ନୂଆଦିଲ୍ଲୀ,୧୬।୧୦: କାନାଡାରେ ଥିବା ହାସ୍ୟ ଅଭିନେତା କପିଲ ଶର୍ମାଙ୍କ କାଫେ ଉପରେ ପୁଣି ଥରେ ଗୁଳିମାଡ଼। ରିପୋର୍ଟ ମୁତାବକ, କାଫେରେ ତିନୋଟି ଗୁଳି ଚାଳନା କରାଯାଇଛି। ଲରେନ୍ସ ବିଷ୍ନୋଇ ଗ୍ୟାଙ୍ଗ ଏହି ଗୁଳିକାଣ୍ଡ ପାଇଁ ଦାୟୀ ବୋଲି ଦାବି କରିଛି। ଏହି ଗୁଳିକାଣ୍ଡର ଏକ ଭିଡିଓ ମଧ୍ୟ ସାମ୍ନାକୁ ଆସିଛି।
ବିଷ୍ନୋଇ ଗ୍ୟାଙ୍ଗ ଗୁଳିକାଣ୍ଡର ଦାୟିତ୍ୱ ନେଇ କହିଛି, “ମୁଁ, କୁଲବୀର ସିଦ୍ଧୁ ଏବଂ ଗୋଲ୍ଡୀ ଢିଲୋନ ଆଜି ସରେର କାଫେରେ ଘଟିଥିବା ତିନୋଟି ଗୁଳିକାଣ୍ଡର ଦାୟିତ୍ୱ ନେଉଛି। ଆମର ସାଧାରଣ ଲୋକଙ୍କ ସହିତ କୌଣସି ଶତ୍ରୁତା ନାହିଁ। ଯେଉଁମାନଙ୍କ ସହିତ ଆମର ବିବାଦ ଅଛି ସେମାନେ ଆମଠାରୁ ଦୂରେଇ ରହିବା ଉଚିତ। ଯେଉଁମାନେ ବେଆଇନ (ଅବୈଧ) କାମ କରନ୍ତି ଏବଂ ଲୋକଙ୍କୁ ଟଙ୍କା ଦିଅନ୍ତି ନାହିଁ ସେମାନେ ମଧ୍ୟ ପ୍ରସ୍ତୁତ ରହିବା ଉଚିତ। ଯେଉଁମାନେ ବଲିଉଡରେ ଧର୍ମ ବିରୁଦ୍ଧରେ କଥା କୁହନ୍ତି ସେମାନେ ମଧ୍ୟ ପ୍ରସ୍ତୁତ ରହିବା ଉଚିତ; ଗୁଳି ଯେକୌଣସି ସ୍ଥାନରୁ ଆସିପାରେ।”
କହିରଖୁଛୁ, ହାସ୍ୟ ଅଭିନେତାଙ୍କ କାଫେରେ ଏହା ତୃତୀୟ ଗୁଳିକାଣ୍ଡ। କପିଲଙ୍କ କାଫେରେ ପ୍ରଥମ ଗୁଳିକାଣ୍ଡ ୨୦୨୫ ଜୁଲାଇ ୧୦ ତାରିଖରେ ହୋଇଥିଲା। ଏନ୍ଆଇଏର ମୋଷ୍ଟ ୱାଣ୍ଟେଡ ତାଲିକାରେ ଥିବା ବିକେଆଇ ଆତଙ୍କବାଦୀ ହରଜିତ ସିଂହ ଲଡ୍ଡି ଗୁଳିକାଣ୍ଡ ପାଇଁ ଦାୟୀ ବୋଲି ଦାବି କରିଥିଲେ। କାଫେରେ ଦ୍ୱିତୀୟ ଗୁଳିକାଣ୍ଡ ଅଗଷ୍ଟ ୭ ତାରିଖରେ ହୋଇଥିଲା। ଏହି ଗୁଳିକାଣ୍ଡ ପାଇଁ ଲରେନ୍ସ ଗ୍ୟାଙ୍ଗ ଦାୟିତ୍ୱ ନେଇଥିଲା। ଗ୍ୟାଙ୍ଗ ସହିତ ଜଡିତ ହରି ବକ୍ସରଙ୍କ ଅଡିଓ ଫୁଟେଜ ମଧ୍ୟ ସାମ୍ନାକୁ ଆସିଥିଲା, ଯେଉଁଥିରେ ସଲମାନ ଖାନଙ୍କ ଶୋ’କୁ ନିମନ୍ତ୍ରଣ ଉପରେ ଅସନ୍ତୋଷ ପ୍ରକାଶ କରାଯାଇଥିଲା। କାଫେରେ ତୃତୀୟ ଗୁଳିକାଣ୍ଡ ଅକ୍ଟୋବର ୧୬ ତାରିଖରେ ହୋଇଥିଲା ଏବଂ ଲରେନ୍ସ ଗ୍ୟାଙ୍ଗ ଏଥିପାଇଁ ଦାୟୀ ବୋଲି ଦାବି କରିଛି।
କାଫେର ଝରକା କାଚ ଉଭୟ ଥର ଭାଙ୍ଗିଗଲା। ଯଦିଓ ଉଭୟ ଘଟଣାରେ କେହି ଆହତ ହୋଇ ନ ଥିଲେ, ଘଟଣା ପରେ କାଫେ କିଛି ଦିନ ପାଇଁ ବନ୍ଦ ରହିଥିଲା। ପରେ କାଫେ ପୁଣି ଖୋଲିଥିଲା। କାଫେରେ ଦୁଇଟି ଗୁଳିକାଣ୍ଡ ପରେ, ମୁମ୍ବାଇରେ କପିଲ ଶର୍ମାଙ୍କ ସୁରକ୍ଷା ସମୀକ୍ଷା କରାଯାଇଥିଲା। ଏବେ ତୃତୀୟ ଗୁଳିକାଣ୍ଡ ଘଟିଛି ଭିଡିଓରେ ଗୁଳି ଚଳାଇଥିବା ବ୍ୟକ୍ତିମାନେ ଲଗାତାର ଗୁଳି ଚଳାଇଥିବା ଦେଖାଯାଇଛି।
