କୋଲକାତା,୧୬ା୧୧: ଇଡେନ୍ ଗାର୍ଡେନ୍ସରେ ଖେଳାଯାଇଥିବା ପ୍ରଥମ ଟେଷ୍ଟରେ ଟିମ୍ ଇଣ୍ଡିଆକୁ ଶୋଚନୀୟ ପରାଜୟର ସମ୍ମୁଖୀନ ହେବାକୁ ପଡ଼ିଛି। ମାତ୍ର ୧୨୪ ରନ୍ର ଲକ୍ଷ୍ୟ ପିଛା କରି ନପାରି ଭାରତୀୟ ଦଳ ଦ୍ୱିତୀୟ ଇନିଂସରେ ୯୩ ରନ୍ରେ ଅଲ୍ଆଉଟ୍ ହୋଇଯାଇଥିଲା। ଫଳରେ ଟେମ୍ବା ବାଭୁମାଙ୍କ ନେତୃତ୍ୱାଧୀନ ଦକ୍ଷିଣ ଆଫ୍ରିକା ଏହି ମ୍ୟାଚ୍କୁ ୩୦ ରନ୍ରେ ଜିତି ନେଇଛି।
ଏହି ବିଜୟ ସହ ଦକ୍ଷିଣ ଆଫ୍ରିକା ୧୫ ବର୍ଷ ପରେ ଭାରତ ମାଟିରେ ଟେଷ୍ଟ ମ୍ୟାଚ୍ ଜିତିବାର ରେକର୍ଡ କରିଛି। ଏହା ସହିତ ୨୦୧୨ ମସିହା ପରେ କୋଲକାତାରେ ଭାରତର ଏହା ପ୍ରଥମ ପରାଜୟ।
ଭାରତ ପିଛା କରି ହାରିଥିବା ଟେଷ୍ଟ ଇତିହାସର ଏହା ଦ୍ୱିତୀୟ ସର୍ବନିମ୍ନ ଲକ୍ଷ୍ୟ ଅଟେ। ଏହା ପୂର୍ବରୁ ୧୯୯୭ରେ ଭାରତ ୱେଷ୍ଟଇଣ୍ଡିଜ୍ ବିପକ୍ଷରେ ୧୨୦ ରନ୍ର ଲକ୍ଷ୍ୟ ହାସଲ କରିପାରି ନଥିଲା।
ମ୍ୟାଚ୍ରେ ଭାରତୀୟ ବ୍ୟାଟରଙ୍କ ପ୍ରଦର୍ଶନ ଅତ୍ୟନ୍ତ ଶୋଚନୀୟ ରହିଥିଲା। ଓପନର ଯଶସ୍ୱୀ ଜୟସ୍ୱାଲ୍ ଏବଂ କେ.ଏଲ୍ ରାହୁଲ୍ ମାତ୍ର ୧ ରନ୍ରେ ଆଉଟ୍ ହୋଇଯାଇଥିଲେ। ଉପ-ଅଧିନାୟକ ଋଷଭ ପନ୍ତ ମଧ୍ୟ ଫେଲ୍ ମାରିଥିଲେ। ବେକରେ ଆଘାତ ଯୋଗୁଁ ମ୍ୟାଚ୍ ମଝିରେ ବାଦ୍ ପଡ଼ିଥିବା ଅଧିନାୟକ ଶୁଭମନ ଗିଲ୍ଙ୍କ ଅନୁପସ୍ଥିତି ଦଳକୁ ଅନୁଭବ ହୋଇଥିଲା।
ଦକ୍ଷିଣ ଆଫ୍ରିକାର ସ୍ପିନର ସାଇମନ୍ ହାରମର ଉଭୟ ଇନିଂସରେ ୪ଟି ଲେଖାଏଁ ୱିକେଟ୍ ନେଇ ମୋଟ ୮/୫୧ ପ୍ରଦର୍ଶନ କରି ‘ପ୍ଲେୟାର୍ ଅଫ୍ ଦି ମ୍ୟାଚ୍’ ପୁରସ୍କାର ହାସଲ କରିଛନ୍ତି।
