ଆଫ୍ରିକୀୟ ଖେଳାଳି ଅଂଶଗ୍ରହଣ କରିବେ କି ନାହିଁ, ତାହା ଅନିଶ୍ଚିତତାରେ ଘେରି ହୋଇଯାଇଛି। କାରଣ ଦକ୍ଷିଣ ଆଫ୍ରିକା ଟେଷ୍ଟ ଦଳର ଅଧିନାୟକ ଡିନ ଏଲଗାର ସାଥି ଖେଳାଳିଙ୍କୁ ଆଇପିଏଲ ପରିବର୍ତ୍ତେ ବାଂଲାଦେଶ ବିପକ୍ଷ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ବାଛିବାକୁ କହିଛନ୍ତି। ଫଳରେ ଧର୍ମ ସଙ୍କଟ ଭଳି ପରିସ୍ଥିତିର ସମ୍ମୁଖୀନ ହୋଇଛନ୍ତି ଆଇପିଏଲରେ ଖେଳିବା ଲାଗି ଚୁକ୍ତି କରିଥିବା ଖେଳାଳିମାନେ।
ଦକ୍ଷିଣ ଆଫ୍ରିକାକୁ ବାଂଲାଦେଶ ସହ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ଖେଳିବାର ଅଛି। ତା’ ପରେ ଦୁଇଟିକିଆ ଟେଷ୍ଟ ସିରିଜ୍ ଖେଳାଯିବ। ଏହି ସିରିଜ୍ ୧୮ ତାରିଖରୁ ଆରମ୍ଭ ହେଉଥିବା ବେଳେ ଆଇପିଏଲ ଆସନ୍ତା ୨୬ରୁ ମେ ୨୯ ପର୍ଯ୍ୟନ୍ତ ଅନୁଷ୍ଠିତ ହେବ। ଇଏସ୍ପିଏନ୍ କ୍ରିକ୍ଇନ୍ଫୋରେ ପ୍ରକାଶ ପାଇଥିବା ରିପୋର୍ଟ ଅନୁଯାୟୀ, କ୍ରିକେଟ ଦକ୍ଷିଣ ଆଫ୍ରିକା(ସିଏସ୍ଏ) ନିଷ୍ପତ୍ତି ଖେଳାଳିଙ୍କ ଉପରେ ଛାଡ଼ି ଦେଇଛି।
“ଆଇପିଏଲ ପାଇଁ ଇଚ୍ଛୁକ ଥିଲେ ଖେଳାଳିଙ୍କୁ ସିଏସ୍ଏକୁ ଜଣାଇବାକୁ ପଡ଼ିବ। ଖେଳାଳିଙ୍କ ପାଇଁ ନିଷ୍ପତ୍ତି ନେବା କଷ୍ଟକର। ଆଇପିଏଲ ପୂର୍ବରୁ ଏହା ଦକ୍ଷିଣ ଆଫ୍ରିକୀୟ କ୍ରିକେଟରଙ୍କ ପାଇଁ ବିଶ୍ୱସ୍ତତାର ପରୀକ୍ଷା” ବୋଲି ଏଲଗାର କହିଛନ୍ତି।
