ବୁଗୁଡ଼ା,୨୫।୪(ଡି.ଏନ.ଏ.): ବୁଗୁଡ଼ା ସହର ସମେତ ନିକଟବର୍ତ୍ତୀ ଅଞ୍ଚଳରେ ଚୋରା ମଦ କାରାବାର ବୃଦ୍ଧି ପାଉଛି। ବୁଗୁଡା ଅବକାରୀ ବିଭାଗ ଅଧୀନରେ ଥିବା ବିଭିନ୍ନ ସ୍ଥାନରେ ମଧ୍ୟ ଏହି ଚୋରା କାରାବାର ବହୁଳ ଭାବରେ ଚାଲୁଛି। ଏପରିକି ବିଭାଗ ପକ୍ଷରୁ ଅନୁମତି ମିଳିଥିବା କିଛି ହାତଗଣତି ଖୁଚୁରା ବିକ୍ରୟ କେନ୍ଦ୍ର ବ୍ୟତୀତ ପାନ ଦୋକାନରୁ ଆରମ୍ଭ କରି ଫାଷ୍ଟଫୁଡ୍ ସେଣ୍ଟର ଏପରିକି କେତେକ ଘରେ ମଧ୍ୟ ବେଆଇନ ଭାବେ ଲୁଚାଛପାରେ ଏହି ଚୋରା ମଦ କାରବାର ଚାଲିଥିବା ନେଇ ସାଧାରଣରେ ଅଭିଯୋଗ ହେଉଛି। ଅବକାରୀ ବିଭାଗ ଏବଂ ମଦ ମାଫିଆଙ୍କ ମଧୁଚନ୍ଦ୍ରିକାରେ ଲକ୍ଷ ଲକ୍ଷ ଟଙ୍କାର ଚୋରା ମଦ ବ୍ୟାପାର ବୁଗୁଡ଼ା ସହର ସମେତ ନିକଟବର୍ତ୍ତୀ ଗ୍ରାମାଞ୍ଚଳରେ ବ୍ୟାପକ ଭାବେ ଚାଲୁ ରହିଛି। ଅନୁମତି ମିଳିନଥିବା ଖୁଚୁରା ବେପାରୀ ଅବକାରୀ ବିଭାଗର କିଛି ଅଧିକାରୀ ଓ ଦଲାଲଙ୍କୁ ହାତକରି ଏପରି ଅବାଧ ଭାବେ ଚୋରା ମଦ କାରବାର କରୁଛନ୍ତି। ମଦୁଆମାନେ ଅନ୍ଧାରିଆ ସ୍ଥାନ କିମ୍ବା ଦୋକାନ କଡରେ ବସି ଖୋଲାଖୋଲି ଭାବେ ମଦ ପିଉଛନ୍ତି। ଯାହାଦ୍ୱାରା ସେହି ରାସ୍ତା ଦେଇ ଯାଉଥିବା ଲୋକଙ୍କୁ ବହୁ ଅସୁବିଧାର ସମ୍ମୁଖୀନ ହେବାକୁ ପଡୁଛି। ଏଥିସହ ନିଶା ସେବନ କରି ଯୁବପିଢି ଅପରାଧିକ କାର୍ଯ୍ୟକଳାପରେ ଲିପ୍ତ ରହୁଥିବା ଅଭିଯୋଗ ହେଉଛି। ଅବକାରୀ ବିଭାଗର ଅଧିକାରୀମାନେ କେତେବେଳେ କେମିତି ଛୋଟ କାଟିଆ ନିଶା ବେପାରୀଙ୍କୁ ଧରୁଥିଲେ ହେଁ ବଡ ବଡ ବେପାରୀମାନଙ୍କୁ ଧରିବାକୁ ସାହାସ କରି ପାରୁନାହାନ୍ତି। ସେହିପରି ବୁଗୁଡ଼ା ସହରର କେତେକ ସ୍ଥାନରେ ଥିବା ମଦ ଦୋକାନ ସରକାରଙ୍କ ଧାର୍ଯ୍ୟ ସମୟଠାରୁ ଅଧିକ ସମୟ ଖୋଲା ରହୁଥିବା ଅଭିଯୋଗ ହେଉଛି। ତେବେ କାହିଁକି ଅବକାରୀ ବିଭାଗର କର୍ମଚାରୀମାନେ ଏଥିପ୍ରତି କାର୍ଯ୍ୟାନୁଷ୍ଠାନ ଗ୍ରହଣ କରୁନାହାନ୍ତି ତାହା ଏବେ ପ୍ରଶ୍ନବାଚୀ ସୃଷ୍ଟି କରୁଛି। ବହୁ ସମୟରେ ସ୍ଥାନୀୟ ଅଞ୍ଚଳର ଅବକାରୀ ବିଭାଗୀୟ କାର୍ଯ୍ୟାଳୟରେ ତାଲା ଝୁଲୁଥିବା ଦେଖିବାକୁ ମିଳିଛି।
