ଗୋପବନ୍ଧୁ ନଗର/ବୈଶିଙ୍ଗା,୨୧ା୧(ଡି.ଏନ.ଏ.): ମୟୂରଭଞ୍ଜ ଜିଲା ଗୋପବନ୍ଧୁ ନଗର ବ୍ଲକ ପୁରୁଣା ବାରିପଦା ପଞ୍ଚାୟତ ଅନ୍ତର୍ଗତ ଖଡିକାପଦା ଆଖଣ୍ଡଳମଣି ପୀଠରେ ଅନୁଷ୍ଠିତ ମକର ମେଳା ଉଦ୍ଯାପିତ ହୋଇଯାଇଛି। ପୂଜକ ରଶ୍ମି ରଞ୍ଜନ ହୋତା ଓ ଦିବ୍ୟ ସାଗର ମହାପାତ୍ରଙ୍କ ତତ୍ତ୍ୱାବଧାନରେ ରୁଦ୍ରାଭିଷେକ, ରୁଦ୍ର ଚଣ୍ଡିପାଠ, ହୋମ ଯଜ୍ଞ ପ୍ରଭୃତି ୫ଦିନ ଧରି ଚାଲିଥିଲା। କାର୍ଯ୍ୟକ୍ରମକୁ ବୁଧିଆ ଦଣ୍ଡପାଟ, ବିଦେଶୀ ଚୌଧୁରୀ, ଶକୁନ୍ତଳା ମୁଖୀ, ଭାମା ମଳିକ, ଭାବ ମଳିକଙ୍କ ସମେତ ସ୍ବୟଂ ସହାୟକ ଗୋଷ୍ଠୀର ମହିଳାମାନେ ପରିଚାଳନା କରିଥିଲେ। ସେହିପରି ପଟୁଆ ଓ ସିକିଡିଆଠାରେ ମଧ୍ୟ କମିଟି ପକ୍ଷରୁ ମକର ମେଳା ଅନୁଷ୍ଠିତ ହୋଇଯାଇଛି। ପଟୁଆଠାରେ ଭଜନ ସମାରୋହ ଓ ସିକିଡିଆଠାରେ ଯାତ୍ରା ପରିବେଷଣ ହୋଇଥିଲା।
ବୈଶିଙ୍ଗା ଥାନା ଅଧୀନ ବଣଦାମଦରପୁର ନିକଟସ୍ଥ ଡୁଟୁସାହିଠାରେ ୨୮ତମ ମକର ପର୍ବ ପାଳିତ ହୋଇଯାଇଛି। ଏହି ଉପଲକ୍ଷେ ୩ଦିନ ଧରି ଫୁଟବଲ ମ୍ୟାଚ ଓ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଫାଇନାଲ ମ୍ୟାଚରେ କାକରାପାଳ ଟିମ୍ ଚାମ୍ପିୟନ ହୋଇଥିବା ବେଳେ ଦିଗିନୂଆସାହି ଟିମ ରନର୍ସଅପ ହୋଇଥିଲା। ମୁଖ୍ୟ ଅତିଥି ଭାବେ ଭାଜପା ଜିଲା ସଭାପତି କାନ୍ଦରା ସୋରେନ, ମୁଖ୍ୟବକ୍ତା ବଡ଼ସାହି ବିଧାୟକ ସନାତନ ବିଜୁଳି, ସମ୍ମାନିତ ଅତିଥି ଭାବେ ଓବିସି ମୋର୍ଚ୍ଚା ଜିଲା ସଭାପତି ବ୍ରଜମୋହନ ବେହେରା, ଚନ୍ଦ୍ରହାସ୍ୟ ପାଣିଗ୍ରାହୀ, ବୈଶିଙ୍ଗା ମଣ୍ଡଳ ଯୁବମୋର୍ଚ୍ଚା ସଭାପତି ଉତ୍ସର୍ଗ ବେହେରା, ସର୍ବେଶ୍ୱର ନାୟକ, ରତିକାନ୍ତ ମହାନ୍ତ, କେନ୍ଦୁଆ ପଞ୍ଚାୟତ ସରପଞ୍ଚ ମନମୋହନ ମାଝି ଉପସ୍ଥିତ ରହି କୃତୀ ପ୍ରତିଯୋଗୀମାନଙ୍କୁ ମାନପତ୍ର ଓ ପୁରସ୍କାର ବିତରଣ କରିଥିଲେ। ପ୍ରଶାନ୍ତ ସାମଲ କାର୍ଯ୍ୟକ୍ରମ ପରିଚାଳନା କରିଥିଲେ।
