ନୂଆଦିଲ୍ଲୀ,୧୪।୧: ସମସ୍ତ ବୃତ୍ତିଗତ କ୍ରିକେଟରୁ ଅବସର ଘୋଷଣା କରିଛନ୍ତି ଅଷ୍ଟ୍ରେଲିୟ କ୍ରିକେଟର ଶନ୍ ମାର୍ଶ। ୨୦୦୮ରେ ସେ ଦଳ ପକ୍ଷରୁ ଡେବ୍ୟୁ କରିଥିଲେ। ଓ୍ବେଷ୍ଟଇଣ୍ଡିଜ ବିପକ୍ଷ ଟି୨୦ରେ ସେ ତାଙ୍କର ପ୍ରଥମ ଅନ୍ତର୍ଜାତୀୟ ମ୍ୟାଚ୍ ଖେଳିଥିଲେ। ଆଇପିଏଲ୍ରେ ଭଲ ପ୍ରଦର୍ଶନ ଆଧାରରେ ତାଙ୍କୁ ଏହି ସୁଯୋଗ ମିଳିଥିଲା। ୨୦୧୯ରେ ଅଷ୍ଟ୍ରେଲିଆ ପାଇଁ ତାଙ୍କର ଅନ୍ତିମ ମ୍ୟାଚ୍ ଖେଳିଥିଲେ। ଏହା ଏକ ଦିନିକିଆ ମୁକାବିଲା ଥିଲା।
ମାର୍ଶ ତାଙ୍କର ୧୧ ବର୍ଷର କ୍ୟାରିୟରରେ ମୋଟ ୩୮ ଟେଷ୍ଟ, ୭୩ ଦିନିକିଆ ଏବଂ ୧୫ ଟି୨୦ ମ୍ୟାଚ୍ ଖେଳିଥିଲେ। ଏଥିରେ ଯଥାକ୍ରମେ ସେ ୨୨୬୫ ରନ୍, ୨୭୭୩ ରନ୍ ଏବଂ ୨୫୫ ରନ୍ ସ୍କୋର କରିଥିଲେ। ଟେଷ୍ଟରେ ସେ ୬ ଏବଂ ଦିନିକିଆରେ ୭ ଶତକ ହାସଲ କରିଛନ୍ତି।
ଗୋଟିଏ ପଟେ ଶନ୍ ଜଣେ ଦକ୍ଷ କ୍ରିକେଟର ଥିଲେ। ହେଲେ ସେ କିଛି ଅନୈତିକ କାର୍ଯ୍ୟ କରୁଥିଲେ। ଅଷ୍ଟ୍ରେଲିଆ ଦଳରେ ଯୋଗ ଦେବା ପୂର୍ବରୁ ତାଙ୍କୁ ୨ ମ୍ୟାଚ୍ ଲାଗି ବ୍ୟାନ୍ କରାଯାଇଥିଲା। କାରଣ ସେ ଅତ୍ୟଧିକ ମଦ୍ୟପାନ କରିଥିଲେ। ୨୦୦୭ର ଏହି ଘଟଣା ପରେ ୨୦୧୨ରେ ସେ ଦକ୍ଷିଣ ଆଫ୍ରିକାରେ ଖେଳାଯାଇଥିବା ଚାମ୍ପିଅନ୍ସ ଲିଗ୍ ଟି୨୦ ଟୁର୍ନାମେଣ୍ଟର ଏକ ମ୍ୟାଚ୍ରୁ ସେ ଓହରି ଯାଇଥିଲେ। କାରଣ ସେ ସାନଭାଇ ମିଚେଲ ମାର୍ଶଙ୍କ ୨୧ତମ ଜନ୍ମଦିନରେ ସାରାରାତି ପାର୍ଟି କରୁଥିଲେ।
ଶନ୍ ମାର୍ଶ ହେଉଛନ୍ତି ଅଷ୍ଟ୍ରେଲିଆର ପୂର୍ବତନ କ୍ରିକେଟର ଜିଓଫ ମାର୍ଶଙ୍କ ବଡ ପୁଅ। ତାଙ୍କ ସାନଭାଇ ମିଚେଲ ମାର୍ଶ ବର୍ତ୍ତମାନର ଅଷ୍ଟ୍ରେଲିଆ ଦଳରେ ଏକ ଗୁରୁତ୍ୱପୂର୍ଣ୍ଣ କ୍ରିକେଟର ଅଛନ୍ତି। ଶନ୍ଙ୍କ ପତ୍ନୀ ରେବିକା ମାର୍ଶ ଚ୍ୟାନେଲ ୭ ର ଜଣେ ସାମ୍ବାଦିକ। ଶନ୍ଙ୍କର ୩ ସନ୍ତାନ ଅଛନ୍ତି।
