ମୁମ୍ବାଇ,୪।୧୨: ମହାରାଷ୍ଟ୍ରରେ ସରକାର ଗଠନର ଫର୍ମୂଲା ପାଖାପାଖି ଫାଇନାଲ ହୋଇଯିବା ଭଳି ନଜର ଆସୁଛି। କିନ୍ତୁ ମୁଖ୍ୟମନ୍ତ୍ରୀ ଓ ଅନ୍ୟ ପଦ ପଦବୀକୁ ନେଇ ସସପେନ୍ସ ଜାରି ରହିଛି। ଏନେଇ ଅଫିସିଆଲି ଭାବେ କୌଣସି ସୂଚନା ମିଳିନାହିଁ। ଶିବସେନା ମୁଖ୍ୟ ଏକନାଥ ଶିନ୍ଦେ ମୁଖ୍ୟମନ୍ତ୍ରୀ ପଦ ପାଇଁ ଅଡି ବସିଥିବାବେଳେ ଭାଜପା ଫଡନଭିସ୍ଙ୍କୁ ମୁଖ୍ୟମନ୍ତ୍ରୀ କରିବାକୁ ନିଷ୍ପତ୍ତି ନେଇଛି। ତେବେ ଏହି ଛକପଞ୍ଝା ଭିତରେ ସୂଚନା ମିଳିଛି ଯେ, ଶିନ୍ଦେ ଅମିତ ଶାହାଙ୍କୁ ଭେଟି ୬ମାସ ପାଇଁ ମୁଖ୍ୟମନ୍ତ୍ରୀ ପଦ ମାଗିଥିଲେ। ଯାହା ପ୍ରଚାର ହେବା ପରେ ମହାରାଷ୍ଟ୍ର ରାଜନୀତି ସରଗରମ ହୋଇ ଉଠୁଛି। ମୁଖ୍ୟମନ୍ତ୍ରୀ ୫ବର୍ଷ ପାଇଁ ହେବାକୁ ଥିବାବଳେ ଶିନ୍ଦେ କାହିଁକି ୬ ମାସ ପାଇଁ ଏହି ପଦ ମାଗୁଥିଲେ ତାକୁ ନେଇ ଚର୍ଚ୍ଚା ଆରମ୍ଭ ହୋଇଛି।
ତେବେ ଏ ଜାତୀୟ ଗଣମାଧ୍ୟମ ରିପୋର୍ଟରୁ ଜଣାପଡିଛି ଯେ, ଶିବସେନା ମୁଖ୍ୟ ଏକନାଥ ଶିନ୍ଦେ ଭାଜପାର ଶୀର୍ଷ ନେତୃତ୍ୱଙ୍କୁ ୬ମାସ ପାଇଁ ପାଇଁ ମୁଖ୍ୟମନ୍ତ୍ରୀ ହେବାକୁ ପ୍ରସ୍ତାବ ରଖିଥିଲେ। ଯାହାକୁ ଭାଜପା ମନା କରିଦେଇଥିଲା। ଭାଜପା କହିଥିଲା, ଏହି ୬ମାସିଆ ମୁଖ୍ୟମନ୍ତ୍ରୀ ହେଲେ ଦଳ ବିରୋଧରେ ଏକ ଖରାପ ପ୍ରଭାବ ପଡିବ। ଏହି ପ୍ରକାର ପ୍ରକ୍ରିୟା ହେବାର କୌଣସି ସିଷ୍ଟମ ନାହିଁ। ତେବେ ଏହି ଆଲୋଚନା ନଭେମ୍ବର ୨୮ରେ ହୋଇଥିଲା। ଗୃହମନ୍ତ୍ରୀ ଅମିତ ଶାହା, ଶିନ୍ଦେଙ୍କ ସମେତ ଅନ୍ୟ ନେତାଙ୍କ ସହ ସାକ୍ଷାତକାରରେ ଏହି ବୟାନ ରଖିଥିଲେ।
ଏହି ସାକ୍ଷାତକାରର ଗୋଟିଏ ଦିନ ପୂର୍ବରୁ ଶିନ୍ଦେ ସ୍ପଷ୍ଟ କରିଥିଲେ ଯେ, ଭାଜପା ଶୀର୍ଷ ନେତୃତ୍ୱ ଯାହା ବି ନିଷ୍ପତ୍ତି ନେବେ ଆମେ ସ୍ବୀକାର କରିବୁ। ତା’ ପରଦିନ ଗୃହମନ୍ତ୍ରୀ ଅମିତ ଶାହା, ଶିନ୍ଦେଙ୍କ ସମେତ ଅନ୍ୟ ନେତାଙ୍କ ସହ ସାକ୍ଷାତକାର ହୋଇଥିଲା। ଏହି ବୈଠକରେ ଦେବେନ୍ଦ୍ର ଫଡନଭିସ୍, ଏନସିପି ଅଜିତ ପାଓ୍ବାର, କାର୍ଯ୍ୟକାରୀ ଅଧ୍ୟକ୍ଷ ପ୍ରଫୁଲ ପଟେଲ ଓ ପ୍ରଦେଶ ଅଧ୍ୟକ୍ଷ ସୁନୀଲ ତଟକର ସାମିଲ୍ ହୋଇଥିଲେ।
ଚଳିତ ନିର୍ବାଚନରେ ମହାୟୁତି ରାଜ୍ୟରେ ୨୮୮ ଆସନରୁ ୨୩୦ଟି ଆସନରେ ବିଜୟ ହାସଲ କରିଥିଲା। ଏହାକୁ ପ୍ରମାଣ ଭାବରେ ରଖି ବୈଠକରେ ଶିନ୍ଦେ କହିଥିଲେ, ଆପଣ ଦେଇଥିବା କଥାକୁ ମନ ପକାନ୍ତୁ। ଲୋକ ସଭା ନିର୍ବାଚନ ପରେ ଆପଣ କଥା ଦେଇଥିଲେଯେ, ମେଣ୍ଟ ବହୁମତ ହାସଲ କଲେ ମୋତେ ଦ୍ୱିତୀୟ ଥର ପାଇଁ ମୁଖ୍ୟମନ୍ତ୍ରୀ କରିବେ। ଯାହାର ଉତ୍ତରରେ ଶାହା କହିଥିଲେ, ଆପଣ ମୋ ସ୍ଥାନରେ ରହି ଚିନ୍ତା କରନ୍ତୁ। ଏତର ଭାଜପା ମେଣ୍ଟ ମଧ୍ୟରେ ବହୁମତ ହାସଲ କରିଛି। ତେବେ ଆପଣଙ୍କ ଦଳ ଯଦି ଏଥର ବହୁମତ ହାସଲ କରିଥାନ୍ତା କ’ଣ ଆପଣ ମୁଖ୍ୟମନ୍ତ୍ରୀ ପଦ ଛାଡି ଦେଇଥାନ୍ତେ। ଏକଥା ଶୁଣି ଶିନ୍ଦେ ଚୁପ୍ ହୋଇଯାଇଥିଲେ।
