ମୁମ୍ବାଇ: ବଲିଉଡର ଫିଟନେସ୍ କୁଇନ୍ ତଥା ଖ୍ୟାତନାମା ଆଇଟମ୍ ଗର୍ଲ ମଲାଇକା ଅରୋରା ପୁଣିଥରେ ନିଜର ବ୍ୟକ୍ତିଗତ ଜୀବନକୁ ନେଇ ଚର୍ଚ୍ଚାରେ। ଅଭିନେତା ଅର୍ଜୁନ କପୁରଙ୍କ ସହ ବ୍ରେକଅପ ପରେ ଏବେ ମଲାଇକାଙ୍କ ନାଁ ଜଣେ ପ୍ରତିଷ୍ଠିତ ବ୍ୟବସାୟୀଙ୍କ ସହ ଯୋଡ଼ା ଯାଉଛି। ସେହି ବ୍ୟକ୍ତି ଜଣକ ହେଉଛନ୍ତି ଡାଇମଣ୍ଡ ମର୍ଚ୍ଚାଣ୍ଟ ହର୍ଷ ମେହେଟ୍ଟା।ଏବେ ମଲାଇକା ଏବଂ ହର୍ଷ ଇଟାଲୀର ରୋମ୍ରେ ଛୁଟି କଟାଉଥିବାର ଦେଖିବାକୁ ମିଳିଛି।
ସୋସିଆଲ ମିଡିଆରେ ଦୁହିଁଙ୍କର ଏକ ଫଟୋ ବେଶ ଭାଇରାଲ ହେବାରେ ଲାଗିଛି। ରୋମର ପ୍ରସିଦ୍ଧ ‘ଟ୍ରେଭି ଫାଉଣ୍ଟେନ’ (Trevi Fountain) ସମ୍ମୁଖରେ ଦୁହେଁ ଏକାଠି ଫଟୋ ଉଠାଇଛନ୍ତି। ମଲାଇକା ଏକ ବ୍ଲାକ୍ ଟ୍ରେଞ୍ଚ କୋଟ୍ ପିନ୍ଧି ଖୁବ୍ ଗ୍ଲାମରସ୍ ଦେଖାଯାଉଥିବା ବେଳେ ହର୍ଷ ଗ୍ରେ ଜ୍ୟାକେଟରେ ବେଶ ସ୍ମାର୍ଟ ଲାଗୁଛନ୍ତି।
ହର୍ଷ ମେହେଟ୍ଟା କୌଣସି ଫିଲ୍ମ ଷ୍ଟାର୍ ନୁହନ୍ତି, ବରଂ ଜଣେ ସଫଳ ବ୍ୟବସାୟୀ। ସେ ଜଣେ ଜଣାଶୁଣା ଡାଇମଣ୍ଡ ମର୍ଚ୍ଚାଣ୍ଟ। ଖବର ଅନୁଯାୟୀ, ସେ ’ସୈଙ୍କସ ମ୍ୟାନେଜମେଣ୍ଟ’ (Sancus Management) ର ମ୍ୟାନେଜିଂ ଡାଇରେକ୍ଟର। କିଛି ସପ୍ତାହ ପୂର୍ବରୁ ଏକ ମ୍ୟୁଜିକ କନସର୍ଟରେ ଦୁହିଁଙ୍କୁ ପ୍ରଥମ ଥର ପାଇଁ ଏକାଠି ଦେଖିବାକୁ ମିଳିଥିଲା, ଯାହା ପରେ ସେମାନଙ୍କ ସମ୍ପର୍କକୁ ନେଇ ଚର୍ଚ୍ଚା ଜୋର ଧରିଥିଲା।
ଅରବାଜ ଖାନଙ୍କ ସହ ଛାଡ଼ପତ୍ର ଏବଂ ଅର୍ଜୁନ କପୁରଙ୍କ ସହ ଦୀର୍ଘ ଦିନର ସମ୍ପର୍କ ପରେ ମଲାଇକା ଏବେ ହର୍ଷଙ୍କ ସହ ନଜର ଆସୁଛନ୍ତି। ଯଦିଓ ପ୍ରଶଂସକମାନେ ଦୁହିଁଙ୍କୁ ଏକାଠି ଦେଖି ଖୁସି ଅଛନ୍ତି, ତଥାପି ମଲାଇକା କିମ୍ବା ହର୍ଷ ଏପର୍ଯ୍ୟନ୍ତ ନିଜ ସମ୍ପର୍କକୁ ନେଇ କୌଣସି ଆନୁଷ୍ଠାନିକ ଘୋଷଣା କରିନାହାନ୍ତି। ଏହି ଫଟୋଗୁଡ଼ିକ କେବଳ ବନ୍ଧୁତା ନା ଏହାଠାରୁ ଅଧିକ କିଛି, ତାହା ଦେଖିବାକୁ ବାକି ରହିଲା।
