ଦାରିଙ୍ଗବାଡି, ୧୩।୨(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ଦେଇ ଯାଇଥିବା ୫୯ନଂ ଜାତୀୟ ରାଜପଥ କଡ଼ରେ ଉଠା ଦୋକାନୀଙ୍କୁ ଜବରଦଖଲ ଉଚ୍ଛେଦ କରାଯାଇଛି। କିନ୍ତୁ ସମସ୍ତ ଉଠା ଦୋକାନୀଙ୍କୁ ପଞ୍ଚାୟତ କାର୍ଯ୍ୟାଳୟ ପକ୍ଷରୁ ଥଇଥାନ କରାଯିବାରେ ବିଳମ୍ବକୁ ନେଇ ଦେଖାଯାଇଛି ଉତ୍ତେଜନା। ଶୁକ୍ରବାର ସମସ୍ତ ଉଠାଦୋକାନୀ ହେଲିପ୍ୟାଡ଼ ପଡିଆଠାରେ ଏକତ୍ରିତ ହୋଇଥିଲେ। ସେଠାରୁ ଶୋଭାଯାତ୍ରାରେ ଆସି ତହସିଲ କାର୍ଯ୍ୟାଳୟରେ ପହଞ୍ଚି ବିକ୍ଷୋଭ ପ୍ରଦର୍ଶନ କରିବା ସହ ସେଠାରେ ଦୀର୍ଘ ସମୟ ଧରି ଧାରଣାରେ ବସିଥିଲେ।
ସେମାନଙ୍କ ଦାବି ଯେ, ପ୍ରଶାସନ ଦୀର୍ଘ ମାସେରୁ ଉର୍ଦ୍ଧ୍ୱ ସମୟ ଧରି ଉଠାଦୋକାନୀଙ୍କୁ ଜାତୀୟ ରାଜପଥ କଡ଼ରୁ ଉଚ୍ଛେଦ କରିଥିଲେ ସୁଦ୍ଧା ଏବେ ପର୍ଯ୍ୟନ୍ତ ସେମାନଙ୍କୁ ଥଇଥାନ କରାଯାଇପାରିନି। ଫଳରେ ଗରିବ ଖଟିଖିଆ ପରିବାର ଏବେ ଦୀର୍ଘ ସମୟ ଧରି ନିଜ ବ୍ୟବସାୟ ବନ୍ଦ ଯୋଗୁ ପରିବାର ଚଲାଇବା ମୁସ୍କିଲ ହୋଇପଡ଼ିଛି। ଏବେ ଘର ଚଳାଇବା ଓ ପିଲାଙ୍କ ପାଠ ପଢ଼ାଖର୍ଚ୍ଚ ସହ ସ୍ବାସ୍ଥ୍ୟପାଇଁ ଖର୍ଚ୍ଚ ଉଠାଇବା କଷ୍ଟକର ହୋଇପଡ଼ିଛି। କିଭଳି ଚଳିବେ ସେନେଇ ବଢିଛି ଚିନ୍ତା। ତେଣୁ ଆମକୁ ଥଇଥାନ କର, ନ ହେଲେ ଆମକୁ ଖାଇବାକୁ ଦିଅ, ଘର ଖର୍ଚ୍ଚ ଦିଅ ବୋଲି ନାରାବାଜି ଦେଇ ବିକ୍ଷୋଭ ପ୍ରଦର୍ଶନ କରିଥିଲେ।
ଉଠାଦୋକାନୀଙ୍କ ଏଭଳି ଆନ୍ଦୋଳନକୁ ଦେଖି ବିଡ଼ିଓ ପ୍ରୀତିରଞ୍ଜନ ରଥ, ତହସିଲଦାର ଧୀରଜ ପାତ୍ର, ଅତିରିକ୍ତ ତହସିଲଦାର ଦୁଃଶାସନ ସ୍ବାଇଁ, ଆଇଆଇଆସି ସଂଗ୍ରାମ କେଶରୀ ଜେନା, ଦାରିଙ୍ଗବାଡି ସରପଞ୍ଚ ଚନ୍ଦ୍ରିକା ମଲିକ, ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ରୋଶନ ରଥ ପ୍ରମୁଖ ତହସିଲଦାରଙ୍କ ପ୍ରକୋଷ୍ଠରେ ଏକ ବୈଠକ କରି ସେମାନଙ୍କ ଥଇଥାନ ପାଇଁ ଆଲୋଚନା କରିଥିଲେ। ଉଠାଦୋକାନୀଙ୍କ ଥଇଥାନ ପାଇଁ ଆସନ୍ତା ୧୫ ଦିନ ମଧ୍ୟରେ ପିଣ୍ଡି ନିର୍ମାଣ ସହ ଯେଉଁଠି ପିଣ୍ଡି ରହିଛି, ତାକୁ ଅସ୍ଥାୟୀ ଗୃହ କରାଯାଇ ଥଇଥାନ ପାଇଁ ନିଷ୍ପତି ନିଆଯାଇଥିଲା। ପରେ ଉଠାଦୋକାନୀ ସଂଘର ସଭାପତି ମିହିର ମଲିକଙ୍କ ନେତୃତ୍ୱରେ ଏକ ପ୍ରତିନିଧି ଦଳ ପ୍ରଶାସନ ସହ ଆଲୋଚନା କରିବା ପରେ ପ୍ରତିଶ୍ରୁତି ପାଇ ଆନ୍ଦୋଳନରୁ ଓହରିଥିଲେ। ଏଥିସହ ସଂଘ ପକ୍ଷରୁ ଥଇଥାନ ନିମନ୍ତେ ଏକ ଦାବି ପତ୍ର ବିଡ଼ିଓ ପ୍ରୀତିରଞ୍ଜନ ରଥ ଏବଂ ତହସିଲଦାର ଧୀରଜ ପାତ୍ରଙ୍କୁ ପ୍ରଦାନ କରାଯାଇଥିବା ସଂଘର ସଭାପତି କହିଛନ୍ତି।
Dharitri – Odisha’s No.1 Odia Daily
