ଛତ୍ରପୁର/ଗଞ୍ଜାମ,୮ା୯(ସନ୍ତୋଷ ପାଢ଼ୀ/ବିଦ୍ୟାଧର ସାହୁ): ଛତ୍ରପୁର ନିକଟବର୍ତ୍ତୀ ଗଞ୍ଜାମ ବ୍ଲକ କରପଡା ପଞ୍ଚାୟତ ନୀଳାଦ୍ରିପୁର ଗ୍ରାମ ପର୍ବତ ଶିଖରେ ବିରାଜିତ ମା’ ରାମଚଣ୍ଡୀଙ୍କ ପୀଠରେ ଆସନ୍ତା ୧୪ ତାରିଖ ମୂଳାଷ୍ଟମୀରୁ ଷୋଡଶ ଦିନାତ୍ମକ ଶାରଦୀୟ ପୂଜା ଆରମ୍ଭ ହୋଇ ୨୯ ତାରିଖ ମହାଷ୍ଟମୀ ପର୍ଯ୍ୟନ୍ତ ଚାଲିବ।
ମୂଳାଷ୍ଟମୀରେ ସହସ୍ରକୁମ୍ଭାଭିଷେକ ପାଇଁ ଅଞ୍ଚଳବାସୀଙ୍କ ସହଯୋଗରେ ଏକ ବିରାଟ କଳସଯାତ୍ରା ଋଷିକୁଲ୍ୟା ନଦୀରୁ ମା’ ରାମଚଣ୍ଡୀଙ୍କ ମନ୍ଦିରକୁ ଆସିବା ପରେ ପୂଜା ଆରମ୍ଭ କରାଯିବ l ଦୈନିକ ଚଣ୍ଡୀପାଠ, ଚଣ୍ଡୀ ହବନ, ବେଦ ପାଠ, ଭକ୍ତମାନଙ୍କ ପାଇଁ ପ୍ରସାଦ ସେବନ ପାଇଁ ସୁବ୍ୟବସ୍ଥା କରାଯିବ। ପୂଜା ପାଇଁ ମା’ ରାମଚଣ୍ଡୀ ମନ୍ଦିର ଟ୍ରଷ୍ଟ, ପୂଜା କମିଟି ଓ ପରିଚାଳନା କମିଟି ପକ୍ଷରୁ ତତ୍ପରତା ପ୍ରକାଶ ପାଇଛି।
ପୂଜା ସମୟରେ ଆଇନ ଶୃଙ୍ଖଳା ଓ ଭକ୍ତମାନଙ୍କ ସୁରକ୍ଷାକୁ ଦୃଷ୍ଟିରେ ରଖି ପୋଲିସ ନିୟୋଜିତ କରିବା ଲାଗି ଗଞ୍ଜାମ ଥାନା ଆଇଆଇସି ସୁମିତ୍ରା ପାତ୍ର ଏବଂ ଛତ୍ରପୁର ଆଇଆଇସିଙ୍କୁ ଲିଖିତ ଅବଗତ କରାଯାଇଛି। ମନ୍ଦିର ପରିଚାଳନା କମିଟି ସଭାପତି ପ୍ରଶାନ୍ତ କୁମାର ନାୟକ, ପୂଜା କମିଟି ସଭାପତି ସି ଏଚ ଦୟାନନ୍ଦ ରେଡ୍ଡୀ, ସଂଯୋଜକ କମଳ ପଣ୍ଡା, ବରିଷ୍ଠ ପରାମର୍ଶଦାତା ତ୍ରିପତି ବାଲାଜୀ ମିଶ୍ର, ବିମ୍ବାଧର ଚର୍ତ୍ତୀ ପ୍ରମୁଖ ଆଇଆଇସିଙ୍କୁ ଭେଟିଥିଲେ।
