ଶ୍ରୀନଗର,୨୮।୧୨: ଜମ୍ମୁ-କଶ୍ମୀରର ଶୋପିଆନ୍ରେ ହୋଇଥିବା ଫେକ୍ ଏନ୍କାଉଣ୍ଟର ପର୍ଦ୍ଦାଫାଶ୍ ହୋଇଛି। କଶ୍ମୀର ଜୋନ୍ ପୋଲିସ ଅନୁସାରେ ୩ ଜଣ ଶ୍ରମିକଙ୍କୁ ହତ୍ୟା କରାଯିବା ପରେ ସେମାନଙ୍କୁ ଆତଙ୍କବାଦୀ ପ୍ରମାଣିତ କରିବା ଲାଗି ଅଭିଯୁକ୍ତ ସେନା କ୍ୟାପଟେନ୍ ମୃତଦେହ ପାଖରେ ବନ୍ଧୁକ ସମେତ ଅନ୍ୟ ଅସ୍ତ୍ରଶସ୍ତ୍ର ରଖିଥଲେ। ୨୦୨୦ ଜୁଲାଇରେ ହୋଇଥିବା ଏହି ଏନ୍କାଉଣ୍ଟର ଘଟଣାରେ ଜାଣିଶୁଣି ଏଭଳି କରାଯାଇଥିବା ପୋଲିସ ପକ୍ଷରୁ କୁହାଯାଇଛି। ୬୨ ଆର୍ଆର୍ର ଅଭିଯୁକ୍ତ କ୍ୟାପଟେନ୍ ଭୁପେନ୍ଦ୍ର ସିଂ, ମେଜର ବସିର ଖାଁ, ଚୌଗାମ୍ ବାସିନ୍ଦା ତାବିଶ୍ ନଜିର, ପୁଲଓ୍ବାମା ବାସିନ୍ଦା ବେଲାଲା ଅହମ୍ମଦ ଲୋନ୍ ତିନି ଶ୍ରମିକଙ୍କୁ ଅପହରଣ କରି ସେମାନଙ୍କର ଫେକ୍ ଏନ୍କାଉଣ୍ଟର କରିଥିବା ପୋଲିସ ତଦନ୍ତ ରିପୋର୍ଟରେ ଉଲ୍ଲେଖ କରାଯାଇଛି। ୩୦୦ ପୃଷ୍ଠାର ଅଭିଯୋଗ କୋର୍ଟରେ ଦାଖଲ କରାଯାଇଛି। ଏହି ମାମଲାର ତଦନ୍ତ କଶ୍ମୀର ଜୋନ୍ ପୋଲିସର ଏସ୍ଆଇଟି ପକ୍ଷରୁ ଜାରି ରହିଛି। ସୂଚନାଯୋଗ୍ୟ, ଶ୍ରମିକ ଅବରାର ମହମ୍ମଦ, ଇତ୍ମିଆଜ୍ ଅହମ୍ମଦ ଏବଂ ମହମ୍ମଦ ଇବରାରଙ୍କୁ ଏନ୍କାଉଣ୍ଟର କରାଯିବା ପରେ ସେମାନଙ୍କ ଫଟୋ ପ୍ରକାଶ ପାଇଥିଲା। ତେବେ ଏହାକୁ ମୃତକଙ୍କ ପରିବାର ସଦସ୍ୟଙ୍କ ପକ୍ଷରୁ ବିରୋଧ କରାଯାଇଥିଲା। ସେମାନେ ଶ୍ରମିକ ଭାବେ କାମ କରୁଥିବା ସେମାନେ ଦାବି କରିଥିଲେ। ମୃତକଙ୍କ ଡିଏନ୍ଏ ପରୀକ୍ଷାରୁ ପ୍ରମାଣିତ ହୋଇଥିଲା ଯେ, ସେମାନେ ଆତଙ୍କବାଦୀ ନୁହନ୍ତି। ଏହାପରେ ଏହାର ତଦନ୍ତ କଶ୍ମୀର ଜୋନ୍ ପୋଲିସ ପକ୍ଷରୁ ଆରମ୍ଭ ହୋଇଥିଲା।
