ଭଞ୍ଜନଗର,୨୨।୮(ବାବୁଲା ପ୍ରଧାନ):NEET PG ଏବଂ UG ପରୀକ୍ଷା ଫଳ ଇତିମଧ୍ୟରେ ପ୍ରକାଶିତ ହୋଇଛି। ଏନଇଇଟିପିଜିରେ ଭଞ୍ଜନଗର ବାଇପାସ ରୋଡ ବାସିନ୍ଦା ଡ. ଶାଶ୍ବତ ରଥ ସର୍ବଭାରତୀୟ ସ୍ତରରେ ୧୯୪ ରାଙ୍କ ରଖିଛନ୍ତି। ସେ ହେଉଛନ୍ତି ଭଞ୍ଜନଗର କବିସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟର ମୁଖ୍ୟ କିରାଣୀ ଦାମୋଦର ରଥ ଏବଂ ମାତା ସାରଦା କୁମାରୀ ଦାସଙ୍କ ପୁତ୍ର ଅଟନ୍ତି। ଶାଶ୍ୱତଙ୍କ ଏହି ସଫଳତାରେ ପରିବାର ଲୋକ, ସାଙ୍ଗସାଥି ଏବଂ ଅଞ୍ଚଳବାସୀ ଖୁସିବ୍ୟକ୍ତ କରିଛନ୍ତି। ଏଥିସହ ତାଙ୍କୁ ବିଭିନ୍ନ ଆଡୁ ଶୁଭେଚ୍ଛା ଆସୁଛି। ଶାଶ୍ବତ ପୂର୍ବରୁ କଟକ ଏସସିବି ମେଡିକାଲ କଲେଜରେ ଏମବିବିଏସ କରିଥିଲେ। ଗତବର୍ଷ ସେ ଗୋଲ୍ଡ ମ୍ୟାଡଲ ପାଇଥିଲେ। ସେ ଜଣେ ମେଧାବୀ ଛାତ୍ର। ପରୀକ୍ଷା ଫଳ ପ୍ରକାଶିତ ପରେ ଦେଶର ପ୍ରଥମ ବଡ ମେଡିକାଲ କଲେଜ ଦିଲ୍ଲୀରେ ନାମ ଲେଖାଇବା ସୁଯୋଗ ପାଇବେ।
ସେହିଭଳି ଗଞ୍ଜାମ ଜିଲା ଜଗନ୍ନାଥପ୍ରସାଦ ବ୍ଲକ ଝାଡ଼ାଭୂମି ଗ୍ରାମ ନିକଟ କାଳଞ୍ଜି ନୂଆପଲି ଗ୍ରାମର ଶିବାନୀ ବିଷୋୟୀ ନିଟ ୟୁଜି ପ୍ରବେଶିକାରେ ୧୫୭ ରାଙ୍କ ରଖିଛନ୍ତି । ତେଣୁ ସେ କୋରାପୁଟ ସ୍ଥିତ ଶହୀଦ ଲକ୍ଷ୍ମଣ ନାୟକ ମେଡିକାଲ କଲେଜରେ ଏମ୍ବିବିଏସ ନାମ ଲେଖା ପାଇଁ ମନୋନୀତ ହୋଇଛନ୍ତି। ଶିବାନୀ ମଧ୍ୟବିତ୍ତ ପରିବାରର। ତାଙ୍କ ବାପା ଜଣେ ଚାଷୀ ଏବଂ ମାଆ ଜଣେ ଗୃହିଣୀ। ଶିବାନୀ କଠିନ ପରିଶ୍ରମ କରି ଆଜି ଏହି ସଫଳତା ପାଇଛନ୍ତି। ସେ ଝାଡଭୂମି ହାଇସ୍କୁଲରୁ ଦଶମ ଶ୍ରେଣୀରେ ଉତ୍ତୀର୍ଣ୍ଣ ହେବା ପରେ ଜଗନ୍ନାଥପ୍ରସାଦ ଆଞ୍ଚଳିକ ବିଜ୍ଞାନ ମହାବିଦ୍ୟାଳୟରୁ +୨ ପଢ଼ିଥିଲେ । ଯୁକ୍ତ ୨ ପାସ ହେବାପରେ ନିଟ ପ୍ରବେଶିକା ପରୀକ୍ଷା ଦେଇଥିଲେ। ଶିବାନୀଙ୍କ ଏହି ସଫଳତା ପାଇଁ ଅଞ୍ଚଳବାସୀ ଗର୍ବ ଅନୁଭବ କରିଛନ୍ତି।
