ଓ୍ବାଶିଂଟନ,୨୨ା୩: ଭାରତରେ ମାନବାଧିକାର ସ୍ଥିତି ଅତ୍ୟନ୍ତ ଖରାପ ହୋଇଯାଇଛି। ଦେଶରେ ଧର୍ମୀୟ ସଂଖ୍ୟାଲଘୁ, ବିରୋଧୀ ଓ ଖବରଦାତାମାନଙ୍କୁ ଟାର୍ଗେଟ କରାଯାଉଛି ବୋଲି ଆମେରିକା ପରରାଷ୍ଟ୍ର ବିଭାଗ ପକ୍ଷରୁ ସୋମବାର ଜାରି କରାଯାଇଥିବା ବାର୍ଷିକ ରିପୋର୍ଟରେ ଦର୍ଶାଯାଇଛି। ବିଭାଗୀୟ ମୁଖ୍ୟ ଆଣ୍ଟୋନି ବ୍ଲିଙ୍କେନ୍ଙ୍କ ୨୦୨୨ କଣ୍ଟ୍ରି ରିପୋଟର୍ସ ଅନ୍ ହ୍ୟୁମାନ୍ ରାଇଟ୍ସ ପ୍ରାକ୍ଟିସେସ୍ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭାରତୀୟ ଜନତା ପାର୍ଟି (ଭାଜପା) ନେତୃତ୍ୱାଧୀନ ହିନ୍ଦୁ ଜାତୀୟତାବାଦୀ ସରକାର ଅମଳରେ ହେଉଥିବା ବହୁ ମାନବାଧିକାର ହନନକୁ ଅନ୍ତର୍ଭୁକ୍ତ କରାଯାଇଛି। ଉକ୍ତ ରିପୋର୍ଟକୁ ଇଣ୍ଡିଆନ୍ ଆମେରିକାନ୍ ମୁସଲିମ୍ କାଉନ୍ସିଲ (ଏଆଇଏମ୍ସି) ସ୍ବାଗତ କରିଛି।
ଭାରତରେ ପ୍ରବଳ ମାତ୍ରାରେ ମାନବାଧିକାର ଉଲ୍ଲଂଘନ ହେଉଥିବା ଏବଂ ସେସବୁକୁ ଓ୍ବାଶିଂଟନ ଅନୁଧ୍ୟାନ କରୁଥିବା ବିଷୟ ଆମେରିକା ପରରାଷ୍ଟ୍ର ସଚିବ ଆଣ୍ଟୋନି ବ୍ଲିଙ୍କେନ୍ କହିବାର ବର୍ଷକ ପରେ ଏହି ରିପୋର୍ଟ ପ୍ରକାଶ ପାଇଛି। ଉକ୍ତ ବିସ୍ତୃତ ତଥା ବିଶ୍ଳେଷଣାମତ୍କ ରିପୋର୍ଟରେ ଦର୍ଶାଯାଇଛି ଯେ, ଭାରତରେ ମୁସଲମାନ, ଖ୍ରୀଷ୍ଟିଆନ୍ ଓ ଅନ୍ୟ ଧର୍ମୀୟ ସଂଖ୍ୟାଲଘୁମାନଙ୍କ ଉପରେ ହିଂସ୍ର ଆକ୍ରମଣର ଅସଂଖ୍ୟ ଉଦାହରଣ ରହିଛି। ମୁସଲମାନମାନଙ୍କ ଘରଗୁଡ଼ିକୁ ସରକାରଙ୍କ ନେତୃତ୍ୱରେ ଭଙ୍ଗାଯାଉଛି। ବିଦ୍ୱେଷପୂର୍ଣ୍ଣ ଆଇନ ବଳରେ ମୁସଲମାନମାନଙ୍କୁ ଟାର୍ଗେଟ କରାଯାଉଛି। କେନ୍ଦ୍ର ସରକାର ଓ ତାଙ୍କ ଏଜେଣ୍ଟମାନେ ନ୍ୟାୟ ବହିର୍ଭୂତ ହତ୍ୟା କରାଇବା ସହ ନିର୍ଯାତନା ଦେଉଛନ୍ତି। ଥାନା ଓ ଜେଲଗୁଡ଼ିକରେ ପୋଲିସ ତଥା କାରାଗାର ଅଧିକାରୀମାନେ ରାଜନୈତିକ ବନ୍ଦୀ ଓ ଅଟକମାନଙ୍କ ସହ ଅମାନବୀୟ ତଥା ଅପମାନଜନକ ବ୍ୟବହାର କରୁଛନ୍ତି। ଖବରଦାତାମାନଙ୍କୁ ଅକାରଣେ ଗିରଫ କରି କୋର୍ଟ ଚାଲାଣ କରାଯାଉଛି। ଗଣମାଧ୍ୟମ ଉପରେ କଟକଣା ଲଗାଯାଉଛି। ଏଭଳି ମୁସଲମାନ ବିରୋଧୀ କାର୍ଯ୍ୟ ବଢ଼ିଚାଲିବା ଏକଚ୍ଛତ୍ରବାଦୀ ଶାସନର ସଙ୍କେତ। କେନ୍ଦ୍ର ସରକାର ମାନବାଧିକାର କର୍ମୀ ଓ ଖବରଦାତାମାନଙ୍କୁ ଗିରଫ କରିବା ପାଇଁ ଅନେକ ସମୟରେ ବେଆଇନ କାର୍ଯ୍ୟକଳାପ ନିବାରଣ ଆଇନ (ୟୁଏପିଏ)ର ଦୁରୁପଯୋଗ କରୁଥିବାରୁ ସିଭିଲ୍ ସୋସାଇଟି ଅର୍ଗାନାଇଜେଶନ୍ଗୁଡ଼ିକ ଚିନ୍ତାବ୍ୟକ୍ତ କରୁଥିବା ଉକ୍ତ ରିପୋର୍ଟରେ ଉଲ୍ଲେଖ କରାଯାଇଛି।
ନରହତ୍ୟା ସମ୍ପର୍କିତ ଧର୍ମୀୟ ହିଂସାର ଅସଂଖ୍ୟ ଦୃଷ୍ଟାନ୍ତ ରହିଥିବା ଉକ୍ତ ରିପୋର୍ଟରେ ଆହୁରି କୁହାଯାଇଛି ଯେ, ୨୦୧୬ରୁ ୨୦୨୧ ମଧ୍ୟରେ ଗୋହତ୍ୟା, ଗୋମାଂସ ବିକିବା ଓ ଖାଇବା, ଧର୍ମୀୟ ଘୃଣା ଆଦି ସନ୍ଦେହରେ ୩୦ରୁ ଊର୍ଦ୍ଧ୍ୱ ଆଦିବାସୀ ଖ୍ରୀଷ୍ଟିଆନ୍ ଓ ମୁସଲମାନଙ୍କୁ ହତ୍ୟା କରାଯାଇଛି ନଚେତ ଭିଡ଼ହିଂସାରେ ପିଟି ପିଟି ଲହୁଲୁହାଣ କରାଯାଇଛି। ରିପୋର୍ଟରେ ମଧ୍ୟପ୍ରଦେଶର ମୁସଲିମ୍ ଚାଷୀ ନାଜିର ଅହମଦଙ୍କୁ ଅଗଷ୍ଟ ୨ରେ ଗୋରୁ ଚାଲାଣ ଅଭିଯୋଗରେ ପିଟି ହତ୍ୟା କରାଯାଇଥିବା ବିଷୟ ମଧ୍ୟ ଉଲ୍ଲେଖ କରାଯାଇଛି। ଏନେଇ ଆଇଏଏମ୍ସି ଏକ୍ଜିକ୍ୟୁଟିଭ୍ ଡାଇରେକ୍ଟର ରଶିଦ୍ ଅହମଦ କହିଛନ୍ତି, ବ୍ଲିଙ୍କେନ୍ଙ୍କ ରିପୋର୍ଟକୁ ଆମେ ପ୍ରଶଂସା କରୁଛୁ। ଭାରତରେ ପ୍ରବଳ ମାନବାଧିକାର ଉଲ୍ଲଂଘନ ହେଉଥିବାରୁ ଏହାକୁ ‘କଣ୍ଟ୍ରି ଅଫ୍ ପର୍ଟିକୁଲାର କନ୍ସର୍ନ’ ଭାବେ ତୁରନ୍ତ ଆଖ୍ୟା ଦିଆଯାଉ।
