ନୂଆଦିଲ୍ଲୀ,୨୮ା୭: ଅପରେଶନ ସିନ୍ଦୂର ଉପରେ ବିଜର୍କ ଦାବିକରି ବିରୋଧୀ ହଟ୍ଟଗୋଳ କରିବାରୁ ସଂସଦ ମୌସୁମୀ ଅଧିବେଶନର ପ୍ରଥମ ସପ୍ତାହ ବେକାର ଯାଇଥିବାବେଳେ ସୋମବାରଠାରୁ ଲୋକ ସଭାରେ ଏ ସମ୍ପର୍କିତ ଆଲୋଚନା ଆରମ୍ଭ ହେବ। ଏହାକୁ ଦୃଷ୍ଟିରେ ରଖି ବିରୋଧୀ କଂଗ୍ରେସ ଗୃହରେ ନିଜ ଏମ୍ପିମାନଙ୍କ ଉପସ୍ଥିତି ସୁନିଶ୍ଚିତ କରିବା ଲାଗି ୩ ଦିନିଆ ହୁଇପ୍ ଜାରି କରିଛି।
ସୂତ୍ରରୁ ଜଣାପଡ଼ିଛି ଯେ, ସୋମବାର ଲୋକ ସଭାରେ ବିତର୍କର ପ୍ରଥମ ଦିନ ଗୃହର ବିରୋଧୀ ଦଳ ଉପନେତା ଗୌରବ ଗୋଗୋଇ ବିପକ୍ଷ ଦଳଗୁଡ଼ିକ ପକ୍ଷରୁ ଅଭିଯୋଗ ଆଗତ କରିବେ। ଭାଜପା ନେତୃତ୍ୱାଧୀନ ଏନ୍ଡିଏ ଏବଂ ବିରୋଧୀ ଇଣ୍ଡିଆ ବ୍ଲକ୍ ଜାତୀୟ ସୁରକ୍ଷା ଓ ବହିର୍ବ୍ୟାପାର ନୀତିର ବିଫଳତା ପ୍ରସଙ୍ଗରେ ମୁହଁାମୁହିଁ ହେବେ। ଲୋକ ସଭା ଓ ରାଜ୍ୟ ସଭାରେ ଉଭୟ ପକ୍ଷ ବିତର୍କ ବେଳେ ବରିଷ୍ଠ ନେତାମାନଙ୍କୁ ଭାଗ ନେବା ପାଇଁ ସୁଯୋଗ ଦେବେ। ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହା, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଓ ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ଅପରେଶନ ସିନ୍ଦୂର ସମ୍ପର୍କରେ ଗୃହକୁ ଅବଗତ କରାଇବେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆତଙ୍କବାଦ ବିରୋଧରେ ସରକାରଙ୍କ କଡ଼ା ଆଭିମୁଖ୍ୟ ଉପରେ ଜଣାଇବା ସକାଶେ ମଝିରେ କିଛି ବକ୍ତବ୍ୟ ରଖିପାରନ୍ତି ବୋଲି ସୂତ୍ରରୁ ଜଣାପଡ଼ିଛି। ଉଭୟ ଗୃହରେ ୧୬ ଘଣ୍ଟା ଧରି ଅପରେଶନ ସିନ୍ଦୂର ଉପରେ ମାରାଥନ ବିତର୍କ ଚାଲିବା ନେଇ ଏହା ପୂର୍ବରୁ ଶାସକ ଓ ବିରୋଧ ପକ୍ଷ ସହମତି ପ୍ରକାଶ କରିସାରିଛନ୍ତି।
