ଭୁବନେଶ୍ୱର,୧୬।୧୨ (ଅଭୟ ଦାଶ): ଦେଶର ଅର୍ଥ ବ୍ୟବସ୍ଥାକୁ ସୁଦୃଢ଼ କରିବା ପାଇଁ ସରକାର ନୂଆ ନିୟମ ଓ ଯୋଜନା କାର୍ଯ୍ୟକାରୀ କରିଛନ୍ତି। ଏହା ଫଳରେ ଉଭୟ କେନ୍ଦ୍ର ଓ ରାଜ୍ୟରେ କ୍ରମାଗତ ଭାବେ ଟିକସ ଆଦାୟ ପରିମାଣ ବୃଦ୍ଧି ପାଇଛି ବୋଲି ଆୟକର ବିଭାଗର ମହାନିର୍ଦ୍ଦେଶିକା ସୁନିତା ବୈଂଶଲା କହିଛନ୍ତି।
ଉଲ୍ଲେଖଯୋଗ୍ୟ, ଓଡ଼ିଶା ଆୟକର ବିଭାଗର ଇଣ୍ଟେଲିଜେନ୍ସ ଆଣ୍ଡ କ୍ରିମିନାଲ ଇନ୍ଭେଷ୍ଟିଗେଶନ ଡାଇରେକ୍ଟୋରେଟ୍ ପକ୍ଷରୁ ଆୟୋଜିତ ସଚେତନତା କର୍ମଶାଳାରେ ସମ୍ମାନିତ ଅତିଥି ଭାବେ ଯୋଗଦେଇ ସୁନିତା କେନ୍ଦ୍ର ସରକାରଙ୍କ ଇ-ଭେରିଫିକେଶନ ସ୍କିମ୍-୨୦୨୧ ସମ୍ପର୍କରେ ବିସ୍ତୃତ ଆଲୋଚନା କରିଥିଲେ। ସେହିଭଳି ୨୦୨୧ ଡିସେମ୍ବର ୧୩ରୁ ଇ-ଭେରିଫିକେଶନ ସ୍କିମ୍ ଆରମ୍ଭ ହୋଇଥିଲା। ଏହି ସ୍କିମ୍ ଆରମ୍ଭ ହେବା ପରେ ଟିକସଦାତାମାନେ ବିଭାଗୀୟ ନିୟମ ପାଳନ ସହ ଟିକସ ଆଦାୟରେ ମଧ୍ୟ ଉଲ୍ଲେଖନୀୟ ଅଭିବୃଦ୍ଧି ହୋଇଛି ବୋଲି ବିଭାଗ ପକ୍ଷରୁ ଆକଳନ କରାଯାଇଛି। ଏଥିସହ ଟିକସ ସମ୍ପର୍କିତ ବିବାଦ ସଂଖ୍ୟା ମଧ୍ୟ ବହୁ ପରିମାଣରେ ହ୍ରାସ ପାଇଛି ବୋଲି ସୁନିତା ମତପ୍ରକାଶ କରିଥିଲେ। ସେହିପରି ଇ- ଭେରିଫିକେଶନ ସ୍କିମ୍ ପ୍ରଭାବରେ ମଧ୍ୟ ଟିକସଦାତାଙ୍କ ସଂଖ୍ୟା ବୃଦ୍ଧି ପାଇଛି। ଆଗାମୀ ଦିନରେ ମଧ୍ୟ ଏହି ସଂଖ୍ୟା ଆହୁରି ବଢ଼ିବ ବୋଲି ସେ ଆଶପ୍ରକଟ କରିଛନ୍ତି। ଅପରପକ୍ଷରେ ଏହି ସଚେତନତା କର୍ମଶାଳାରେ ସାମିଲ ହୋଇଥିବା ଚାର୍ଟାର୍ଡ ଆକାଉଣ୍ଟାଣ୍ଟ, ବିତ୍ତୀୟ ଅଧିକାରୀ ଏବଂ ଆଇନଜୀବୀମାନଙ୍କୁ ସେ ସମ୍ବୋଧିତ କରିଥିଲେ। ଏପରିକି ଟିକସଦାତାଙ୍କ ଠିକ୍ ତଥ୍ୟ ପ୍ରଦାନ କରିବାକୁ ସୁନିତା ଆହ୍ବାନ ଦେଇଛନ୍ତି। ବିଶେଷକରି ରିପୋର୍ଟିଂ ସଂସ୍ଥାଗୁଡିକ ଆୟକର ବିଭାଗ ଓ ଟିକସଦାତାଙ୍କ ମଧ୍ୟରେ ଯୋଗସୂତ୍ର ରକ୍ଷା ସହ ସେତୁ ଭଳି କାର୍ଯ୍ୟ କରିଥାନ୍ତି। ରିପୋର୍ଟିଂ ସଂସ୍ଥାଗୁଡ଼ିକ ଆର୍ଥିକ ନେଣଦେଣରେ ଠିକ୍ ତଥ୍ୟ ପ୍ରଦାନ କରିବା ଏବଂ ଆୟକରଦାତାଙ୍କ ତଥ୍ୟକୁ ନିଜ ଆୟକର ରିଟର୍ନରେ ଠିକ୍ ଭାବେ ପ୍ରଦାନ କରିବା ଦ୍ୱାରା ଦେଶରେ ଆୟକରଦାତା ଓ ଟିକସ ସଂଗ୍ରହ ବୃଦ୍ଧି ପାଇବାରେ ବେଶ୍ ସହାୟକ ହୋଇଛି ବୋଲି ସୁନିତା କହିଛନ୍ତି। ପରିଶେଷରେ ଓଡ଼ିଶାର ପ୍ରଧାନ ମୁଖ୍ୟ ଆୟକର ଆୟୁକ୍ତ ରାହୁଲ କର୍ନା କେନ୍ଦ୍ର ସରକାରଙ୍କ ଇ-ଭେରିଫିକେଶନ ସ୍କିମ୍ ୨୦୨୧ ଏବଂ ବିତ୍ତୀୟ ନେଣଦେଣ ସମ୍ପର୍କିତ ବିବରଣୀ ଦାଖଲ ସମ୍ପର୍କରେ ବିସ୍ତୃତ ଆଲୋଚନା କରିଥିଲେ। ଏହି ଅବସରରେ ବହୁ ବରିଷ୍ଠ ଆୟକାର ଅଧିକାରୀ ଓ କର୍ମଚାରୀଙ୍କ ସମେତ ଅନ୍ୟମାନେ ଉପସ୍ଥିତ ଥିଲେ।
