ନୂଆଦିଲ୍ଲୀ,୧୭।୮: ୟୁଏଇରେ ଅକ୍ଟୋବରରୁ ଆରମ୍ଭ ହେବାକୁ ଯାଉଛି ଟି-୨୦ ବିଶ୍ୱକପ୍। ଏହାପୂର୍ବରୁ ନ୍ୟୁଜିଲାଣ୍ଡ ଦଳ ନିଜର ପ୍ରସ୍ତୁତି ଆରମ୍ଭ କରିଛି। ଏକ ବଡ଼ ନିଷ୍ପତ୍ତି ସ୍ବରୂପ ଦଳ ପୂର୍ବତନ ଦ୍ରୁତ ବୋଲର ସେନ ବଣ୍ଡଙ୍କୁ କୋଚ୍ ଭାବରେ ନିଯୁକ୍ତ କରିଛି। ବଣ୍ଡ ନ୍ୟୁଜିଲାଣ୍ଡ ଦଳର ଚତୁର୍ଥ ପ୍ରଶିକ୍ଷକ ହେବେ। ବିଶ୍ୱକପ୍ ପୂର୍ବରୁ ସେ ଆଇପିଏଲ୍ର ଦ୍ୱିତୀୟ ସିଜିନ୍ ପାଇଁ ମୁମ୍ବାଇ ଇଣ୍ଡିଆନ୍ସ ସହ ରହିବେ। ଏହାପରେ ସେ ଭାରତ ବିପକ୍ଷ ତିନି ମ୍ୟାଚ୍ ବିଶିଷ୍ଟ ଟି ୨୦ ସରିଜ ପାଇଁ ନ୍ୟୁଜିଲାଣ୍ଡ ଦଳ ସହ ରହିବେ। ବଣ୍ଡ ଦଳ ସହ ଯୋଡ଼ି ହେବା ପରେ ନ୍ୟୁଜିଲାଣ୍ଡର ଭାଗ୍ୟ କେତେ ବଦଳିବ ତାହା ସମୟ କହିବ। ତେବେ ତାଙ୍କ ଯୋଗଦାନ ନେଇ ନ୍ୟୁଜିଲାଣ୍ଡର ମୁଖ୍ୟ କୋଚ୍ ଗ୍ୟାରି ଷ୍ଟେଡ୍ କହିଛନ୍ତି, ବଣ୍ଡଙ୍କ ଅଭିଜ୍ଞତା ଯୋଗୁ ଦଳ ଉପକୃତ ହେବ। ସେ ଆମ ସହ ପୂର୍ବରୁ ଅଛନ୍ତି। ଏଣୁ ସେ ଆମକୁ ବୁଝନ୍ତି। ବିଶ୍ୱକପ୍ ପୂର୍ବରୁ ସେ ୟୁଏଇରେ ରହିବେ। ତାଙ୍କୁ ଅନୁଭବ ଦଳ ପାଇଁ ଲାଭଦାୟକ ହେବ। ସେ ବିଶେଷଭାବେ ବୋଲରଙ୍କ ସହ କାର୍ଯ୍ୟ କରିବେ। ସ୍ପିନ ଏବଂ ଦ୍ରୁତ ବୋଲରମାନଙ୍କୁ ନିଜର ଯୋଜନା ପ୍ରସ୍ତୁତିରେ ସାହାଯ୍ୟ କରିବେ। ଆମକୁ ଅନ୍ୟ ଦଳଠାରୁ ଗୋଟିଏ ପାଦ ଆଗରେ ରହିବାର ଆବଶ୍ୟକତା ରହିଛି ବୋଲି ସେ କହିଛନ୍ତି।
