ଭୁବନେଶ୍ୱର,୨୮।୬(ଅନିଲ ଦାସ)
ଦିଗପହଣ୍ଡି ବସ୍ ଦୁର୍ଘଟଣା ପରେ ରାଜ୍ୟ ପରିବହନ ବିଭାଗ ପକ୍ଷରୁ ଏକ ନୂତନ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜ୍ୟୁଅର(ଏସ୍ଓପି) କରିବାକୁ ନିଷ୍ପତ୍ତି ହୋଇଛି। ଦୁର୍ଘଟଣା ପରେ ତ୍ୱରିତ ପଦକ୍ଷେପ ନେବାକୁ ଏଥିରେ ବ୍ୟବସ୍ଥା କରାଯାଇଛି। ବିଭାଗରେ ଥିବା କଲ୍ ସେଣ୍ଟରକୁ ଖବର ଆସିବା ମାତ୍ରେ ଅଳ୍ପ କେଇ ସେକେଣ୍ଡରେ ସମସ୍ତ ଆଞ୍ଚଳିକ ପରିବହନ ଅଧିକାରୀ ଓ ଜରୁରିକାଳୀନ ସ୍ବାସ୍ଥ୍ୟ ଟିମ୍ ନିକଟକୁ ଏସ୍ଏମ୍ଏସ୍ ପହଞ୍ଚିବ। ଏହି ଟିମ୍ ଦୁର୍ଘଟଣା ସ୍ଥଳକୁ ଯାଇ ଉଦ୍ଧାର କାର୍ଯ୍ୟରେ ନିୟୋଜିତ ହେବେ। ଏହାଛଡ଼ା ସ୍ବାସ୍ଥ୍ୟ ବିଭାଗ, ପୋଲିସ ଏବଂ ପୂର୍ତ୍ତ ବିଭାଗକୁ ନେଇ ଏକ ସ୍ପେଶାଲ ଏକ୍ସପର୍ଟ ଟିମ୍ ଗଠନ କରାଯିବ। ଏହି ଟିମ୍ ଦୁର୍ଘଟଣା ସ୍ଥଳ ଯାଞ୍ଚ କରିବ। ଯାନବାହନଗୁଡ଼ିକର ଫିଟ୍ନେସ, ବୀମା ଇତ୍ୟାଦିକୁ ‘ବାହନ’ ପୋର୍ଟାଲ ସହ ସଂଯୋଗ କରାଯାଇଛି। ରାଜ୍ୟରେ ଥିବା ପ୍ରତ୍ୟେକ ଟୋଲ୍ ଗେଟ୍ ସହ ମଧ୍ୟ ବାହନ ପୋର୍ଟାଲ ସଂଯୋଗ ରହିଛି। କୌଣସି ଗାଡ଼ି ବିନା ବୀମା କିମ୍ବା ଫିଟ୍ନେସ୍ରେ ଯାତ୍ରା କରୁଥିଲେ ତାହା ତୁରନ୍ତ ବାହନ ପୋର୍ଟାଲକୁ ସୂଚନା ମିଳିବ। ଏ ନେଇ ଆର୍ଟିଓମାନେ କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି ବୋଲି ପରିବହନ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି।
