ଜଟଣୀ,୬।୮(ଡି.ଏନ୍.ଏ): ଜଟଣୀ ବ୍ଲକର ଛଣଘର କୁଶମାଟି ପଞ୍ଚାୟତ କାର୍ଯ୍ୟାଳୟ ପକ୍ଷରୁ ଏକ ପ୍ରକଳ୍ପ ମାଧ୍ୟମରେ ନୂତନ କାଜୁ ଜଙ୍ଗଲ ସୃଷ୍ଟି ଉଦ୍ଦେଶ୍ୟରେ ଚାରା ରୋପଣ କରାଯିବା ସହ ଖୁଣ୍ଟ ପୋତାଯାଇ ତାର ବାଡ଼ ଘେରାଯାଇଥିଲା। ତେବେ ବିରୋଧୀ ଗୋଷ୍ଠୀ ଏହି ଗଛ ଉପାଡ଼ି ଦେବା ସହ ତାରବାଡ଼ ଖୁଣ୍ଟ ଭାଙ୍ଗିଦେଇଥିବା ଗୁରୁବାର ସରପଞ୍ଚ ସୁନିଲ କୁମାର ରାଉତରାୟ ଜଟଣୀ ଥାନାରେ ଅଭିଯୋଗ କରିଛନ୍ତି। ସୂଚନା ଅନୁଯାୟୀ, ମୃତ୍ତିକା ସଂରକ୍ଷଣ ବିଭାଗ ପକ୍ଷରୁ ଛଣଘର ତତ୍ତ୍ୱାବଧାନରେ ୨୦୨୦ ଜୁଲାଇ ୭ରେ ଜଟଣୀ ବିଧାୟକ ସୁରେଶ କୁମାର ରାଉତରାୟଙ୍କ ଦ୍ୱାରା କାଜୁ ଜଙ୍ଗଲ ମେଗା ପ୍ରୋଜେକ୍ଟ ଉଦ୍ଘାଟିତ ହୋଇଥିଲା। ତେବେ ସେତେବେଳେ କେତେଜଣ ଜବରଦଖଲକାରୀ ଓ ଜମି ମାଫିଆ ଏହି ଜଙ୍ଗଲ ସୃଷ୍ଟିକୁ ବିରୋଧ କରିଥିଲେ। ସେମାନେ ଏହି ପ୍ରକଳ୍ପକୁ ନଷ୍ଟ କରିବା ଲାଗି ଏପର୍ଯ୍ୟନ୍ତ ଚକ୍ରାନ୍ତ ଚଳାଇଛନ୍ତି ବୋଲି ସରପଞ୍ଚ ରାଉତରାୟ ଅଭିଯୋଗ କରିଛନ୍ତି। ସରକାରଙ୍କ ସହାୟତାରେ ଛଣଘର କୁଶମାଟି ଗ୍ରାମରେ ୫୦ ଏକର ଜମିରେ କାଜୁ ଜଙ୍ଗଲ ସୃଷ୍ଟି କରାଯାଇଛି। ତେବେ ଉକ୍ତ କାଜୁ ଜଙ୍ଗଲରୁ ବୁଧବାର ରାତିରେ ଦୁର୍ବୃର୍ତ୍ତମାନେ କାଜୁ ଗଛ ଉପାଡ଼ିନେବା ସହ ପ୍ରାୟ ୬୦ଟି ସିମେଣ୍ଟ ଖୁଣ୍ଟ ଭାଙ୍ଗିଦେଇଛନ୍ତି। ଏହା ପୂର୍ବରୁ ୨୦୧୯ରେ ଉକ୍ତ ପଞ୍ଚାୟତର ପୋଖରୀ ହୁଡ଼ା ଓ ମୁଖ୍ୟରାସ୍ତା ପାର୍ଶ୍ୱରେ ଲଗାଯାଇଥିବା ନଡ଼ିିଆ ଚାରା ସହିତ ଅନ୍ୟ କିଛି ଚାରାକୁ ଉପାଡ଼ିି ଦେଇଥିଲେ। ଏ ନେଇ ମଧ୍ୟ ଥାନାରେ ଅଭିଯୋଗ ହୋଇଥିଲା।
