ଢାକା,୧୮।୨: ପୂର୍ବତନ ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନା ୟୁନୁସ ସରକାରଙ୍କୁ ଧମକ ଦେଇଛନ୍ତି। ସେ ପ୍ରଦର୍ଶନକାରୀଙ୍କ ଆକ୍ରମଣରେ ପ୍ରାଣ ପୋଲିସ କର୍ମଚାରୀଙ୍କ ସ୍ତ୍ରୀମାନଙ୍କ ସହିତ ଏକ ଭର୍ଚୁଆଲ ଆଲୋଚନା କରିଥିଲେ। ଆଲୋଚନା ସମୟରେ ସେ ବାଂଲାଦେଶରେ ବୃଦ୍ଧି ପାଉଥିବା ଆତଙ୍କବାଦୀ କାର୍ଯ୍ୟକଳାପକୁ ନିନ୍ଦା କରି କହିଥିଲେ, ନୋବେଲ ପୁରସ୍କାର ବିଜେତା ୟୁନୁସ ଦେଶକୁ ଏକ ଆତଙ୍କବାଦୀ ରାଷ୍ଟ୍ରରେ ପରିଣତ କରିଛନ୍ତି। ଏହି ସମୟରେ, ସେ ପ୍ରତିଶ୍ରୁତି ଦେଇଥିଲେ ଯେ ପୀଡିତ ପରିବାରକୁ ସାହାଯ୍ୟ କରାଯିବ ଏବଂ ହତ୍ୟାକାରୀଙ୍କ ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଛାତ୍ର ଆନ୍ଦୋଳନ ସମୟରେ ସିରାଜଗଞ୍ଜରେ ପୋଲିସଙ୍କୁ ଟାର୍ଗେଟ କରାଯାଇଥିଲା। ହିଂସା ସମୟରେ ଏଠାରେ ଅନେକ ପୋଲିସ ଅଧିକାରୀ ନିହତ ହୋଇଥିଲେ। ଏହି ହିଂସା ଉପରେ ଶେଖ ହସିନା କହିଥିଲେ, ମୁଁ ଫେରି ଆସିବି ଏବଂ ଆମର ପୋଲିସକର୍ମୀଙ୍କ ମୃତ୍ୟୁର ପ୍ରତିଶୋଧ ନେବି। ୟୁନୁସଙ୍କ ମଧ୍ୟବର୍ତ୍ତୀକାଳୀନ ସରକାରରେ ଜଣେ ଆତ୍ମଘୋଷିତ ଛାତ୍ର ନେତା ଅଛନ୍ତି ଯିଏ କୁହନ୍ତି ଯେ ପୋଲିସ କର୍ମଚାରୀଙ୍କୁ ହତ୍ୟା ନ କରି କୌଣସି ବିପ୍ଳବ ହୋଇପାରିବ ନାହିଁ। ଆମକୁ ଏହି ଅରାଜକତାର ଅନ୍ତ କରିବାକୁ ପଡିବ।
ଗତବର୍ଷ ଅଗଷ୍ଟ ୫ ତାରିଖରେ ହୋଇଥିବା ହିଂସାରୁ ରକ୍ଷା ପାଇବାର ତାଙ୍କର ଅଭିଜ୍ଞତା ଶେଖ ହସିନା ବାଣ୍ଟିଥିଲେ। ସେ କହିଥିଲେ, ଆଲ୍ଲା ମୋତେ ଦ୍ୱିତୀୟ ଜୀବନ ଦେଇଛନ୍ତି ଏବଂ ମୁଁ ବିଶ୍ୱାସ କରେ ଏହା ଏକ ଉଦ୍ଦେଶ୍ୟ ପାଇଁ। ଯେଉଁମାନେ ବାଂଲାଦେଶକୁ ଏକ ଆତଙ୍କବାଦୀ ରାଷ୍ଟ୍ରରେ ପରିଣତ କରିଛନ୍ତି ଏବଂ ଯେଉଁମାନଙ୍କ ଯୋଗୁଁ ମାନବାଧିକାର ଉଲ୍ଲଂଘନ ହେଉଛି, ସେମାନେ ଦିନେ ଆଇନର ସମ୍ମୁଖୀନ ହେବେ।
ଶେଖ ହାସିନା କହିଛନ୍ତି, ଛଅ ମାସରୁ ଅଧିକ ସମୟ ବିତିଗଲାଣି, ତଥାପି ହିଂସା ଜାରି ରହିଛି। ଏବେ ମୁଁ ଶୁଣିଛି ଯେ ସେ ଅପରେଶନ ଡେଭିଲ ହଣ୍ଟ ଆରମ୍ଭ କରିବେ। ସେ ଦେଶ ଚଳାଇ ପାରୁନାହାଁନ୍ତି। ଅର୍ଥନୀତି ସଙ୍କଟରେ ଅଛି, ଆଇନ ଶୃଙ୍ଖଳା ବିପର୍ଯ୍ୟସ୍ତ ହେଉଛି ଏବଂ ସାଧାରଣ ସୁରକ୍ଷା ବିପଦରେ ଅଛି।
