ନୂଆଦିଲ୍ଲୀ,୨୨।୧୧ : ମହମ୍ମଦ ଶାମି ସମଗ୍ର ବିଶ୍ୱକପରେ ପ୍ରାଧାନ୍ୟ ବିସ୍ତାର କରିଥିଲେ। ଟୁର୍ନାମେଣ୍ଟରେ ସର୍ବାଧିକ ୱିକେଟ ନେଇ ଶାମି ଭାରତର ଶ୍ରେଷ୍ଠ ବୋଲର ହୋଇଥିଲେ। ସମଗ୍ର ବିଶ୍ୱକପରେ ଟିମ ଇଣ୍ଡିଆର ପ୍ରଦର୍ଶନ ଅତ୍ୟନ୍ତ ଭଲ ଥିଲା, କିନ୍ତୁ ବିଶ୍ୱକପ ଫାଇନାଲରେ ଟିମ ଇଣ୍ଡିଆକୁ ଅଷ୍ଟ୍ରେଲିଆ ବିପକ୍ଷରେ 6 ୱିକେଟ ହରାଇ ପରାଜୟର ସମ୍ମୁଖୀନ ହେବାକୁ ପଡିଲା।
ଏସବୁ ମଧ୍ୟରେ ଶାମି ଏକ ସାକ୍ଷାତକାରରେ ତାଙ୍କ ଜୀବନ ବିଷୟରେ କହିଥିଲେ। ଏଥିରେ ସେ ତାଙ୍କ କ୍ୟାରିୟର ବିଷୟରେ ଗୁରୁତ୍ୱପୂର୍ଣ୍ଣ ତଥ୍ୟ ପ୍ରକାଶ କରିଛନ୍ତି ଯାହା ଅନେକ କ୍ରିକେଟ ପ୍ରଶଂସକ ଜାଣି ନ ଥିଲେ। ଶାମି କହିଥିଲେ ତାଙ୍କ କ୍ୟାରିୟରରେ ଏପରି ଏକ ସମୟ ଆସିଥିଲା ଯେତେବେଳେ ଡାକ୍ତରମାନେ ତାଙ୍କୁ କହିଥିଲେ ସେ ଆଉ ଖେଳି ପାରିବେ ନାହିଁ। ସେ କହିଥିଲେ ମୁଁ ୨ ଘଣ୍ଟା ପାଇଁ ଚେତାଶୂନ୍ୟ ଥିଲି, ଡାକ୍ତର ମୋତେ ନ ଖେଳିବାକୁ କହିଥିଲେ। ମତେ କ୍ରମାଗତ ଭାବରେ ଇଞ୍ଜେକ୍ସନ ନେବାକୁ ପଡିଥିଲା। ୨୦୧୫ ବିଶ୍ୱକପ ପୂର୍ବରୁ ମୋ ଆଣ୍ଠୁ ଫୁଲି ଯାଇଥିଲା। ଏଭଳି ପରିସ୍ଥିତିରେ ଶେଷ ବିକଳ୍ପ ଥିଲା ଆଣ୍ଠୁ ଅସ୍ତ୍ରୋପଚାର। ଅସ୍ତ୍ରୋପଚାର କରି କ୍ରିକେଟ ଖେଳିବା ଜାରି ରଖିଥିଲି ।
ପ୍ରତ୍ୟେକ ମ୍ୟାଚ ପରେ ମୁଁ ଡାକ୍ତରଖାନା ଯାଇ ଇଞ୍ଜେକ୍ସନ ନେଉଥିଲି। ୨୦୧୫ ବିଶ୍ୱକପରେ, ଯଦି ମୋ ସ୍ଥାନରେ ଅନ୍ୟ କୌଣସି ଖେଳାଳି ଥାଆନ୍ତେ, ମୁଁ ଖେଳି ନ ଥାନ୍ତି। ମୁଁ ଯନ୍ତ୍ରଣା ସହିଥିଲି ଏବଂ ଖେଳିଲି। ମୋର ଦୁଇଟି ବିକଳ୍ପ ଥିଲା କିନ୍ତୁ ବିଶ୍ରାମ ନେବା ପରିବର୍ତ୍ତେ ମୁଁ ଦେଶ ପାଇଁ ଖେଳିବା ଚୟନ କରିଥିଲା। ମୁଁ ଦୁଇ ଘଣ୍ଟା ଧରି ଚେତାଶୂନ୍ୟ ହୋଇଥିଲି। କିନ୍ତୁ ଯେତେବେଳେ ମୁଁ ଉଠିଲି, ମୁଁ ସିଧାସଳଖ ଡାକ୍ତରଙ୍କୁ ପଚାରିଲି ମୁଁ କେବେ ପୁନର୍ବାର ଖେଳିବା ଆରମ୍ଭ କରିପାରିବି? ଡାକ୍ତର କହିଥିଲେ, ତୁମେ ଯଦି ଚାଲିପାରିବ ତାହା ବଡ କଥା। ତୁମକୁ ଖେଳିବା ବନ୍ଦ କରିବାକୁ ପଡିବ। ଏହା ପରେ ସବୁକିଛି ମୋର ପୂର୍ବପରି ମୋ ସ୍ଥିତି ଫେରି ପାଇବା ଉପରେ ନିର୍ଭର କରିଥିଲା।
