ଭୁବନେଶ୍ୱର,୨୬।୨: ୟୁକୋ ବ୍ୟାଙ୍କର ପରିଚାଳନା ନିର୍ଦ୍ଦେଶକ ତଥା ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ସୋମା ଶଙ୍କର ପ୍ରସାଦ ନିକଟରେ ପ୍ରଥମ ଥର ପାଇଁ ୨ଦିନିଆ ଭୁବନେଶ୍ୱର ଗସ୍ତରେ ଆସିଥିଲେ। ଏହି ପରିପ୍ରେକ୍ଷୀରେ ମୁଖ୍ୟ ଶାସନ ସଚିବ ଏବଂ ଅତିରିକ୍ତ ମୁଖ୍ୟ ଶାସନ ସଚିବ ତଥା ଡେଭେଲପମେଣ୍ଟ କମିଶନରଙ୍କୁ ମଧ୍ୟ ସେ ସାକ୍ଷାତ କରିଥିଲେ। ସେହିଭଳି ନିକଟରେ ଅନୁଷ୍ଠିତ ହୋଇଥିବା ଏସ୍ଏଲ୍ବିସିର ୧୬୫ ଏବଂ ୧୬୬ତମ ବୈଠକରେ ସେ ଅଧ୍ୟକ୍ଷତା କରିଥିଲେ। ଓଡ଼ିଶାର ଜନସାଧାରଣ ଏବଂ ବିଶେଷ ଭାବେ ବ୍ୟାଙ୍କ କର୍ମଚାରୀଙ୍କ ପାଇଁ ନିଆଯାଇଥିବା ଟିକାକରଣ ପଦକ୍ଷେପ ନିମନ୍ତେ ସୋମା ଶଙ୍କର ଓଡ଼ିଶା ସରକାରଙ୍କୁ ଗଭୀର କୃତଜ୍ଞତା ଜଣାଇଥିଲେ। ସେହିପରି ବାର୍ଷିକ ଋଣ ଯୋଜନାରେ ସଫଳତା ହାସଲ କରିବାକୁ ସେ ବ୍ୟାଙ୍କ ପ୍ରତିନିଧିମାନଙ୍କୁ ଅନୁରୋଧ କରିଥିଲେ। ଅପରପକ୍ଷରେ ଏନ୍ପିଏ ରିକଭରିରେ ସେ ବ୍ୟାଙ୍କ କର୍ମଚାରୀଙ୍କୁ ସହଯୋଗ କରିବା ପାଇଁ ଓଡ଼ିଶା ସରକାରଙ୍କ ଲାଇନ ଡିପାର୍ଟମେଣ୍ଟକୁ ନିର୍ଦ୍ଦେଶ ଦିଆଯାଉ ବୋଲି ସରକାରଙ୍କ ପ୍ରତିନିଧିମାନଙ୍କୁ ଅନୁରୋଧ କରିଥିଲେ। ଏହି ପରିପ୍ରେକ୍ଷୀରେ ସେ ପୁରୀ ମୁଖ୍ୟ ଶାଖା, ଅଶୋକା ମାର୍କେଟ ଶାଖା, ସଚିବାଳୟ ଶାଖା, ରସୁଲଗଡ଼ ଶାଖା ଆଦି ପରିଦର୍ଶନ କରିଥିଲେ। ଏହି ଅବସରରେ ସେ କେତେଜଣ ଯୋଗ୍ୟ ଗ୍ରାହକଙ୍କର ବିଜ୍ନେସ୍ ୟୁନିଟ୍ଗୁଡ଼ିକୁ ପରିଦର୍ଶନ କରିଥିଲେ। ଆର୍ଥିକ ବର୍ଷ ୨୦୨୨-୨୩ ରେ ୟୁକୋ ବ୍ୟାଙ୍କ ପକ୍ଷରୁ ୨୦୦ ନୂତନ ଶାଖା ଖୋଲାଯିବାର ଯୋଜନା ରହିଛି ବୋଲି ସୋମା ଶଙ୍କର ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ପରିଶେଷରେ ସେ ବ୍ୟାଙ୍କର ଅବସରପ୍ରାପ୍ତ କର୍ମଚାରୀ ପ୍ରତିନିଧି ଏବଂ ରାଜ୍ୟ ସଂଘ ପ୍ରତିନିଧିଙ୍କ ସହ ସାକ୍ଷାତ କରିଥିଲେ। ଭୁବନେଶ୍ୱର, ବାଲେଶ୍ୱର ଏବଂ ସମ୍ବଲପୁର ଅଞ୍ଚଳର ଆଞ୍ଚଳିକ ମୁଖ୍ୟଙ୍କ ଉପସ୍ଥିତିରେ ସେ ସହରର ଶାଖା ମୁଖ୍ୟମାନଙ୍କୁ ସମ୍ବୋଧିତ କରିଥିଲେ। ସେ ଉତ୍ତମ ଗ୍ରାହକ ସେବା, ଗୁଣାତ୍ମକ ବ୍ୟବସାୟିକ ଅଭିବୃଦ୍ଧି ଏବଂ ଲାଭଦାୟକତା ଉପରେ ଗୁରୁତ୍ୱାରୋପ କରିବା ସହ ଏସ୍ବିଆଇ ଜୀବନ ବୀମା ଉତ୍ପାଦରେ ସର୍ବୋତ୍ତମ ପ୍ରଦର୍ଶନ କରିଥିବା ଶାଖା ମୁଖ୍ୟମାନଙ୍କୁ ଅଭିନନ୍ଦନ ଜଣାଇଥିଲେ।
