ଜୟପୁର/ନୂଆଦିଲ୍ଲୀ, ୧୧ା୪: ରାଜସ୍ଥାନରେ ପୂର୍ବର ଭାଜପା ଶାସନ ଅମଳରେ ହୋଇଥିବା ଦୁର୍ନୀତି ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ବରିଷ୍ଠ କଂଗ୍ରେସ ନେତା ସଚିନ ପାଇଲଟ ମଙ୍ଗଳବାର ଅନଶନରେ ବସିବେ। ବସୁନ୍ଧରା ରାଜେଙ୍କ ସମୟର ଦୁର୍ନୀତି ବିରୋଧରେ ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ଲଢ଼େଇ କରୁଛନ୍ତି। ସେ ଅନ୍ୟ କାହାକୁ ଟାର୍ଗେଟ କରୁନାହାନ୍ତି ବୋଲି ତାଙ୍କ ଘନିଷ୍ଠ ସୂତ୍ରରୁ କୁହାଯାଇଛି। ରାହୁଲ ଗାନ୍ଧୀ ଯେପରି ଆଦାନୀ ଗ୍ରୁପ୍ ଦୁର୍ନୀତି ବିରୋଧରେ ଲଢ଼େଇ ଚଳାଇଛନ୍ତି, ସେହିପରି ବସୁନ୍ଧରା ସରକାରଙ୍କ ଦୁର୍ନୀତିକୁ ସଚିନ ପ୍ରସଙ୍ଗ କରିଥିବା କୁହାଯାଉଛି।
ଅନ୍ୟପକ୍ଷରେ ଚଳିତ ବର୍ଷ ଶେଷ ଭାଗରେ ରାଜସ୍ଥାନ ବିଧାନସଭା ନିର୍ବାଚନ ହେବାକୁ ଥିବାବେଳେ ସଚିନଙ୍କ କାର୍ଯ୍ୟକୁ ନେଇ ଦଳ ଭିତରେ ଆଶଙ୍କା ବୃଦ୍ଧି ପାଇଛି। ତାଙ୍କ ବିରୋଧୀ ଭାବେ ଜଣାଶୁଣା ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ପାଇଁ ସଚିନଙ୍କର ଏହା ନୂଆ ଚ୍ୟାଲେଞ୍ଜ ବୋଲି କୁହାଯାଉଛି।
