ଶାରଜା,୬।୧୧: ଟି୨୦ ବିଶ୍ୱକପ୍ ଗ୍ରୁପ୍-୧ର ଅନ୍ତିମ ମ୍ୟାଚ୍ରେ ଦକ୍ଷିଣ ଆଫ୍ରିକା ୧୦ ରନରେ ଇଂଲଣ୍ଡକୁ ପରାସ୍ତ କରିଛି। ଅନ୍ତିମ ଓଭରରେ ହ୍ୟାଟ୍ରିକ ଉଇକେଟ ହାସଲ କରି ଦ୍ରୁତ ବୋଲର କାଗିସୋ ରାବାଡ଼ା ଦଳକୁ ବିଜୟୀ କରାଇଛନ୍ତି। ସେ ପ୍ରଥମ, ଦ୍ୱିତୀୟ ଓ ତୃତୀୟ ବଲ୍ରେ ଯଥାକ୍ରମ କ୍ରିସ୍ ଓ୍ବକ୍ସ, ଇଅନ ମୋର୍ଗାନ ଓ କ୍ରିସ ଜୋର୍ଡାନଙ୍କୁ ଆଉଟ କରି ଚଳିତ ବିଶ୍ୱକପ୍ର ତୃତୀୟ ହ୍ୟାଟ୍ରିକ ଅର୍ଜନ କରିଛନ୍ତି। ପ୍ରଥମେ ବ୍ୟାଟିଂ କରି ଦକ୍ଷିଣ ଆଫ୍ରିକା ୨ ଉଇକେଟ ହରାଇ ୧୮୯ ରନ ସଂଗ୍ରହ କରିଥିଲା। ଜବାବରେ ଇଂଲଣ୍ଡ ୮ ଉଇକେଟ ହରାଇ ୧୭୯ ରନରେ ସୀମିତ ରହି ପରାସ୍ତ ହୋଇଥିଲା। ବିଜୟ ସତ୍ତ୍ୱେ ଦକ୍ଷିଣ ଆଫ୍ରିକା ସେମିଫାଇନାଲକୁ ଉଠିବାରେ ବିଫଳ ହୋଇଛି। ସମାନ ୮ ପଏଣ୍ଟ ପାଇଥିଲେ ମଧ୍ୟ ଉନ୍ନତ ରନରେଟ୍ ଭିତ୍ତିରେ ଇଂଲଣ୍ଡ ଓ ଅଷ୍ଟ୍ରେଲିଆ ସେମକୁ ଉଠିଛନ୍ତି।
