ନୂଆଦିଲ୍ଲୀ,୨୪।୮: ମୋବାଇଲ ସିମ କାର୍ଡ ନେବା, ବଦଳାଇବା, ଟ୍ରାନ୍ସଫର କରିବା କିମ୍ବା ବନ୍ଦ କରିବାର ନିୟମ ଏବେ ଆହୁରି କଡ଼ା ହୋଇଛି। ନକଲି ସିମ କାର୍ଡ ଓ ସାଇବର ଠକେଇ ରୋକିବା ପାଇଁ ସରକାର ନୂଆ ବ୍ୟବସ୍ଥା ଲାଗୁ କରିଛନ୍ତି। ଏଣିକି ସିମ ସମ୍ପର୍କିତ ଅନେକ କାମ ପାଇଁ ବାୟୋମେଟ୍ରିକ ପରିଚୟ ଯାଞ୍ଚ ଆବଶ୍ୟକ ହେବ। ଏଥିରେ ଆଙ୍ଗୁଠି ଛାପ କିମ୍ବା ମୁହଁ ଚିହ୍ନଟ ଭଳି ବ୍ୟବସ୍ଥା ସାମିଲ ରହିବ।
ନୂଆ ନିୟମରେ ସବୁଠାରୁ ବଡ଼ ପରିବର୍ତ୍ତନ ସିମ କାର୍ଡ ସଂଖ୍ୟାକୁ ନେଇ ହୋଇଛି। ଏଣିକି ଜଣେ ବ୍ୟକ୍ତି ନିଜ ନାମରେ ସର୍ବାଧିକ ୯ଟି ସିମ କାର୍ଡ ରଖିପାରିବେ। ଏହି ସୀମା ସମସ୍ତ ଟେଲିକମ କମ୍ପାନୀକୁ ମିଶାଇ ଲାଗୁ ହେବ। ଅର୍ଥାତ୍ ଆପଣଙ୍କ ନାମରେ ଭିନ୍ନ ଭିନ୍ନ କମ୍ପାନୀର ସିମ କାର୍ଡ ଥିଲେ ମଧ୍ୟ, ସମସ୍ତକୁ ମିଶାଇ ସଂଖ୍ୟା ୯ରୁ ଅଧିକ ହୋଇପାରିବ ନାହିଁ। ତେବେ ଜମ୍ମୁ-କଶ୍ମୀର, ଆସାମ ଓ ଉତ୍ତର-ପୂର୍ବ ରାଜ୍ୟଗୁଡ଼ିକରେ ଏହି ସୀମା ଆହୁରି କମ ରହିଛି। ଏଠାରେ ଜଣେ ବ୍ୟକ୍ତି ନିଜ ନାମରେ ସର୍ବାଧିକ ୬ଟି ସିମ ରଖିପାରିବେ। ଏହାଠାରୁ ଅଧିକ ସିମ ଜଣେ ବ୍ୟକ୍ତିଙ୍କ ନାମରେ ଜାରି କରାଯିବ ନାହିଁ। ଯଦି ଆପଣଙ୍କ ନାମରେ ଆବଶ୍ୟକତାଠାରୁ ଅଧିକ ସିମ ରହିଛି, ତେବେ ଅନାବଶ୍ୟକ ସିମ ବନ୍ଦ କରିଦେବା ଭଲ।
ଏଣିକି ନୂଆ ସିମ କାର୍ଡ ନେବା ପ୍ରକ୍ରିୟା ପୂର୍ବାପେକ୍ଷା ଅଧିକ ସୁରକ୍ଷିତ ଓ ଯାଞ୍ଚଭିତ୍ତିକ ହେବ। ଗ୍ରାହକଙ୍କ ପରିଚୟର ବାୟୋମେଟ୍ରିକ ଭେରିଫିକେସନ କରାଯିବ। ଆଧାର ସହ ଲିଙ୍କ ଥିବା ଗ୍ରାହକଙ୍କ ପାଇଁ ଇ-କେୱାଇସି ସୁବିଧା ରହିବ। କିଛି କ୍ଷେତ୍ରରେ ଡି-କେୱାଇସି ପ୍ରକ୍ରିୟା ମଧ୍ୟ ଲାଗୁ ହୋଇପାରେ।
ସିମ ନେବା ସମୟରେ ଗ୍ରାହକଙ୍କ ଲାଇଭ ଫଟୋ ନିଆଯିବ। ଏହା ସହ ଦିଆଯାଇଥିବା ଦସ୍ତାବିଜଗୁଡ଼ିକର ଇଲେକ୍ଟ୍ରୋନିକ ଯାଞ୍ଚ କରାଯିବ। ଏହା ଦ୍ୱାରା ସିମ ନେଉଥିବା ବ୍ୟକ୍ତି ପ୍ରକୃତରେ ସେହି ବ୍ୟକ୍ତି କି ନାହିଁ, କିମ୍ବା ଅନ୍ୟ କାହାର ପରିଚୟ ବ୍ୟବହାର କରାଯାଉଛି କି ନାହିଁ, ତାହା ଯାଞ୍ଚ କରିବା ସହଜ ହେବ।
ନକଲି ଦସ୍ତାବିଜ ବ୍ୟବହାର କରି ସିମ ନେଉଥିବା ଲୋକଙ୍କ ବିରୋଧରେ ମଧ୍ୟ କଡ଼ା ପଦକ୍ଷେପ ନିଆଯିବ। ଯାଞ୍ଚ ସମୟରେ ଦସ୍ତାବିଜ ନକଲି ବୋଲି ଜଣାପଡ଼ିଲେ, ଟେଲିକମ କମ୍ପାନୀ ପୋଲିସକୁ ସୂଚନା ଦେଇପାରିବ। ଏହା ପରେ FIR ରୁଜୁ କରିବାର ପ୍ରକ୍ରିୟା ମଧ୍ୟ ଆରମ୍ଭ ହୋଇପାରେ।
ନୂଆ ବ୍ୟବସ୍ଥାର ମୁଖ୍ୟ ଉଦ୍ଦେଶ୍ୟ ନକଲି ସିମ କାର୍ଡ ବ୍ୟବହାର ରୋକିବା ସହ ସାଇବର ଅପରାଧ ଓ ଠକେଇ ଉପରେ ନିୟନ୍ତ୍ରଣ ଆଣିବା।
