ନବରଙ୍ଗପୁର, ୨୦।୪: (ବି.ପ୍ର.) ଟ୍ରାଫିକ ନିୟନ୍ତ୍ରଣ ପାଇଁ ପ୍ରଶାସନ ଜଣସାଧାରଣଙ୍କ ଦାବିକୁ ଦୃଷ୍ଟିରେ ରଖି ମଙ୍ଗଲମ ଟିମ୍ବର ଦେଇ ମହିଳା ମହାବିଦ୍ୟାଳୟ, ଭିଜିଲାନ୍ସ ଅଫିସ୍ ଛକ ଦେଇ ସର୍କିଟ ହାଉସ ନିକଟ ୨୬ ନମ୍ବର ଜାତୀୟ ରାଜପଥକୁ ଏକ ରାସ୍ତା ସଂଯୋଗକଲେ। ଏବେ ଏହି ରାସ୍ତାର ଅନେକ ସ୍ଥାନ ବିପଦପୂର୍ଣ୍ଣ ହୋଇ ପଡ଼ିଛି।
ସହରର ବାଇପାସ୍ ରାସ୍ତା ଭାବେ ବ୍ୟବହାର ହେଉଥିବା ରାସ୍ତାକଡ଼ରେ ଟ୍ରକ୍ ଓ ଟିପ୍ପର ମାଧ୍ୟମରେ ମାଟି ଓ ଆବର୍ଜନା ଡମ୍ପିଂ କରାଯାଉଛି। ରାସ୍ତା ସଂକୀର୍ଣ୍ଣ ଯୋଗୁ ଦୁର୍ଘଟଣାର ସମ୍ମୁଖୀନ ହେଉଛନ୍ତି ପଥିକ ଓ ଚାଳକ। ରାସ୍ତା ଓ ଗୃହ ନିର୍ମାଣ ବିଭାଗର ଏହି ରାସ୍ତା ହୋଇଥିବାବେଳେ ବିଭାଗ ଓ ପୌରସଂସ୍ଥା କେହି ମଧ୍ୟ ଦୃଷ୍ଟି ଦେଉ ନାହାନ୍ତି। ଜିଲାପାଳ ଏ ଦିଗରେ ଗୁରୁତ୍ୱ ଦେବାକୁ ଦାବି ହେଉଛି। ଅନ୍ୟପକ୍ଷରେ ଏହି ରାସ୍ତାକୁ ସଂଯୋଗ କରୁଥିବା ଭିଜିଲାନ୍ସ ଅଫିସ ଛକରୁ ସର୍କିଟ ହାଉସ ଛକ ପର୍ଯ୍ୟନ୍ତ ନୂତନ ରାସ୍ତା ସଂଯୋଗ କରାଗଲା । ଏହି ରାସ୍ତା ଖୋଲିବାର ମାସକ ମଧ୍ୟରେ ଦୁର୍ଘଟଣାରେ ଜଣେ କନଷ୍ଟେବଲଙ୍କର ମୃତ୍ୟୁ ଘଟିଲା। ଏହାର କିଛିଦିନ ବ୍ୟବଧାନରେ ଜିଲା ପରିଷଦ କାର୍ଯ୍ୟାଳୟର ବୋଲେରୋ ଟ୍ରକ୍କୁ ପିଟିଲା । ଏଥିରେ ଜଣେ ଅଧିକାରୀ ଗୁରୁତର ହୋଇ ଏବେ ବି ଚିକିତ୍ସାଧୀନ ଅଛନ୍ତି। ରାସ୍ତାକଡ଼ରେ ଗୋଚାଲାଣ ଟ୍ରକ୍ ବେଆଇନ ଭାବେ ପାର୍କିଂ ଦୁର୍ଘଟଣାର ମୁଖ୍ୟ କାରଣ ଥିଲା। ସେହିଭଳି ଏବେ ମାଟି ଓ ଆବର୍ଜନା ରାସ୍ତା ଉପରେ ଡମ୍ପିଂ କରିବା ଦୁର୍ଘଟଣାର କାରଣ ହୋଇ ଠିଆହେବ। ଆଗକୁ ରହିଛି କଲ୍ୟାଣ ମଣ୍ଡପ। କୌଣସି କାର୍ଯ୍ୟକ୍ରମ ହେଲେ ଗାଡ଼ି ପାର୍କିଂ ଓ କିଛି ଦୂରରେ ରହିଛି ବିଦେଶୀ ମଦଦୋକାନ ଏହି ଦୁଇ ସ୍ଥାନ ମଝିରେ ରାସ୍ତାକଡ଼ରେ ମାଟି ଓ ଆବର୍ଜନା ଆଣି କେହି ବିଳମ୍ବିତ ରାତିରେ ପକାଇ ଚାଲିଛନ୍ତି। ଏନେଇ ପୌର ପ୍ରଶାସନ ଓ ଜିଲାପାଳ ଗୁରୁତ୍ୱ ନ ଦେଲେ ସଡ଼କ ସୁରକ୍ଷା ଜୀବନ ରକ୍ଷା ବାର୍ତ୍ତା ଓଲଟା ହୋଇଯିବ। ଦୁର୍ଘଟଣା ରୋକିବା ପାଇଁ ପ୍ରଶାସନ ସମେତ ସମସ୍ତ ଜନସାଧାରଣଙ୍କ ମଧ୍ୟ କର୍ତ୍ତବ୍ୟ ରହିଛି। ଯେଉଁ ବ୍ୟକ୍ତିବିଶେଷ ମାଟି ଓ ଆବର୍ଜନା ରାସ୍ତା ଉପରେ ପକାଉଛନ୍ତି ତାହା ନ କରନ୍ତୁ। ନିଜ ସ୍ବାର୍ଥପାଇଁ ଅନ୍ୟର ଜୀବନକୁ ବିପଦରେ ପକାନ୍ତୁ ନାହିଁ ବୋଲି ଲୋକେ ଦାବି କରିଛନ୍ତି।
