ମୁମ୍ବାଇ,୫।୧: ବେରୋଜଗାରକୁ ନେଇ ଏନସିପି ମୁଖ୍ୟ ଶରଦ ପାୱାର କେନ୍ଦ୍ର ଏବଂ ମହାରାଷ୍ଟ୍ରର ଭାଜପା ସରକାରଙ୍କ ଉପରେ ବର୍ଷିଛନ୍ତି। ପୁଣେରେ ‘ଜନ ଜାଗରଣ ଯାତ୍ରା’ରେ ସେ କହିଛନ୍ତି, ବେକାରୀ ସମସ୍ୟା ସାମାଜିକ ସମସ୍ୟା ସୃଷ୍ଟି କରୁଛି। ଚାକିରି ଅଭାବରୁ ବିବାହ ଯୋଗ୍ୟ ଯୁବକଙ୍କୁ କନ୍ୟା ମିଳୁନାହିଁ। ମୂଲ୍ୟ ବୃଦ୍ଧି ଏବଂ ବେକାରି ଭଳି ପ୍ରକୃତ ପ୍ରସଙ୍ଗରୁ ଦୃଷ୍ଟି ଏଡାଇବା ପାଇଁ ସମ୍ପ୍ରଦାୟ ମଧ୍ୟରେ ମତଭେଦ ସୃଷ୍ଟି କରାଯାଉଛି।
ପୂର୍ବତନ କେନ୍ଦ୍ର କୃଷି ମନ୍ତ୍ରୀ ପାୱାର ଆହୁରି ମଧ୍ୟ କହିଛନ୍ତି, ଆଜିର ଯୁବକମାନେ ଶିକ୍ଷିତ। ତେଣୁ ଚାକିରି ଦାବି କରିବା ସେମାନଙ୍କର ଅଧିକାର ରହିଛି। ଶିଳ୍ପଗୁଡିକ ମହାରାଷ୍ଟ୍ରରୁ ବାହାରକୁ ଯାଉଛନ୍ତି। ଏବେ ରାଜ୍ୟରେ ଥିବା ଶିଳ୍ପଗୁଡିକୁ କୌଣସି ପ୍ରୋତ୍ସାହନ ଦିଆଯାଉ ନାହିଁ ଏବଂ ନୂତନ ବ୍ୟବସାୟ ପ୍ରତିଷ୍ଠା ପାଇଁ କୌଣସି ସୁଯୋଗ ସୃଷ୍ଟି କରାଯାଉ ନାହିଁ। ଫଳରେ ବେକାରି ବୃଦ୍ଧି ପାଉଛି।
‘ଜନ ଜାଗରଣ ଯାତ୍ରା’ ଯାତ୍ରା ସମୟରେ ସେ ଏକ ଗ୍ରାମ ଛକରେ ୨୫ ରୁ ୩୦ ବର୍ଷ ବୟସର ୧୫ ରୁ ୨୦ ଜଣ ଯୁବକଙ୍କୁ ଭେଟିଥିଲେ। ସେମାନଙ୍କ ମଧ୍ୟରେ ଅଧିକାଂଶ ଯୁବକ ସ୍ନାତକ ଏବଂ ସ୍ନାତକତ୍ତୋର। କିନ୍ତୁ ଚାକିରି ନ ଥିବାରୁ ସେମାନଙ୍କୁ କନ୍ୟା ଦେବାକୁ କେହି ପ୍ରସ୍ତୁତ ନ ଥିବା ସେମାନେ କହିଥିଲେ। ମହାରାଷ୍ଟ୍ରର ଗ୍ରାମାଞ୍ଚଳରେ ଏହି ସମସ୍ୟା ଅଧିକ ଶୁଣାଯାଉଛି ବୋଲି ପାଓ୍ବାର କହିଛନ୍ତି।
