ପୁରୁଷୋତ୍ତମପୁର,୧୮ା୭(ସିମାଞ୍ଚଳ ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ତହସିଲ କାର୍ଯ୍ୟାଳୟରେ ଦୀର୍ଘଦିନ ଧରି ଲାଗି ରହିଥିବା ବ୍ୟାପକ ଅବ୍ୟବସ୍ଥାକୁ ନେଇ ଗୁରୁବାର ଶାସକ ଭାରତୀୟ ଜନତା ପାର୍ଟି ସ୍ବର ଉତ୍ତୋଳନ କରିଛନ୍ତି। ଲୋକମାନେ ତହସିଲରେ ଅସୁବିଧାର ସମ୍ମୁଖୀନ ହେଉଥିବା ନେଇ ଭାଜପାର ପ୍ରତିନିଧିମାନେ ତହସିଲ କାର୍ଯ୍ୟାଳୟକୁ ଆସିଥିବା ବେଳେ ତହସିଲଦାରଙ୍କ ସମେତ ବହୁ କର୍ମଚାରୀ ଅନୁପସ୍ଥିତ ଥିବାର ଦେଖି କ୍ଷୋଭ ପ୍ରକାଶ କରିଥିଲେ। ସେମାନେ ଅଭିଯୋଗ କରିଛନ୍ତି ଯେ, ଜନସାଧାରଣ ଓ ଛାତ୍ରୀଛାତ୍ରଙ୍କୁ ବାସିନ୍ଦା, ଜାତିଗତ ଓ ଆୟ ପ୍ରମାଣପତ୍ର ସାଙ୍ଗକୁ ଜମିଜମା, ଘରବାଡ଼ି ଓ ଗ୍ରାମକଣ୍ଠ ପଟ୍ଟା ଆଦି ମୌଳିକ ସୁବିଧା ଠିକ୍ ସମୟରେ ମିଳୁ ନ ଥିବାରୁ ଲୋକେ ଦୂରଦୂରାନ୍ତରୁ ଆସି ତହସିଲ କାର୍ଯ୍ୟାଳୟରେ ପଡ଼ି ରହି ନାହିଁ ନ ଥିବା ଅସୁବିଧାର ସମ୍ମୁଖୀନ ହେବାରେ ଲାଗିଛନ୍ତି। ଲୋକଙ୍କ ଗୁହାରି ଶୁଣିବା ଲାଗି ତହସିଲଦାରଙ୍କ ଦେଖାମିଳୁନି। ଏପରିକି ତହସିଲଦାର ପ୍ରାୟତଃ କାର୍ଯ୍ୟାଳୟରେ ଅନୁପସ୍ଥିତ ରହୁଛନ୍ତି। ତହସିଲଦାରଙ୍କ ଏଭଳି ଅନୁପସ୍ଥିତିର ସୁଯୋଗ ନେଇ କର୍ମଚାରୀମାନଙ୍କର ମଧ୍ୟ କାର୍ଯ୍ୟାଳୟରେ ଦେଖା ମିଳୁ ନ ଥିବା ବେଳେ ବିଭିନ୍ନ କାର୍ଯ୍ୟରେ ଆସୁଥିବା ଲୋକଙ୍କୁ କର୍ମଚାରୀମାନେ ଅସଦ୍ ବ୍ୟବହାର ପ୍ରଦର୍ଶନ କରୁଥିବା ନେଇ ଭାଜପା କର୍ମୀମାନେ ଅଭିଯୋଗ କରିଛନ୍ତି। ଦୀର୍ଘଦିନଧରି ଏଠାରେ ଖାଲିପଡ଼ିଥିବା ଅତିରିକ୍ତ ତହସିଲଦାର ପଦବୀ ପୂରଣ କରିବା ସହ ପୂର୍ବ ସରକାର ସମୟରେ ଚାଲିଥିବା ମନମୁଖୀ କାର୍ଯ୍ୟର ଢାଞ୍ଚାକୁ ବଦଳାଇ ତହସିଲଦାର ଓ କର୍ମଚାରୀମାନେ ଠିକ୍ ସମୟରେ କାର୍ଯ୍ୟାଳୟକୁ ଆସି ଲୋକଙ୍କୁ ଉତ୍ତମ ବ୍ୟବହାର ପ୍ରଦର୍ଶନ କରିବା ସହ ସେମାନଙ୍କୁ ମୌଳିକ ସେବା ଯୋଗାଇ ଦେବା ଲାଗି ଜିଲାପାଳ ତୁରନ୍ତ ପଦକ୍ଷେପ ନେବା ଲାଗି ଦାବି କରିଛନ୍ତି। ନଚେତ୍ ଆଗାମୀ ଦିନରେ କାର୍ଯ୍ୟାଳୟରେ ଚାବି ପକାଇ ଆନ୍ଦୋଳନ କରାଯିବ ବୋଲି ଚେତାବନୀ ଦେଇଛନ୍ତି।
