ନୂଆଦିଲ୍ଲୀ,୭।୭: ଭାରତ ଏବଂ ଇଂଲଣ୍ଡ ମଧ୍ୟରେ ଦ୍ୱିତୀୟ ଟେଷ୍ଟ ଶେଷ ହୋଇଛି। ଯେଉଁଠାରେ ଟିମ ଇଣ୍ଡିଆ ଆୟୋଜକ ଦଳକୁ ୩୩୬ ରନରେ ପରାସ୍ତ କରିଥିଲା। ଏଜବାଷ୍ଟନରେ ଏହା ଭାରତୀୟ ଦଳର ପ୍ରଥମ ଟେଷ୍ଟ ବିଜୟ। କେତେଜଣ ଖେଳାଳିଙ୍କ ପ୍ରଦର୍ଶନ ବହୁତ ଭଲ ଥିଲା। ଏଥିରେ ଅଧିନାୟକ ଶୁବମନ ଗିଲ, ଦ୍ରୁତ ବୋଲର ମହମ୍ମଦ ସିରାଜ ଏବଂ ଆକାଶ ଦୀପ ସାମିଲ ଅଛନ୍ତି। ବିରାଟ କୋହଲି ଏହି ତିନି ଜଣଙ୍କୁ ବହୁତ ପ୍ରଶଂସା କରିଥିଲେ। ପ୍ରତିବଦଳରେ ସିରାଜ ତାଙ୍କ ପୂର୍ବତନ ଅଧିନାୟକଙ୍କୁ ମଧ୍ୟ ଧନ୍ୟବାଦ ଜଣାଇଥିଲେ।
ପୂର୍ବତନ ଟିମ ଇଣ୍ଡିଆ ଟେଷ୍ଟ କ୍ରିକେଟର ବିରାଟ କୋହଲି ରବିବାର, ୬ ଜୁଲାଇ ଭାରତୀୟ ସମୟ ସକାଳ ୯ଟା ୫୫ରେ ଟୁଇଟ କରିଥିଲେ। ଯେଉଁଥିରେ ସେ ମହମ୍ମଦ ସିରାଜ, ଆକାଶ ଦୀପ ଏବଂ ଶୁବମନ ଗିଲଙ୍କ ପ୍ରଶଂସା କରିଥିଲେ। ସେ ତାଙ୍କ ଅଫିସିଆଲ ଏକ୍ସ ହ୍ୟାଣ୍ଡେଲରେ ଲେଖିଛନ୍ତି,
‘ଏଜବାଷ୍ଟନରେ ଭାରତର ମହାନ ବିଜୟ। ନିର୍ଭୀକ ଭାବରେ ଖେଳିଥିଲେ ଏବଂ ନିରନ୍ତର ଇଂଲଣ୍ଡକୁ ଅସୁବିଧାରେ ପକାଇଥିଲେ। ଶୁବମନ ବ୍ୟାଟିଂ ଏବଂ ଫିଲ୍ଡିରେ ଚମତ୍କାର ପ୍ରଦର୍ଶନ କରିଥିଲେ ଏବଂ ସମସ୍ତେ ପ୍ରଭାବଶାଳୀ ଭାବରେ ଖେଳିଥିଲେ। ସିରାଜ ଏବଂ ଆକାଶ ଏହି ପିଚରେ ଯେଭଳି ବୋଲିଂ କରିଥିଲେ ସେଥିପାଇଁ ଏକ ବିଶେଷ ଉଲ୍ଲେଖ ପାଇବାର ଯୋଗ୍ୟ’।
ବିରାଟ କୋହଲିଙ୍କଠାରୁ ପ୍ରଶଂସା ଶୁଣି ମହମ୍ମଦ ସିରାଜ ଭାବପ୍ରବଣ ହୋଇଗଲେ। ସେ ତାଙ୍କ ଅଫିସିଆଲ ଏକ୍ସ ହ୍ୟାଣ୍ଡେଲରେ ସିନିୟର କ୍ରିକେଟରଙ୍କ ଟୁଇଟ ଶେୟାର କରି ଲେଖିଛନ୍ତି, ‘ଧନ୍ୟବାଦ ଭାଇ’। ସିରାଜ ତାଙ୍କ ବାର୍ତ୍ତାରେ ହାତ ଯୋଡି ଏବଂ ଲୁହଭରା ଆଖିର ଇମୋଜି ମଧ୍ୟ ଯୋଡିଛନ୍ତି। ଯେଉଁଥିରୁ ଅନୁମାନ କରିବା କଷ୍ଟକର ନୁହେଁ ଯେ କୋହଲିଙ୍କ କଥା ତାଙ୍କ ହୃଦୟକୁ ଛୁଇଁଥିଲା।
