ଥୁଆମୂଳ ରାମପୁର, ୨୫ା୫ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ସିନ୍ଧିପଦର ପଞ୍ଚାୟତ ଅଧୀନ ସମାପଲା ଗାଁରେ ଏକ ଦୁଃଖଦ ଘଟଣା ଘଟିଯାଇଛି। ସାପ କାମୁଡ଼ାରେ ଜଣେ ବିବାହିତ ଚାଷୀଙ୍କ ମୃତ୍ୟୁ ଘଟିଥିବା ବେଳେ ସମ୍ପୂର୍ଣ୍ଣ ଅଞ୍ଚଳରେ ଶୋକର ଛାୟା ଖେଳିଯାଇଛି। ମୃତକ ଜଣକ ହେଉଛନ୍ତି ସମାପଲା ଗ୍ରାମର ଶୁକ୍ରୁ ମାଝୀଙ୍କ ପୁତ୍ର ଦାନ ମାଝୀ (୪୫)। ମିଳିଥିବା ସୂଚନା ମୁତାବକ, ଦାନ ମାଝୀ ନିଜ ଗ୍ରାମ ନିକଟସ୍ଥ ‘ଉଣ୍ଡୁଲା ମସ୍କା’ ନାମକ ଚାଷ ଜମିକୁ କାମ କରିବାକୁ ଯାଇଥିଲେ। ଚାଷ କାର୍ଯ୍ୟ କରୁଥିବା ସମୟରେ ହଠାତ ଏକ ବିଷାକ୍ତ ନାଗ ସାପ ତାଙ୍କୁ ଦଂଶନ କରିଥିଲା। ଏହାପରେ ସେ ଗୁରୁତର ଅବସ୍ଥାରେ ଘରକୁ ଫେରି ପରିବାର ଲୋକଙ୍କୁ ସର୍ପାଘାତ ସମ୍ପର୍କରେ ଜଣାଇଥିଲେ। ପରିବାର ଲୋକେ ତୁରନ୍ତ ୧୦୮ ଆମ୍ବୁଲାନ୍ସ ସହ ଯୋଗାଯୋଗ କରି ତାଙ୍କୁ ମେଡିକାଲ ଆଣିବାକୁ ବ୍ୟବସ୍ଥା କରିଥିଲେ। ମାତ୍ର ଦୁର୍ଭାଗ୍ୟବଶତଃ, ଥୁଆମୂଳ ରାମପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଆଣୁଥିବା ବାଟରେ, ଗୋପାଳପୁର ନିକଟରେ ହିଁ ଆମ୍ବୁଲାନ୍ସ ଭିତରେ ତାଙ୍କର ପ୍ରାଣବାୟୁ ଉଡ଼ିଯାଇଥିଲା। ଡାକ୍ତରଖାନାରେ ପହଞ୍ଚିବା ପରେ ଉପସ୍ଥିତ ଚିକିତ୍ସକ ତାଙ୍କୁ ‘ମୃତ’ ଘୋଷଣା କରିଥିଲେ।
ଏନେଇ ଥୁଆମୂଳ ରାମପୁର ଥାନାରେ ଏକ ଅପମୃତ୍ୟୁ ମାମଲା (କେସ ନମ୍ବର ୦୫/୨୬) ରୁଜୁ କରାଯାଇଛି। ପୋଲିସ ଶବ ବ୍ୟବଚ୍ଛେଦ କରାଇବା ପରେ ମୃତଦେହକୁ ଶୋକାକୁଳ ପରିବାର ଲୋକଙ୍କୁ ହସ୍ତାନ୍ତର କରିଛି। ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ସଠିକ କାରଣ ଏବଂ କେଉଁ ପ୍ରଜାତିର ସାପ ଚୋଟ ମାରିଛି, ତାହା ସ୍ପଷ୍ଟ ହେବ ବୋଲି ଜଣାପଡ଼ିଛି।
ମୃତ ଦାନ ମାଝୀଙ୍କ ପରିବାରରେ ତାଙ୍କ ସ୍ତ୍ରୀ ଏବଂ ଏକ ଛୋଟ ଝିଅ ରହିଛନ୍ତି। ସେ ହିଁ ପରିବାରର ଏକମାତ୍ର ଉପାର୍ଜନକ୍ଷମ ବ୍ୟକ୍ତି ଥିଲେ। ଚାଷ କାମ କରି ସେ ନିଜ ପରିବାର ପ୍ରତିପୋଷଣ କରୁଥିଲେ। ତାଙ୍କର ଆକସ୍ମିକ ବିୟୋଗ ପରେ ଏବେ ତାଙ୍କ ସ୍ତ୍ରୀ ଓ ନାବାଳିକା ଝିଅ ସମ୍ପୂର୍ଣ୍ଣ ଅସହାୟ ଓ ନିରାଶ୍ରୟ ହୋଇପଡ଼ିଛନ୍ତି। ଦାନଙ୍କ ମୃତ୍ୟୁ ପରେ ସ୍ଥାନୀୟ ଅଞ୍ଚଳରେ ଗଭୀର ଶୋକର ବାତାବରଣ ସୃଷ୍ଟି ହେବା ସହ ଗରିବ ଓ ଅସହାୟ ପରିବାରକୁ ସରକାରୀ ନିୟମ ଅନୁଯାୟୀ ତୁରନ୍ତ ଆର୍ଥିକ କ୍ଷତିପୂରଣ ଏବଂ ଅନ୍ୟାନ୍ୟ ସରକାରୀ ସହାୟତା ଯୋଗାଇ ଦେବା ପାଇଁ ଗ୍ରାମବାସୀ ଓ ସ୍ଥାନୀୟ ବୁଦ୍ଧିଜୀବୀ ପ୍ରଶାସନ ନିକଟରେ ଜୋରଦାର ଦାବି କରିଛନ୍ତି।