ଭୁବନେଶ୍ୱର,(ଅଭିଜିତ ଦାସ)/ପଟ୍ଟାଙ୍ଗି, ୫।୭(ଶରତ ଧଳ): ବର୍ଷା ଋତୁ ଆରମ୍ଭରୁ ରାଜ୍ୟରେ ଜଳବାହିତ ରୋଗ ବ୍ୟାପିଲାଣି। ଡେଙ୍ଗୁ ପରେ ଏବେ ଝାଡାବାନ୍ତି, କାମଳ(ହେପାଟାଇଟିସ୍-ଏ ଓ ଇ) ରୋଗରେ ଅନେକେ ଆକ୍ରାନ୍ତ ହୋଇଥିବାବେଳେ କେତେଜଣ ରୋଗୀଙ୍କ ଜୀବନ ଗଲାଣି। କୋରାପୁଟ ଜିଲା ପଟାଙ୍ଗି ବ୍ଲକ୍ରେ ଝାଡ଼ାବାନ୍ତିରେ ୩ଜଣଙ୍କ ମୃତ୍ୟୁ ଘଟିବା ପରେ ସ୍ବାସ୍ଥ୍ୟ ବିଭାଗର ଚିନ୍ତା ବଢ଼ିଛି। ସ୍ଥିତିର ସମୀକ୍ଷା କରାଯିବା ସହ ସଂକ୍ରମଣ ନିୟନ୍ତ୍ରଣ ଲାଗି ପଦକ୍ଷେପ ଆରମ୍ଭ ହୋଇଛି। ବର୍ଷା ପୂର୍ବରୁ ରାଜ୍ୟର ସମସ୍ତ ଅଞ୍ଚଳରେ ଜଳ ଉତ୍ସଗୁଡିକୁ ବିଶୋଧନ କରିବାକୁ କୁହାଯାଇଥିବାବେଳେ ୧୦ ତାରିଖରୁ ପ୍ରତି ପଞ୍ଚାୟତରେ ଇଣ୍ଟିଗ୍ରେଟେଡ୍ କ୍ୟାମ୍ପେନ ଆରମ୍ଭ କରିବାକୁ ସ୍ବାସ୍ଥ୍ୟ ବିଭାଗ ନିର୍ଦ୍ଦେଶ ଦେଇଛି।
ମୌସୁମୀ ପୂର୍ବରୁ ଜଳବାହିତ ରୋଗ ସମ୍ଭାବନା ଏଡାଇବାକୁ ସ୍ବାସ୍ଥ୍ୟ ବିଭାଗ ଏବଂ ପଞ୍ଚାୟତିରାଜ ଓ ପାନୀୟ ଜଳ ବିଭାଗ ମଧ୍ୟରେ ସମନ୍ବୟ ରଖି କାର୍ଯ୍ୟ କରାଯାଉଥିବା ରାଜ୍ୟ ସରକାର କହୁଛନ୍ତି। ୨୦୨୦-୨୧ରେ ୨୦୯ଟି କେସ୍ ବାହରିଥିବା ବେଳେ ୧୧ ଝାଡାବାନ୍ତି ରୋଗୀ ଚିହ୍ନଟ ହୋଇଥିଲେ। ଏଥିମଧ୍ୟରୁ ୪ ଜଣଙ୍କ ମୃତ୍ୟୁ ହୋଇଥିଲା। ସେହିପରି ୨୦୨୧-୨୨ରେ ୨୦୦୭ଟି କେସ୍ ବାହାରିଥିବା ବେଳେ ୬୯ଜଣ ଝାଡାବାନ୍ତି ରୋଗୀଙ୍କୁ ଚିହ୍ନଟ କରାଯାଇଥିଲା। ସେହିବର୍ଷ ମୃତ୍ୟୁ ସଂଖ୍ୟା ୩୦କୁ ବୃଦ୍ଧି ପାଇଥିଲା। ଉକ୍ତ ବର୍ଷ ରାୟଗଡ଼ା କାଶୀପୁର ଘଟଣା ରାଜ୍ୟରେ ଚର୍ଚ୍ଚାକୁ ଆସିଥିଲା। ଏଠାରେ ୭ଜଣଙ୍କ ମୃତ୍ୟୁ ହୋଇଥିବାବେଳେ ୧୦୪ଜଣ ଆକ୍ରାନ୍ତ ହୋଇଥିଲେ। ତେବେ ଚଳିତବର୍ଷ ଏଯାଏ ୩୧୪ଟି କେସ୍ ବାହାରିଥିବାବେଳେ ୧୦ଜଣ ରୋଗୀଙ୍କୁ ଚିହ୍ନଟ କରାଯାଇଛି। ତେବେ ଏମାନଙ୍କ ମଧ୍ୟରୁ ପଟ୍ଟାଙ୍ଗି ବ୍ଲକ୍ ମେଟାପାଡୁ ଗ୍ରାମରେ ଗତ ୨୫ ତାରିଖରୁ ଝାଡ଼ାବାନ୍ତି ବ୍ୟାପିଛି। ଗ୍ରାମର ଦିଶାରି ପାଖରୁ ଔଷଧ ଖାଇ ୨୮ ଓ ୨୯ ତାରିଖରେ ୬ଜଣ ଗୁରୁତର ହୋଇପଡିଥିଲେ। ୩୦ ତାରିଖରେ ଗୋଲରି ବୁଦ୍ରାୟାଙ୍କ ମୃତ୍ୟୁ ହୋଇଥିଲା। ପରେ ଅନ୍ୟ ୫ଜଣଙ୍କୁ ପଟ୍ଟାଙ୍ଗି ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ଗତ ୨ ତାରିଖରେ ଜାନି ମାଲାମାଙ୍କ ମୃତ୍ୟୁ ଘଟିଥିବାବେଳେ ମଙ୍ଗଳବାର ଗୋଲରି ପେଣ୍ଡାୟାଙ୍କ ମୃତ୍ୟୁ ଘଟିଛି।
ଜନସ୍ବାସ୍ଥ୍ୟ ବିଭାଗ ନିର୍ଦ୍ଦେଶକ ଡା. ନିରଞ୍ଜନ ମିଶ୍ର କହଛନ୍ତି, ଜଳବାହିତ ରୋଗର ସଚେତନତା ଲାଗି ଜୁଲାଇ ୧୦ରୁ ଅଗଷ୍ଟ ୮ ପର୍ଯ୍ୟନ୍ତ ଇଣ୍ଡିଗ୍ରେଟେଡ୍ କ୍ୟାମ୍ପେନ ଆରମ୍ଭ ହେବ। ଡାଇରିଆ, କାମଳ, ମ୍ୟାଲେରିଆ ରୋଗ ପାଇଁ ବିଭିନ୍ନ ଜିଲାରେ ଥିବା ସିଏଚ୍ସି, ପିଏଚ୍ସିରେ ସ୍ବାସ୍ଥ୍ୟକର୍ମୀ, ଆଶାଦିଦି ଓ ଚିଫ୍ ହେଲ୍ଥ ଅଧିକାରୀ ଘରକୁ ଘର ବୁଲି ସର୍ଭେ କରିବେ। ଏହାସହ ପ୍ରତି ପରିବାରକୁ ହାଲୋଜେନ ବଟିକା ଓ ଓଆର୍ଏସ୍ ଦିଆଯିବ। ସେହିପରି ଗାଁମାନଙ୍କର ଜଳଉତ୍ସଗୁଡିକ ବିଶୋଧନ କରାଯିବାର ଲକ୍ଷ୍ୟ ରହିଛି।
