ମୁମ୍ବାଇ,୧୭ା୨: ସ୍ବିଡେନର କୁନି କ୍ଲାଇମେଟ୍ ଚେଞ୍ଜ ଆକ୍ଟିଭିଷ୍ଟ ଗ୍ରେଟା ଥନ୍ବର୍ଗଙ୍କ ‘ଟୁଲ୍କିଟ୍’ ମାମଲାରେ ମଙ୍ଗଳବାର ପୁଣେର ଯୁବ ଇଞ୍ଜିନିୟର ଶାନ୍ତନୁ ମୁଲୁକ୍ଙ୍କୁ ବମ୍ବେ ହାଇକୋର୍ଟ ଟ୍ରାଞ୍ଜିଟ୍ ବେଲ୍ ଦେଇଛନ୍ତି। ଏହି ମାମଲାରେ ଦିଲ୍ଲୀ ପୋଲିସ ଖୋଜୁଥିବା ମୁମ୍ବାଇର ଆଇନଜୀବୀ ନିକିତା ଜାକୋବଙ୍କ ଜାମିନ ଆବେଦନର ଶୁଣାଣି ବୁଧବାର ହେବ ବୋଲି ହାଇକୋର୍ଟ ଧାର୍ଯ୍ୟ କରିଛନ୍ତି।
୩ ବିବାଦୀୟ କୃଷି ଆଇନ ପ୍ରତ୍ୟାହାର ଦାବିରେ ଦିଲ୍ଲୀ ସୀମାରେ କୃଷକଙ୍କ ଆନ୍ଦୋଳନକୁ ୩ ମାସ ପୂରିବାକୁ ଯାଉଥିବାବେଳେ ପୋଲିସ ଜଣେ ପରେ ଜଣେ ଆକ୍ଟିଭିଷ୍ଟଙ୍କ ଉପରେ କାର୍ଯ୍ୟାନୁଷ୍ଠାନ ନେବାରେ ଲାଗିଛି। ଫ୍ରାଇଡେ ଫର୍ ଫ୍ୟୁଚର (ଏଫ୍ଏଫ୍ଏଫ୍) ଇଣ୍ଡିଆର ୨୧ ବର୍ଷୀୟା ମୁଖ୍ୟ ଦିଶା ରବିଙ୍କୁ ତାଙ୍କ ବାଙ୍ଗାଲୁରୁସ୍ଥିତ ବାସଭବନରୁ ଶନିବାର ରାତିରେ ଦିଲ୍ଲୀ ପୋଲିସ ଉଠାଇ ୫ ଦିନିଆ ରିମାଣ୍ଡରେ ନେଇଛି। ଏହି କ୍ରମରେ ଦିଲ୍ଲୀ ପୋଲିସର ଅନୁରୋଧ କ୍ରମେ ଜାତୀୟ ରାଜଧାନୀସ୍ଥିତ ଏକ କୋର୍ଟ ଶାନ୍ତନୁ ଓ ନିକିତାଙ୍କ ବିରୋଧରେ ସୋମବାର ଜାମିନ ବିହୀନ ଗିରଫ ପରଓ୍ବାନା (ଏନ୍ବିଡବ୍ଲ୍ୟୁ) ଜାରି କରିଥିଲେ। ଦିଲ୍ଲୀ ପୋଲିସର ଏକ ଟିମ୍ ଦୁହିଙ୍କୁ ଧରିବା ପାଇଁ ମୁମ୍ବାଇରେ ଡେରା ପକାଇଲା। ଶାନ୍ତନୁ ବମ୍ବେ ହାଇକୋର୍ଟଙ୍କ ଔରଙ୍ଗାବାଦ ଖଣ୍ଡପୀଠରେ ଟ୍ରାଞ୍ଜିଟ୍ ବେଲ୍ ପାଇଁ ପିଟିଶନ କରିଥିବାବେଳେ ନିକିତା ମୁମ୍ବାଇରେ ଅଗ୍ରିମ ଜାମିନ ଆବେଦନ କରିଥିଲେ। ଶାନ୍ତନୁଙ୍କ ଓକିଲଙ୍କ ଯୁକ୍ତି ଶୁଣିବା ପରେ ଖଣ୍ଡପୀଠ ତାଙ୍କୁ ୧୦ ଦିନିଆ ଟ୍ରାଞ୍ଜିଟ୍ ବେଲ୍ ଦେଇଛନ୍ତି। ଅନ୍ୟପକ୍ଷେ ସମାନ ମାମଲାରେ ଆଇନଜୀବୀ ନିକିତା ଜାକୋବଙ୍କ ଆଗୁଆ ଜାମିନ ଆବେଦନର ଶୁଣାଣି ଶେଷ କରି ହାଇକୋର୍ଟ ରାୟ ସଂରକ୍ଷିତ ରଖିଛନ୍ତି। ବୁଧବାର ଏହି ରାୟ ପ୍ରକାଶ ପାଇବ।
ପୋଲିସର କହିବା ହେଉଛି କୃଷକ ଆନ୍ଦୋଳନ ଚାଲିଥିବାବେଳେ ଜାନୁୟାରୀ ୨୬ରେ ଟ୍ରାକ୍ଟର ପରେଡ୍ ସମୟରେ ଇଞ୍ଜିନିୟର ଶାନ୍ତନୁ ମୁଲୁକ୍ ଦିଲ୍ଲୀର ଟିକ୍ରି ସୀମାରେ ଉପସ୍ଥିତ ଥିଲେ। ପରଦିନ ସେ ଆନ୍ଦୋଳନସ୍ଥଳ ଛାଡ଼ି ଚାଲିଯାଇଥିଲେ। ଏହା ପୂର୍ବରୁ ଶାନ୍ତନୁ ଓ ନିକିତା ଜଳବାୟୁ ପରିବର୍ତ୍ତନ କର୍ମୀ ଦିଶା ରବିଙ୍କ ସହ ମିଶି କୃଷକ ଆନ୍ଦୋଳନ ସପକ୍ଷରେ ଏକ ଟୁଲ୍କିଟ୍ ତିଆରି କରିଥିଲେ। ସାଧାରଣରେ ଉପଲବ୍ଧ ଏହି ଅନ୍ଲାଇନ୍ ଦସ୍ତାବିଜକୁ ଭାରତର ଛବି ଖରାପ କରିବା ପାଇଁ ପ୍ରସ୍ତୁତ କରାଯାଇଥିଲା। ଖଲିସ୍ତାନୀ ସପକ୍ଷବାଦୀ ଗୋଷ୍ଠୀ ପୋଏଟିକ୍ ଜଷ୍ଟିସ୍ ଫାଉଣ୍ଡେଶନ (ପିଜେଏଫ୍) ସହଯୋଗରେ ଉକ୍ତ ଟୁଲ୍କିଟ୍ ତିଆରି କରାଯାଇଥିଲା ବୋଲି ଦିଲ୍ଲୀ ପୋଲିସର ସାଇବର ସେଲ୍ ଦାବି କରିଛି। ସେହିପରି ପିଜେଏଫ୍ ପକ୍ଷରୁ ଆୟୋଜିତ ଏକ ଜୁମ୍ ମିଟିଂରେ ଦିଶା, ନିକିତା ଓ ଶାନ୍ତନୁ ଯୋଗଦେଇଥିଲେ। ଅଭିଯୁକ୍ତମାନଙ୍କ ମଧ୍ୟରେ ଚାଟ୍ ଗ୍ରୁପ୍ରେ ହୋଇଥିବା କଥୋପକଥନ ମଧ୍ୟ ଦିଲ୍ଲୀ ପୋଲିସ ପାଇଥିବା କହିଛି। ଭାରତରେ ଜଳବାୟୁ ଆନ୍ଦୋଳନ ସହ ଜଡ଼ିତ ଆକ୍ଟିଭିଷ୍ଟମାନଙ୍କ ନାମ ଟୁଲ୍କିଟ୍ରେ ଥିଲା। ତେଣୁ ଏଫ୍ଏଫ୍ଆଇ ପ୍ରତିଷ୍ଠାତା ଗ୍ରେଟା ଥନ୍ବର୍ଗଙ୍କୁ ଦିଶା ଉକ୍ତ ଟୁଲ୍କିଟ୍କୁ ଟୁଇଟରରେ ପୋଷ୍ଟ ନ କରିବା ପାଇଁ କହିଥିଲେ ବୋଲି ପୋଲିସ ଅଭିଯୋଗ ଆଣିଛି।
