ଯାଜପୁର ଅଫିସ,୧୧ା୧୧: ଏନଏଚ୍ଏଆଇ (ନ୍ୟାଶନାଲ ହାଇୱେ ଅଥରିଟି ଅଫ୍ ଇଣ୍ଡିଆ) ଓ ଜିଲା ପ୍ରଶାସନ ମଧ୍ୟରେ ଆଲୋଚନା ପରେ ଯାଜପୁର ଜିଲା ଦେଇ ଯାଇଥିବା ୧୬ନଂ.ଜାତୀୟ ରାଜପଥର ପାଣିକୋଇଲି ଟୋଲ ପ୍ଲାଜା ସ୍ଥାନାନ୍ତର ହୋଇଛି। ବୁଧବାର ପୂର୍ବାହ୍ନ ୮ଟାରୁ ଭଦ୍ରକ-ଯାଜପୁର ସୀମାନ୍ତ ନେଉଳିଆ ଛକରେ ନବନିର୍ମିତ ଟୋଲପ୍ଲାଜାରେ ଟୋଲ ଆଦାୟ ଆରମ୍ଭ ହୋଇଛି।
ଏହି ଜାତୀୟ ରାଜପଥର ବନ୍ଦାଳୋଠାରୁ ୪୭ କିମି ଦୂରତାରେ ଥିବା ପାଣିକୋଇଲି ଟୋଲପ୍ଲାଜା ବେଆଇନ ଭାବେ ଦର୍ଶାଇ ଦୀର୍ଘଦିନ ହେଲା ଅଞ୍ଚଳବାସୀ ଅଭିଯୋଗ କରି ଆସୁଥିଲେ। ଏହାର ସମୟ ଅବଧି ପୁରିବା ପରେ ମଧ୍ୟ ସ୍ଥାନାନ୍ତର ହେଉ ନ ଥିଲା। ଏହାକୁ ନେଇ ପାଣିକୋଇଲି ମା’ ତାରିଣୀ ଟ୍ରକ ମାଲିକ ସଂଘ, ଯାଜପୁର ରୋଡ ଚ୍ୟାମ୍ବର ଅଫ୍ କମର୍ସ ଓ ସାଧାରଣ ଲୋକେ ବାରମ୍ବାର ପ୍ରଶାସନ ନିକଟରେ ଦାବି କରି ଆସୁଥିଲେ। ଗତ ବର୍ଷ ଟୋଲ ପ୍ଲାଜା ଉଠିବାକୁ ନିଷ୍ପତ୍ତି ହୋଇଥିବାବେଳେ ଓଲଟା ଟୋଲ ଆଦାୟକୁ ୨ଗୁଣ ବୃଦ୍ଧି କରାଯାଇଥିଲା। ଏନଏନ୍ଏଆଇର ଗାଇଡ୍ଲାଇନ ଅନୁଯାୟୀ ଗୋଟିଏ ଟୋଲଗେଟରୁ ଅନ୍ୟ ଟୋଲଗେଟର ଦୂରତା ଅତିକମରେ ୬୦ କିଲୋମିଟର ହେବା ଆବଶ୍ୟକ। କିନ୍ତୁ ପାଣିକୋଇଲି ଟୋଲପ୍ଲାଜାଠାରୁ ବନ୍ଦାଳୋ ଟୋଲ ପ୍ଲାଜାର ଦୂରତା ୪୭ କିମି ରହିଥିଲା। ଏଣୁ ରାଜ୍ୟ ପରିବହନ କମିଶନର ତାଙ୍କ ପତ୍ରସଂଖ୍ୟା ୧୧୦୬୩/୧୯ା୭ା୨୦୧୬ରେ ୱାର୍କସ ସେକ୍ରେଟାରୀଙ୍କୁ ପତ୍ର ଲେଖି ପାଣିକୋଇଲି ଟୋଲପ୍ଲାଜାକୁ ଆଖୁଆପଦା ନିକଟକୁ ସ୍ଥାନାନ୍ତର କରିବାକୁ ନିର୍ଦ୍ଦେଶ ଦେଇଥିଲେ। ଏହି ନିର୍ଦ୍ଦେଶ ଅନୁସାରେ କେବଳ ପାଣିକୋଇଲି ଟୋଲପ୍ଲାଜାକୁ ସ୍ଥାନାନ୍ତର କରିବାକୁ ଏନଏଚ୍ଏଆଇକୁ ୬ ବର୍ଷ ଲାଗିଛି। ଏଥିରେ ନିୟୋଜିତ ଠିକାସଂସ୍ଥାର କାର୍ଯ୍ୟ ଅବଧି ଶେଷ ହେଉଥିଲେ ହେଁ ୨ରୁ୩ ମାସ ପର୍ଯ୍ୟନ୍ତ ବେଆଇନ ଟୋଲ ଆଦାୟ ହୋଇଥିବା ଅଭିଯୋଗ ହୋଇଥିଲା। ଏହି ଟୋଲପ୍ଲାଜା ଉଠିଯିବା ପରେ କେନ୍ଦୁଝର ଏବଂ ସୁକିନ୍ଦା ଖଣି ଅଞ୍ଚଳରୁ ପାରାଦୀପ ଏବଂ ଅନ୍ୟାନ୍ୟ ଅଞ୍ଚଳକୁ ପରିବହନ ହେଉଥିବା ଗାଡ଼ି ମାଲିକମାନେ ଅଶ୍ୱସ୍ତି ହୋଇଛନ୍ତି।
