କେନ୍ଦୁଝର,୧୬ା୨(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ସହର ନିକଟ ଏନ୍ଏଚ୍-୨୦ ବାଇପାସ ରାସ୍ତାର କଡ଼ରେ ସିଦ୍ଧମଠରୁ ଶିରିଶପାଳ ମଧ୍ୟରେ ଏବେ ସ୍ଲରି ପାଇପ ବିଛାଇବା କାମ ଚାଲିଛି। ଉକ୍ତ କାମ ନେଇ ସଂସ୍ଥା ଟ୍ରେଞ୍ଚ୍ ଖୋଳି ଖୋଲା ଛାଡ଼ି ଦେଉଥିବାରୁ ଉକ୍ତ ସ୍ଥାନ ଅସୁରକ୍ଷିତ ହୋଇପଡ଼ିଛି। ଜଙ୍ଗଲ ରାସ୍ତାରେ କାମ ହେଉଥିବାରୁ ରାତିରେ ବନ୍ୟପ୍ରାଣୀଙ୍କ ଅତିକ୍ରମ ଓ ଚଳପ୍ରଚଳ ପାଇଁ ସମସ୍ୟା ଉପୁଜୁଛି। ଏ ନେଇ ବାରମ୍ବାର ଅଭିଯୋଗ ହେଉଥିଲେ ହେଁ ପ୍ରତିକାର ବ୍ୟବସ୍ଥା କରାଯାଉନାହିଁ। ଫଳରେ ସ୍ଥାନୀୟ ଅଞ୍ଚଳରେ ଅସନ୍ତୋଷ ବୃଦ୍ଧି ପାଉଛି।
ସୂଚନା ଅନୁଯାୟୀ, ଯୋଡ଼ା ଖଣି ଅଞ୍ଚଳରୁ ପାରାଦୀପକୁ ଏକ କମ୍ପାନୀ ଲୁହାପଥର ଗୁଣ୍ଡ ପରିବହନ କରିବାକୁ ଏହି ସ୍ଲରି ପାଇପ ବିଛାଇବା କାମ କରୁଛି। ଏହି ସ୍ଲରି ପାଇପ ଜାତୀୟ ରାଜପଥ କଡ଼, ଜଙ୍ଗଲ ଦେଇ ପାଇପ ବିଛା ହେଉଥିବାରୁ ବନ୍ୟପ୍ରାଣୀଙ୍କ ଯାତାୟାତରେ ବାଧା ସୃଷ୍ଟି କରୁଛି। ଏ ନେଇ ବନ ବିଭାଗ ପକ୍ଷରୁ ତଦାରଖ କରାଯାଉ ନ ଥିବାରୁ ନୀତିନିୟମ ଉଲ୍ଲଂଘନ କରି ଅନେକ ସମୟରେ ଦିନରାତି କାମ କରାଯାଉଛି। ସିଦ୍ଧମଠରୁ ଶିରିଶପାଳ ମଧ୍ୟରେ ଗାତ (ଟ୍ରେଞ୍ଚ) ଖୋଳି ପାଇପ ବିଛା କାମ ସରିଛି। ମାତ୍ର ସେସବୁ ଗାତକୁ ମାଟି ପକାଇ ପୋତା ଯାଇ ସମତୁଲ କରାଯାଉନାହିଁ। କାମ କରୁଥିବା ସଂସ୍ଥା ଗୋଟିଏ ସ୍ଥାନରେ ଟ୍ରେଞ୍ଚ ଖୋଳି ପାଇପ ବିଛାଇବା ପରେ ସେ ସ୍ଥାନକୁ ସମତୁଲ କରି ଅନ୍ୟ ସ୍ଥାନରେ କାମ କରିବା କଥା। କିନ୍ତୁ ସମସ୍ତ ନୀତିନିୟମକୁ ଉଲ୍ଲଂଘନ କରି ତରବରିଆ ଭାବେ ଦୀର୍ଘ ବାଟ ପର୍ଯ୍ୟନ୍ତ ଟ୍ରେଞ୍ଚ ଖୋଳି କାମ କରୁଥିବାରୁ ଏଭଳି ପରିସ୍ଥିତି ଦେଖାଦେଇଛି। ଫଳରେ ଉନ୍ମୁକ୍ତ ଟ୍ରେଞ୍ଚ୍ ଯୋଗୁ ବନ୍ୟପ୍ରାଣୀ ତଥା ଗୃହପାଳିତ ପ୍ରାଣୀଙ୍କ ଚଳପ୍ରଚଳରେ ସମସ୍ୟା ସୃଷ୍ଟି ହେଉଛି। ବିଶେଷ କରି ଉକ୍ତ ଅଞ୍ଚଳରେ ଏବେ ହାତୀପଲ ଚଳପ୍ରଚଳ କରୁଥିବାରୁ ଉକ୍ତ ଖାଲରେ ପଡ଼ି ଆହତ ହେବା ଆଶଙ୍କା ରହିଛି। କାମ କରୁଥିବା ସଂସ୍ଥା ଖାମଖିଆଲ ଭାବରେ ଏଭଳି ଖନନ କରି ପାଇପ ବିଛାଉଥିବା ବେଳେ ବନ ବିଭାଗ କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବାରୁ ସ୍ଥାନୀୟ ଲୋକେ ଅସନ୍ତୋଷ ବ୍ୟକ୍ତ କରିଛନ୍ତି। ସଦର ରେଞ୍ଜ ଅଧିକାରୀ ଅଜିତ୍ ଦାସ କହିଛନ୍ତି, ସେ ନିଜେ ଯାଇ ଅନୁଧ୍ୟାନ କରିବେ। ବନ୍ୟପ୍ରାଣୀଙ୍କ ସୁରକ୍ଷା ପାଇଁ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
