ଗାଜିଆବାଦ୍,୨୯।୫: କରୋନା ମହାମାରୀ ସଂକ୍ରମଣକୁ ଦୃଷ୍ଟିରେ ରଖି ସୁପ୍ରିମ୍କୋର୍ଟଙ୍କ ପକ୍ଷରୁ ଜେଲ୍ରେ ଭିଡ଼ କମ୍ କରିବା ଲାଗି କଏଦୀଙ୍କୁ ପାରୋଲ୍ରେ ପଠାଇବା ଲାଗି ନିର୍ଦ୍ଦେଶ ଜାରି ହୋଇଛି। ସାଧାରଣତଃ ଘରକୁ ଯିବାକୁ କଏଦୀ ଚାହିଁଥାନ୍ତି। ମାତ୍ର ଉତ୍ତରପ୍ରଦେଶ ଗାଜିଆବାଦ୍ର ଡାସନା ସ୍ଥିତ ଜିଲା ଜେଲ୍ର ୪ ଜଣ କଏଦୀ ଘରକୁ ପାରୋଲରେ ନ ଯିବାକୁ ଅଧିକାରୀଙ୍କୁ ଅନୁରୋଧ କରିଛନ୍ତି। ସେମାନେ ୭ ବର୍ଷ ଜେଲଦଣ୍ଡ ଭୋଗୁଛନ୍ତି। ଜେଲ୍ ଭିତରେ ଆବଶ୍ୟକ ସୁରକ୍ଷା ପଦକ୍ଷେପ ଗ୍ରହଣ କରାଯାଉଛି। ଯୋଗ ଶିକ୍ଷା ସହିତ ଗରମ ପାଣି ବାଷ୍ପ, ଆବଶ୍ୟକ ଚିକିତ୍ସା ମଧ୍ୟ କରାଯାଉଛି। ମାତ୍ର ବାହାରେ ଏସବୁ ମିଳିବନି ବୋଲି ସେମାନେ କହିଛନ୍ତି। ଜେଲ୍ରେ ନୁହେଁ ବାହାରେ ବିପଦ ଥିବା ସେମାନେ କହିଛନ୍ତି। ତେଣୁ ସେମାନେ ଅଧିକାରୀଙ୍କୁ କହିଛନ୍ତି ଯେ, ସାର୍ ଆମକୁ ପାରୋଲରେ ଘରକୁ ପଠାନ୍ତୁନି। ଏହା ସହିତ ଜେଲ୍ ପକ୍ଷରୁ ପ୍ରଦାନ କରାଯାଇଥିବା ୬୦ ଦିନିଆ ପାରୋଲକୁ ସେମାନେ ମନା କରିଛନ୍ତି। ସେମାନଙ୍କ ଅନୁରୋଧକୁ ଜେଲ୍ ଅଧିକାରୀ ଗ୍ରହଣ କରିନେଇଛନ୍ତି। କଏଦୀଙ୍କ ଏଭଳି ମତ ନେଇ ଡିଜି ଆନନ୍ଦ କୁମାର ଡାସନା ଜେଲ କର୍ତ୍ତୃପକ୍ଷଙ୍କୁ ପ୍ରଶଂସା କରିଛନ୍ତି।
