ଇନ୍ଦୋର,୧୧ା୬:ଇନ୍ଦୋର ବ୍ୟବସାୟୀ ରାଜା ରଘୁବଂଶୀଙ୍କୁ ମେଘାଳୟରେ ହନିମୁନ୍ ବେଳେ ସ୍ତ୍ରୀ ସୋନମ୍ ତାଙ୍କୁ ହତ୍ୟା କରାଇବା ଘଟଣା ସାରା ଦେଶରେ ଆଲୋଡ଼ନ ସୃଷ୍ଟି କରିଥିବାବେଳେ ଏହା ପଛର ରହସ୍ୟ ଧୀରେ ଧୀରେ ପଦାକୁ ଆସିବାରେ ଲାଗିଛି। ଏକ ସୂତ୍ର ଅନୁଯାୟୀ, ସୋନମ୍ ତାଙ୍କ ସ୍ବାମୀଙ୍କୁ ହତ୍ୟା କରିବା ପାଇଁ ସୁପାରିକିଲରମାନଙ୍କୁ ପ୍ରଥମେ ୪ ଲକ୍ଷ ଟଙ୍କା ଯାଚିଥିଲେ। ପରେ ସେ ସୁପାରି ପରିମାଣ ୨୦ ଲକ୍ଷ ଟଙ୍କାକୁ ବୃଦ୍ଧି କରିଥିଲେ। ରାଜାଙ୍କୁ ହତ୍ୟା କରାଯିବା ପରେ ତାଙ୍କ ମୃତଦେହକୁ ମେଘାଳୟର ଏକ ଖାତକୁ ଫିଙ୍ଗିବାରେ ସୋନମ୍ ଅନ୍ୟ ଅଭିଯୁକ୍ତମାନଙ୍କୁ ସହାୟତା କରିଥିଲେ ବୋଲି ପୋଲିସ ସୂତ୍ରରୁ ଜଣାପଡ଼ିଛି।
ରାଜ କୁଶ୍ଓ୍ବାଙ୍କ ସହ ପ୍ରେମ ସମ୍ପର୍କ ଥିବା ନେଇ ସୋନମ୍ ବିବାହ ପୂର୍ବରୁ ତାଙ୍କ ମାଆଙ୍କୁ ଜଣାଇଥିଲେ। ତେବେ ସେମାନଙ୍କ ସମ୍ପର୍କକୁ ଗ୍ରହଣ କରିବାକୁ ପରିବାର ମନା କରିଦେଇଥିଲା ବୋଲି ରାଜା ରଘୁବଂଶୀଙ୍କ ବଡ଼ଭାଇ ବିପିନ ଗଣମାଧ୍ୟମକୁ କହିଛନ୍ତି। ଭଲ ଯେଉଁଠି ପାଅ ପଛକେ ବିବାହ କିନ୍ତୁ ଆମ ସମ୍ପ୍ରଦାୟରେ ହେବ ବୋଲି ମାଆ କହିବାରୁ ପରେ ଯାହା ଘଟିବ ସେଥିପାଇଁ ମୁଁ ଦାୟୀ ରହିବି ନାହିଁ ବୋଲି ସୋନମ୍ ଜବାବ ଦେଇଥିଲେ।
ମେ’ ୧୧ରେ ବିବାହ ପରେ ନବ ଦମ୍ପତି ରାଜା ରଘୁବଂଶୀ ଓ ସୋନମ୍ ୨୦ ତାରିଖରେ ଇଷ୍ଟ୍ ଖାସି ହିଲ୍ସ ଚେରାପୁଞ୍ଜିକୁ ହନିମୁନ୍ରେ ଯାଇଥିଲେ। ମେ’ ୨୩ରେ ଉଭୟେ ନିଖୋଜ ହୋଇଯାଇଥିଲା ବେଳେ ଜୁନ୍ ୨ରେ ଚେରାପୁଞ୍ଜିର ଏକ ଜଳପ୍ରପାତ ନିକଟରୁ ରାଜାଙ୍କ ମୃତଦେହ ମିଳିଥିଲା। ବିବାହର ଦିନ କେଇଟା ପରେ ରାଜାଙ୍କୁ ହତ୍ୟା କରିବା ପାଇଁ ସୋନମ୍ ତାଙ୍କ ପ୍ରେମିକ ରାଜ କୁଶଓ୍ବାଙ୍କ ସହ ଯୋଜନା କରିଥିଲେ। ତଦନୁଯାୟୀ ମେଘାଳୟକୁ ହନିମୁନ୍ରେ ଯିବାର ପ୍ଲାନ୍ ହୋଇଥିଲା। ରାଜ ନିଜର ପିଲାଦିନର ସାଙ୍ଗ ଆନନ୍ଦ କୁମ୍ରି, ଆକାଶ ରାଜପୁତ ଓ ବିଶାଲ ସିଂ ଚୌହାନ୍ଙ୍କୁ ଇନ୍ଦୋରର ଏକ କାଫେକୁ ଡାକି ରାଜାଙ୍କୁ ହତ୍ୟା ଯୋଜନା କରିଥିଲେ ଓ ସେମାନଙ୍କୁ ଟଙ୍କା ଯାଚିଥିଲେ। ୨୦ ତାରିଖରେ ରାଜା ଓ ସୋନମ୍ ମେଘାଳୟକୁ ଯାଇଥିବାବେଳେ ସେମାନଙ୍କର ଫେରିବା ଟିକେଟ ହୋଇ ନ ଥିଲା। ତାଙ୍କ ପଛେ ପଛେ ୩ ସୁପାରିକିଲର ପ୍ରଥମେ ଗୁଆହାଟୀ ଯାଇ ସେଠାରୁ ଅନ୍ଲାଇନ୍ରେ ଏକ କୁରାଢ଼ି ଅର୍ଡର କରିଥିଲେ। ପରେ ସେମାନେ ସିଲଂ ଯାଇ ସୋନମ୍ ଓ ରାଜା ରହୁଥିବା ହୋମ୍ଷ୍ଟେ ନିକଟ ଏକ ହୋଟେଲରେ ରହିଥିଲେ। ନବଦମ୍ପତି ଉକ୍ତ ପାର୍ବତ୍ୟାଞ୍ଚଳରେ ୩ ଦିନ ବୁଲିବା ପରେ ଫଟୋ ଶୁଟ୍ ପାଇଁ ସୋନମ୍ ରାଜାଙ୍କୁ ନେଇ ଏକ ପାହାଡ଼ ପାର୍ଶ୍ୱକୁ ଯାଇଥିଲେ। ସୁପାରିକିଲର ସେମାନଙ୍କୁ ଅନୁସରଣ କରିବା ସହ ରାଜାଙ୍କ ସହ ହିନ୍ଦୀରେ କଥା ହୋଇଥିଲେ। ସୋନମ୍ ନିଜକୁ କ୍ଳାନ୍ତ ଅନୁଭବ କରୁଥିବା ଅଭିନୟ କରି ଜାଣିଶୁଣି ସେମାନଙ୍କଠାରୁ ବହୁ ପଛରେ ରହିଯାଇଥିଲେ। ସେମାନେ ନିଛାଟିଆ ସ୍ଥାନରେ ପହଞ୍ଚତ୍ବା ପରେ ତାଙ୍କୁ ହତ୍ୟା କର ବୋଲି ସୋନମ୍ ସୁପାରିକିଲରଙ୍କୁ ଚିତ୍କାର କରି କହିଥିଲେ। ମେ’ ୨୩ରେ ଦମ୍ପତି ନିଖୋଜ ହେବା ଦିନ ହିଁ ରାଜାଙ୍କୁ ହତ୍ୟା କରାଯାଇଥିଲା। ମୃତଦେହକୁ ଖାତ ମଧ୍ୟକୁ ଫିଙ୍ଗିସାରିବା ପରେ ସେହିଦିନ ଅପରାହ୍ନ ୨ଟା ୧୫ରେ ରାଜାଙ୍କ ଫୋନ୍ରୁ ସୋନମ୍ ଏକ ପୋଷ୍ଟ କରିଥିଲେ, ଯେଉଁଥିରେ ସେ ଲେଖିଥିଲେ ‘ସାତ୍ ଜନ୍ମୋଁ କା ସାଥ ହୈ’। ଏହି ବାର୍ତ୍ତା ମାଧ୍ୟମରେ ସ୍ବାମୀ ଜୀବିତ ଥିବା ସୋନମ୍ ଦର୍ଶାଇବାକୁ ଚାହିଁଥିଲେ। ତେବେ ହତ୍ୟାକାଣ୍ଡର ମାଷ୍ଟରମାଇଣ୍ଡ ପ୍ରେମିକ ରାଜ କିନ୍ତୁ ମେଘାଳୟ ଯାଇ ନ ଥିଲେ। ସେ ପରଦା ପଛରେ ରହି ସବୁ ଯୋଜନା କରିବା ସହ ସୋନମ୍ଙ୍କ ସହ ଯୋଗାଯୋଗରେ ରହିଥିଲେ ବୋଲି ପୋଲିସ କହିଛି।
