ସାରା ବିଶ୍ୱ ଏବେ ମହାମାରୀ କରୋନା ସହ ଲଢ଼ୁଛି। ବିଶେଷଜ୍ଞମାନେ ରୋଗର ଔଷଧ ବାହାର କରିବାକୁ ଦିନ ରାତି ଏକ କରିଦେଇଛନ୍ତି। ହେଲେ ଏଯାଏ ତାହା ବାହାରିପାରୁ ନ ଥିବାରୁ ଲୋକମାନଙ୍କୁ ସତର୍କ ଏବଂ ସଚେତନ ରହିବାକୁ କୁହାଯାଉଛି। ଏହାକୁ ଅନେକ ଲୋକ ମାନୁ ନ ଥିବା ନଜିରକୁ ଆସୁଛି। ହେଲେ ଏହା କେତେ ଭୟଙ୍କର ହୋଇପାରେ ତାର ଏକ ଘଟଣା ଆମେରିକାରେ ଦେଖିବାକୁ ମିଳିଛି। ଫ୍ଲୋରିଡାରେ ଜଣେ ଯୁବକ ମାସ୍କ ନ ପିନ୍ଧି ସାଙ୍ଗମାନଙ୍କ ସହ ବୁଲିବାକୁ ଚାଲିଯାଇଥିଲେ। ଏଥିପାଇଁ ତାଙ୍କ ପରିବାରର ସମସ୍ତଙ୍କୁ କରୋନା ସଂକ୍ରମଣ ହୋଇଥିଲା। ଏପରିକି ତାଙ୍କ ବାପା ଜୀବନ ମରଣ ସହ ସଂଘର୍ଷ କରୁଥିବା ଜଣାପଡ଼ିଛି।
କେବଳ ପୁଅଙ୍କ ଭୁଲ ପାଇଁ ୪୨ ବର୍ଷୀୟ ବାପା ଜନ୍ ପ୍ଲେସ୍ଙ୍କ ଅବସ୍ଥା ଗୁରୁତର ରହିଛି। ତାଙ୍କୁ ଆଇସିୟୁରେ ଭର୍ତ୍ତି କରାଯାଇଛି। ପୁଅଙ୍କଠାରୁ ତାଙ୍କୁ ସଂକ୍ରମଣ ହୋଇଥିଲା। ୩ ସପ୍ତାହରୁ ଅଧିକ ସମୟ ଧରି ସେ ଡାକ୍ତରଖାନାରେ ଭର୍ତ୍ତି ହୋଇଥିବା ଜଣାପଡ଼ିଛି। ହେଲେ ଅବସ୍ଥାରେ ସୁଧାର ଆସିବା ତ ଦୂରର କଥା, ବେଳକୁ ବେଳ ଅବନତି ଘଟୁଛି।
ଜନ୍ଙ୍କ ପତ୍ନୀ ମିଶେଲ ଜିମେଟ୍ କୁହନ୍ତି, ଜନ ମେଦବହୁଳତା ସହ ଡାଇବେଟିସ୍ର ଶିକାର ହୋଇଥିଲେ। ଏଣୁ ସେ ତାଙ୍କ ସାବତ ପୁଅ(୨୧ ବର୍ଷ)କୁ ସାବଧାନ ରହିବାକୁ କହିଥିଲେ। ହେଲେ ସେ ଶୁଣି ନ ଥିଲେ। ଏବେ ଜନ୍ ୨ ସପ୍ତାହରୁ ଅଧିକ ସମୟ ହେଲାଣି ଭେଣ୍ଟିଲେଟରରେ ଅଛନ୍ତି। ପରିବାରର ଅନ୍ୟମାନେ ମଧ୍ୟ ସଂକ୍ରମିତ ହୋଇଛନ୍ତି। ହେଲେ ଜନ୍ଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି।
