ପାରଳାଖେମୁଣ୍ଡି,୨।୩ ଗଜପତି ଜିଲାର ମହେନ୍ଦ୍ରଗିରି ପାହାଡ଼ରେ ଚଳିତବର୍ଷ ମଧ୍ୟ ବିନା ଭକ୍ତରେ ଶିବରାତ୍ରି ଓ ଜାଗର ଯାତ୍ରା ପାଳନ କରାଯାଇଛି । ପରମ୍ପରା ଅନୁସାରେ, ମହାଶିବରାତ୍ରି ସୋମବାର ରାତିରେ ମହେନ୍ଦ୍ରଗିରିଠାରେ ଜାଗର ପାଳନ ସହ ମହାଦୀପ ଉଠିଛି। ଜିଲାପାଳ ଲିଙ୍ଗରାଜ ପଣ୍ଡା କରୋନାର ଭୟାବହତାକୁ ଦୃଷ୍ଟିରେ ରଖି ଏଥର ମହେନ୍ଦ୍ରଗିରିଠାରେ କେବଳ ପୂଜାପାଠ କରାଯିବ ବୋଲି ପୂର୍ବରୁ ନିଷ୍ପରି ନେଇଥିଲେ। ତେଣୁ ଏଠାକୁ କେହି ନ ଆସିବାକୁ ଫେବୃୟାରୀ ୨୭ରୁ ମାର୍ଚ୍ଚ ୨ ପର୍ଯ୍ୟନ୍ତ କଟକଣା ଜାରି କରିଥିଲେ। ମହେନ୍ଦ୍ରଗିରି ଯିବା ବୁରୁଖତ, ରାଜବସା, ବାରଘର, ଚମ୍ପାପୁର, ଗୁଡିଝୁଡି, ଗଙ୍ଗାବାଡ଼, କଇଁପୁର ଆଦି ୧୪ ସ୍ଥାନରେ ଜିଲା ପ୍ରଶାସନ ଓ ପୋଲିସ ଅଧିକାରୀ ଗତ ଦୁଇ ଦିନ ହେଲା ସଜାଗ ଥିଲେ। ତେଣୁ କୌଣସି ଭକ୍ତ ମହେନ୍ଦ୍ରଗିରିକୁ ଜାଗର ପାଳନ ପାଇଁ ଆସିପାରିନାହାନ୍ତି। ମହେନ୍ଦ୍ରଗିରିଠାରେ ଥିବା କୁନ୍ତୀ, ଭୀମ, ଯୁଧିଷ୍ଠିର, ଅର୍ଜୁନ, ଗୋକର୍ଣ୍ଣେଶ୍ବର ମନ୍ଦିରଗୁଡିକରେ କେବଳ ସେବାୟତଙ୍କ ଦ୍ବାରା ଶିବରାତ୍ରର ଯଥାରୀତି ପୂଜାପାଠ କରାଯାଇଥିଲା। ସୋମବାର ମଧ୍ୟରାତିରେ ମହାଦୀପ ଉଠିଥିଲା। ମଙ୍ଗଳବାର ପାରଳାଖେମୁଣ୍ଡି ସହରର ବିଭିନ୍ନ ଶିବ ମନ୍ଦିରରେ ଶ୍ରଦ୍ଧାଳୁଙ୍କ ଭିଡ଼ ଦେଖିବାକୁ ମିଳିଥିଲା।
