ମୁମ୍ବାଇ,୩୦।୬: ମହାରାଷ୍ଟ୍ର ରାଜନୀତିରେ ଗୁରୁବାର ନାଟକୀୟ ମୋଡ ଦେଖିବାକୁ ମିଳିଛି। ଭାଜପା ନେତା ଦେବେନ୍ଦ୍ର ଫଡନବିସ୍ ନୁହେଁ, ଶିବସେନାର ବିଦ୍ରୋହୀ ବିଧାୟକ ଏକନାଥ ସିନ୍ଧେ ରାଜ୍ୟର ନୂତନ ମୁଖ୍ୟମନ୍ତ୍ରୀ ଭାବେ ଆଜି ଶପଥ ନେବେ। ଭାଜପା ସମର୍ଥନରେ ସେ ମୁଖ୍ୟମନ୍ତ୍ରୀ ହେବେ ବୋଲି ଜଣାପଡିଛି। ଏକ ମିଳିତ ଖବରଦାତା ସମ୍ମିଳନୀରେ ସିନ୍ଧେଙ୍କ ଉପସ୍ଥିତିରେ ଫଡନବିସ୍ ଏହା ଘୋଷଣା କରିଛନ୍ତି। ଆଜି ସିନ୍ଧେ ମୁଖ୍ୟମନ୍ତ୍ରୀ ଭାବେ ଶପଥ ନେବେ, ପରେ ମନ୍ତ୍ରୀମଣ୍ଡଳ ସମ୍ପ୍ରସାରଣ ହେବ। ଫଡନବିସ୍ ନିଜେ ମନ୍ତ୍ରୀମଣ୍ଡଳରେ ରହିବେ ନାହିଁ ବୋଲି ସ୍ପଷ୍ଟ କରିଛନ୍ତି। ସିନ୍ଧେ ଏବଂ ଫଡନବିସ୍ ଗୁରୁବାର ମହାରାଷ୍ଟ୍ର ରାଜ୍ୟପାଳ ଭାଗବତ ସିଂ କୋଶାୟାରିଙ୍କୁ ଭେଟି ସରକାର ଗଠନ ପାଇଁ ଦାବି କରିଛନ୍ତି। ତେବେ ପୂର୍ବରୁ ଫଡନବିସ୍ ମୁଖ୍ୟମନ୍ତ୍ରୀ ହେବେ ବୋଲି ଚର୍ଚ୍ଚା ହେଉଥିଲା କିନ୍ତୁ ଶେଷରେ ବାଜି ଓଲଟି ପଡିଛି।
ଫଡନବିସ୍ କହିଛନ୍ତି, ୨୦୧୯ରେ ଭାଜପା ଏବଂ ଶିବସେନା ଏକାଠି ନିର୍ବାଚନ ଲଢିଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଆମେ ଏକ ବଡ଼ ବିଜୟ ହାସଲ କରିଥିଲୁ। ଏକନାଥ ସିନ୍ଧେ ଉଦ୍ଧବ ଠାକରେଙ୍କୁ ମହାବିକାଶ ଅଘାଡି (କଂଗ୍ରେସ-ଏନସିପି-ଶିବସେନା ମିଳିତ ମଞ୍ଚ) ସରକାରରୁ ବାହାରିଯିବାକୁ ବାରମ୍ବାର କହିଥିଲେ। କିନ୍ତୁ ଉଦ୍ଧବ ଠାକରେ ଏକନାଥ ସିନ୍ଧେଙ୍କ କଥା ଶୁଣି ନ ଥିଲେ। ବାଲା ସାହେବ ଯେଉଁମାନଙ୍କ ବିରୋଧରେ ସାରା ଜୀବନ ଲଢିଥିଲେ, ସେମାନଙ୍କ ସହ ମିଶି ଉଦ୍ଧବ ସରକାର ଗଢିଥିଲେ। ଅଢେଇ ବର୍ଷ ପର୍ଯ୍ୟନ୍ତ ରାଜ୍ୟରେ କୌଣସି ଅଗ୍ରଗତି ହୋଇ ନ ଥିଲା। ଫଳରେ ଉଦ୍ଧବ ଠାକରେଙ୍କ ଉପରେ ଅନେକ ଶିବସେନା ନେତା ଅସନ୍ତୋଷ ପ୍ରକାଶ କରିଥିଲେ।
ଏଥି ସହିତ, ଏକନାଥ ସିନ୍ଧେ କହିଛନ୍ତି, ମୁଁ ନେଇଥିବା ନିଷ୍ପତ୍ତି ଆପଣ ସମସ୍ତେ ଜାଣନ୍ତ। କେଉଁ ପରିସ୍ଥିତିରେ ନିଷ୍ପତ୍ତି ନିଆଯାଇଛି ତାହା ମଧ୍ୟ ଆପଣ ଜାଣନ୍ତି। ମୁଁ ବାଲା ସାହେବଙ୍କ ହିନ୍ଦୁତ୍ୱକୁ ଆଗକୁ ନେବା ପାଇଁ କାର୍ଯ୍ୟ କରିବି। ସମସ୍ତ ୫୦ ଜଣ ବିଧାୟକ ଏକାଠି ଅଛନ୍ତି। ଆମ ବିଧାନସଭା ନିର୍ବାଚନମଣ୍ଡଳୀରେ ଥିବା ସମସ୍ୟା ବିଷୟରେ ଆମେ ମୁଖ୍ୟମନ୍ତ୍ରୀଙ୍କୁ ଅନେକ ଥର କହିଥିଲୁ। ମୁଖ୍ୟମନ୍ତ୍ରୀ ଆମ କଥା ପ୍ରତି କଦାପି ଧ୍ୟାନ ଦେଇନାହାଁନ୍ତି। ଔରଙ୍ଗାବାଦ ଏବଂ ଓସମାନାବାଦର ନାମ ପରିବର୍ତ୍ତନ ନିଷ୍ପତ୍ତି କାଲି ନୁହେଁ, ବହୁପୂର୍ବରୁ ନିଆଯିବା ଥିଲା।
