ଇସଲାମାବାଦ୍,୨୧।୨: ପୂର୍ବତନ ପାକିସ୍ତାନୀ ବ୍ୟାଟ୍ସମ୍ୟାନ ଶୋଏବ ମାଲିକ ତାଙ୍କ ବ୍ୟକ୍ତିଗତ ଜୀବନ ପାଇଁ ପ୍ରାୟତଃ ଚର୍ଚ୍ଚାରେ ଥାନ୍ତି। ମଲିକ ୨୦୨୪ ଆରମ୍ଭରେ ତୃତୀୟ ଥର ପାଇଁ ପାକିସ୍ତାନୀ ଅଭିନେତ୍ରୀ ସନା ଜାଭେଦଙ୍କୁ ବିବାହ କରିଥିଲେ। ଏବେ ତାଙ୍କ ନାମ ପାକିସ୍ତାନୀ ଅଭିନେତ୍ରୀ ଲୈବା ଖାନ ସହ ଯୋଡା ଯାଉଛି। କୁହାଯାଉଛି ଯେ, ସେ ତାଙ୍କୁ ଚତୁର୍ଥଥର ପାଇଁ ବିବାହ କରିବେ। କିନ୍ତୁ ଚତୁର୍ଥ ବିବାହ ଖବର ସମ୍ପୂର୍ଣ୍ଣ ମିଥ୍ୟା। ଯେଉଁ ଅଭିନେତ୍ରୀଙ୍କ ସହ ମଲିକଙ୍କ ନାମ ଯୋଡାଯାଉଛି ସେ ଫେବୃଆରୀ ଆରମ୍ଭରେ ସୋସିଆଲ ମିଡିଆରେ ସେମାନଙ୍କର ବିବାହ ଫଟୋ ଶେୟାର କରିଥିଲେ। ଏହା ଖବରକୁ ସମ୍ପୂର୍ଣ୍ଣ ମିଥ୍ୟା ପ୍ରମାଣିତ କରେ।
ଶୋଏବଙ୍କ ପ୍ରଥମ ବିବାହ ୨୦୦୨ରେ ଆୟେଶା ସିଦ୍ଦିକି ନାମକ ଜଣେ ମହିଳାଙ୍କ ସହିତ ହୋଇଥିଲା। ତା’ପରେ ୨୦୧୦ରେ ମଲିକ ଭାରତୀୟ ଟେନିସ ତାରକା ସାନିଆ ମିର୍ଜାଙ୍କୁ ବିବାହ କରିଥିଲେ। ୨୦୨୪ରେ ସେ ଭାରତୀୟ ଟେନିସ ତାରକାଙ୍କୁ ଛାଡପତ୍ର ଦେଇ ପାକିସ୍ତାନୀ ଅଭିନେତ୍ରୀ ସନା ଜାଭେଦଙ୍କୁ ବିବାହ କରିଥିଲେ। ଏହିପରି, ଶୋଏବ ଏପର୍ଯ୍ୟନ୍ତ ତିନୋଟି ବିବାହ କରିଛନ୍ତି।
ସୂଚନାଯୋଗ୍ୟ ଯେ, ଶୋଏବ ମଲିକ ତାଙ୍କ ଅନ୍ତର୍ଜାତୀୟ କ୍ୟାରିଅରରେ ୩୫ ଟେଷ୍ଟ, ୨୮୭ ଦିନିକିଆ ଏବଂ ୧୨୪ ଅନ୍ତର୍ଜାତୀୟ ଟି-୨୦ ଖେଳିଛନ୍ତି। ଟେଷ୍ଟରେ ଶୋଏବ ୧,୮୯୮ ରନ କରିଛନ୍ତି ଏବଂ ୩୨ ଉଇକେଟ ନେଇଛନ୍ତି। ଏକଦିବସୀୟରେ, ସେ ୭,୫୩୪ ରନ କରିଛନ୍ତି ଏବଂ ୧୫୮ ଉଇକେଟ ନେଇଛନ୍ତି। ଅନ୍ତର୍ଜାତୀୟ ଟି-୨୦ରେ, ମଲିକ ୨,୪୩୫ ରନ କରିଛନ୍ତି ଏବଂ ୨୮ ଉଇକେଟ ନେଇଛନ୍ତି।
Dharitri – Odisha’s No.1 Odia Daily
