ନୂଆଦିଲ୍ଲୀ, ୫ା୭: ବଳାତ୍କାର ପୀଡ଼ିତା ଗର୍ଭବତୀଙ୍କୁ ଆଶ୍ରୟ ଓ ସହାୟତା ପାଇଁ କେନ୍ଦ୍ର ସରକାର ନୂଆ ଯୋଜନା ଆରମ୍ଭ କରିଛନ୍ତି। ବଳାତ୍କାର, ଗଣବଳାତ୍କାର କିମ୍ବା ଅନ୍ୟ କୌଣସି କାରଣରୁ ଗର୍ଭବତୀ ହେବା କାରଣରୁ ପରିବାରରୁ ପରିତ୍ୟକ୍ତ ହୋଇଥିବା ନାବାଳିକା, ଯେଉଁମାନଙ୍କର ରୋଜଗାରର ଅନ୍ୟ ଉପାୟ ନାହିଁ, ସେମାନଙ୍କୁ ଆଶ୍ରୟ, ଖାଦ୍ୟ, ଦୈନନ୍ଦିନ ଆବଶ୍ୟକତା, କୋର୍ଟରେ ହାଜର ହେବା ଲାଗି ସୁରକ୍ଷିତ ପରିବହନ ଏବଂ ଆଇନଗତ ସହାୟତା ଯୋଗାଇଦେବା ଏହି ଯୋଜନାର ଲକ୍ଷ୍ୟ। ମହିଳା ଓ ଶିଶୁ ବିକାଶ ମନ୍ତ୍ରୀ ସ୍ମୃତି ଇରାନୀ ସୋମବାର ଉକ୍ତ ଯୋଜନାର ଶୁଭାରମ୍ଭ କରିଛନ୍ତି। ୭୪.୧୦ କୋଟି ଟଙ୍କାର ଏହି ଯୋଜନାକୁ ମନ୍ତ୍ରଣାଳୟ ଅନୁମୋଦନ କରିଛି, ଯାହା ସପ୍ତାହେ ମଧ୍ୟରେ ସାରା ଦେଶରେ ଲାଗୁ ହେବାକୁ ଯାଉଛି।
ନାବାଳିକା ବଳାତ୍କାର ପୀଡ଼ିତା କିମ୍ବା ଅତ୍ୟଧିକ ଆକ୍ରମଣର ଶିକାର ହେଉଥିବା ନାବାଳିକା ଏବଂ କେତେକ କ୍ଷେତ୍ରରେ ପୀଡ଼ିତା ଗର୍ଭବତୀ ହୋଇଥିଲେ, ସେମାନଙ୍କ ପ୍ରତି ହୋଇଥିବା ଗଭୀର ଶାରୀରିକ ଓ ଭାବାତ୍ମକ ଆଘାତକୁ ବିଚାରକୁ ନେଇ ନିର୍ଭୟା ପାଣ୍ଠିରେ ସେମାନଙ୍କୁ ଆର୍ଥତ୍କ ସହାୟତା ସମେତ ଡାକ୍ତରୀ ଭିତ୍ତିଭୂମି ସହାୟତା ଯୋଗାଇଦେବା ଲାଗି ମନ୍ତ୍ରଣାଳୟ ନିଷ୍ପତ୍ତି ନେଇଛି। ଜାତୀୟ ଅପରାଧ ରେକର୍ଡ ବ୍ୟୁରୋ (ଏନ୍ସିଆର୍ବି)ର ୨୦୨୧ ରିପୋର୍ଟ ଅନୁଯାୟୀ ପୋକ୍ସୋ ଆଇନରେ ୫୧,୮୬୩ ମାମଲା ରୁଜୁ ହୋଇଛି। ସେଥିରୁ ୬୪ ପ୍ରତିଶତ ଅର୍ଥାତ ୩୩,୩୪୮ ମାମଲା ଉକ୍ତ ଆଇନର ଧାରା ୩ ଓ ୫ରେ ଆସୁଛି, ଅର୍ଥାତ୍ ସେମାନେ ବଳାତ୍କାର ଏବଂ ଅତ୍ୟଧିକ ଯୌନ ନିର୍ଯାତନାର ଶିକାର ହୋଇଛନ୍ତି। ଉକ୍ତ ପୀଡ଼ିତାମାନଙ୍କ ପାଇଁ ବର୍ତ୍ତମାନର ଶିଶୁଯତ୍ନ ଅନୁଷ୍ଠାନ(ସିସିଆଇ)ଗୁଡ଼ିକରେ ଏକକ ଆଶ୍ର୍ରୟ ଗୃହ ବା ଓ୍ବାର୍ଡ ନିର୍ମାଣରେ ଉକ୍ତ ପାଣ୍ଠି ସହାୟକ ହେବ। ଏଥିପାଇଁ ସିସିଆଇ ଦାୟିତ୍ୱରେ ଥିବା ବ୍ୟକ୍ତି ନାବାଳିକା ବଳାତ୍କାର ପୀଡ଼ିତାଙ୍କ ପାଇଁ ଅଲଗା ସୁରକ୍ଷିତ ସ୍ଥାନ ଯୋଗାଇଦେବେ ବୋଲି ମନ୍ତ୍ରଣାଳୟର ଜଣେ ଅଧିକାରୀ କହିଛନ୍ତି। ଏହି ଯୋଜନା ଦ୍ୱାରା ଗୋଟିଏ ଛାତ ତଳେ ନାବାଳିକା ପୀଡ଼ିତାମାନଙ୍କୁ ଏକସଙ୍ଗେ ସମର୍ଥନ ଓ ସହାୟତା ମିଳିପାରିବ।
