ପଦ୍ମପୁର,୧୩ା୮(ପ୍ରଦୀପ୍ତ ଦାଶ): ଧାନବିକ୍ରି କରିବାକୁ ଚାଷୀ ପଞ୍ଜୀକରଣ ଆରମ୍ଭ ହୋଇଛି। ପଞ୍ଜୀକରଣ ପାଇଁ କରାଯାଇଥିବା ନୂଆ ବ୍ୟବସ୍ଥା ଯୋଗୁ ଚାଷୀମାନେ ଚାଷ ବିଲରୁ କାମ ଛାଡ଼ି ସମବାୟ ସମିତିକୁ ଦୌଡୁଛନ୍ତି । ଦୀର୍ଘବର୍ଷ ଧରି ବନ୍ଦୋବସ୍ତ ହୋଇ ନ ଥିବାରୁ ଶତକଡ଼ା ୮୦ ଭାଗ ଚାଷୀଙ୍କ ଜମି ସେମାନଙ୍କ ଜେଜେ, ତାଙ୍କ ବାପା କିମ୍ବା ଭାଇମାନଙ୍କ ନାମ ସହ ମିଳିତ ରେକର୍ଡ ରହିଛି। ଚାଷୀଙ୍କ ସଂଖ୍ୟା ବଢ଼ିଛି କିନ୍ତୁ ପଞ୍ଜୀକରଣରେ ବ୍ୟାପକ କଟକଣା କରାଯାଇ ଚାଷୀମାନେ ଯେପରି ସରଳ ଉପାୟରେ ଧାନ ବିକ୍ରି କରି ନ ପାରିବେ ସେଥିପାଇଁ ସରକାର ସମସ୍ତ ପଦକ୍ଷେପ ଅବଲମ୍ବନ କରୁଛନ୍ତି ବୋଲି ରାଜବୋଡ଼ା ସମ୍ବର କୃଷକ ସଂଗଠନ ପଦ୍ମପୁର ତରଫରୁ ଅଭିଯୋଗ କରାଯାଇଛି। ଯାହାଫଳରେ ଉତ୍ପାଦିତ ଧାନକୁ ବେସରକାରୀ ସଂସ୍ଥାମାନେ କମ୍ ଦରରେ କିଣିବାର ପଥକୁ ପରିଷ୍କାର କରାଯାଉଛି। ଏଭଳି ଘଡ଼ିସନ୍ଧି ମୁହୂର୍ତ୍ତରେ ସଂଗଠନ ସଭାପତି ବାଞ୍ଛାନିଧି ନାୟକଙ୍କ ସଭାପତିତ୍ୱରେ ସକାଳ ୧୧ ଟାରୁ ପଦ୍ମପୁର ଉପଜିଲାପାଳ ଅଫିସ ସମ୍ମୁଖରେ ରାଜବୋଡ଼ାସମ୍ବର କୃଷକ ସଂଗଠନର ବିକ୍ଷୋଭ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଚାଷୀଙ୍କ ସହ ପଦ୍ମପୁର ଉପଜିଲାପାଳ ଆଲୋଚନା କରି ଆବଶ୍ୟକ କାଗଜାତ ଦେଇ ପଞ୍ଜୀକରଣ କରିବାକୁ ଅନୁରୋଧ କରିଥିଲେ ଉପର ମହଲରୁ ନିର୍ଦ୍ଦେଶ ହେଲେ ଚାଷୀଙ୍କୁ ଅବଗତ କରେଇବେ ଯାହା ଚାଷୀଙ୍କୁ ସନ୍ତୁଷ୍ଟ କରିପାରିନାହିଁ। ବିଗତ ବର୍ଷ ଭଳି କେବଳ ସ୍ବ ଘୋଷଣା ନାମାରେ ପଞ୍ଜୀକରଣ ଆବେଦନ ଗ୍ରହଣ, ଓ ସ୍ବଳ୍ପ ସଂଖ୍ୟକ ଚାଷୀ ପଞ୍ଜୀକୃତ ହୋଇପାରିଥିବା ବେଳେ ପଞ୍ଜୀକରଣ ଅବଧି ବୃଦ୍ଧି କରିବାକୁ ସଂଗଠନ ଦାବି କରିଛି। ଏହି କାର୍ଯ୍ୟକ୍ରମରେ ସଭାପତି ବାଞ୍ଛାନିଧି ନାୟକ, ଆବାହକ ଅଶୋକ ସାହୁ, ଆଇନ ପରାମର୍ଶଦାତା ଅଜିତ ଶତପଥୀ, ସଂଯୁକ୍ତ କୃଷକ ସଂଗଠନ ଉପଦେଷ୍ଟା ରମେଶ ମହାପାତ୍ର, ଅରବିନ୍ଦ ପଣ୍ଡା, ପଞ୍ଚାନନ ସାହୁ, ଆମୋଦ ପଟେଲ, ନିରାକାର ସାହୁ, ଟୁନା ପ୍ରଧାନ, ଦହିତ ସାହୁ, ସୁବାସ ଭୋଇ ସମେତ ଶତାଧିକ ଚାଷୀ ଉପସ୍ଥିତ ଥିଲେ। ସଂଗଠନ ସଭାପତିଙ୍କ ଆଦେଶକ୍ରମେ ଲିଙ୍ଗରାଜ ପ୍ରଧାନ ବୈଠକ ସଂଯୋଜନା କରିଥିଲେ।
