ନୂଆଦିଲ୍ଲୀ, ୬।୧ : କେନ୍ଦ୍ରୀୟ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ସମସ୍ତ ଏମ୍ପିମାନଙ୍କୁ ଚିଠି ଲେଖି ଭାରତୀୟ ଦଣ୍ଡବିଧି ସଂହିତା (ଆଇପିସି), ଆପରାଧିକ ଦଣ୍ଡ ପ୍ରଦାନ ପ୍ରକିୟା ସଂହିତା (ସିଆର୍ପିସି) ଏବଂ ଭାରତୀୟ ସାକ୍ଷ୍ୟ ଅଧିନିୟମରେ ସଂଶୋଧନ ଲାଗି ମତାମତ ଲୋଡିଛନ୍ତି।
ଶାହା ଏମ୍ପିମାନଙ୍କୁ ଲେଖିଥିବା ଚିଠିରେ ଉଲ୍ଲେଖ କରିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଭାରତ ସରକାର ‘ସବ୍କା ସାଥ, ସବ୍କା ବିକାଶ, ସବ୍କା ବିଶ୍ୱାସ, ସବ୍କା ପ୍ରୟାସ’ ମନ୍ତ୍ର ସହିତ ସମସ୍ତଙ୍କୁ ଶୀଘ୍ର ନ୍ୟାୟ ପ୍ରଦାନ କରିବାକୁ ପ୍ରତିଶ୍ରୁତିବଦ୍ଧ।
ସାମ୍ବିଧାନିକ ଏବଂ ଗଣତାନ୍ତ୍ରିକ ଆକାଂକ୍ଷା ଅନୁଯାୟୀ, ଭାରତର ନାଗରିକମାନଙ୍କ ପାଇଁ, ବିଶେଷକରି ଦୁର୍ବଳ ଏବଂ ପଛୁଆ ବର୍ଗର ଲୋକମାନଙ୍କ ପାଇଁ ଶୀଘ୍ର ନ୍ୟାୟିକ ପ୍ରକିୟା ଅପରିହାର୍ଯ୍ୟ। ସେ କହିଛନ୍ତି ଯେ ଅପରାଧିକ ଆଇନର ଢାଞ୍ଚାରେ ବ୍ୟାପକ ପରିବର୍ତ୍ତନ ଆଣିବାକୁ ଭାରତ ସରକାର ନିଷ୍ପତ୍ତି ନେଇଛନ୍ତି।
ଭାରତୀୟ ଗଣତନ୍ତ୍ରର ସାତ ଦଶନ୍ଧିର ଅଭିଜ୍ଞତା ଭାବେ ଆମର ଅପରାଧିକ ଆଇନ, ବିଶେଷକରି ୧୮୬୦ର ଭାରତୀୟ ଦଣ୍ଡବିଧି ସଂହିତା (ଆଇପିସି), ୧୯୭୩ର ଆପରାଧିକ ଦଣ୍ଡ ପ୍ରଦାନ ପ୍ରକିୟା ସଂହିତା (ସିଆର୍ପିସି) ଏବ ୧୯୭ର ଭାରତୀୟ ସାକ୍ଷ୍ୟ ଅଧିନିୟମ ଆମ ଲୋକମାନଙ୍କର ସମସାମୟିକ ଆବଶ୍ୟକତା ଏବଂ ଆକାଂକ୍ଷା ସହିତ ସେମାନଙ୍କୁ ନ୍ୟାୟ ପ୍ରଦାନରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ।
ତେଣୁ ଏସବୁର ସମୀକ୍ଷା ଜରୁରୀ ହୋଇ ପଡ଼ିଛି ବୋଲି ଶାହା ଚିଠିରେ ଉଲ୍ଲେଖ କରିଛନ୍ତିି।
ଏହା ବ୍ୟତୀତ ଶାହା ଲେଖିଛନ୍ତି ଯେ କେନ୍ଦ୍ର ସରକାର ଏକ ଲୋକ-କେନ୍ଦ୍ରିକ ଆଇନଗତ ସଂରଚନା ଗଠନ କରିବାକୁ ଚାହୁଁଛନ୍ତି। ଏସମ୍ପର୍କିତ ପରାମର୍ଶ ପାଇଁ ଭାରତର ପ୍ରଧାନ ବିଚାରପତି, ହାଇକୋର୍ଟର ମୁଖ୍ୟ ଜଷ୍ଟିସ, ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀ, ୟୁନିଅନ ଟେରିଟୋରୀ, ବାର୍ କାଉନସିଲ ଏବଂ ଆଇନ ବିଶ୍ୱବିଦ୍ୟାଳୟର ପ୍ରଶାସକଙ୍କୁ ଅନୁରୋଧ କରି ଶାହା କହିଛନ୍ତି ଯେ ଅପରାଧିକ ନ୍ୟାୟ ବ୍ୟବସ୍ଥାରେ ଏକ ଆଦର୍ଶ ପରିବର୍ତ୍ତନ ଆଣିବାକୁ ଚେଷ୍ଟା କରାଯାଉଛି।
ସେ କହିଛନ୍ତି ଯେ ମତାମତ ଏବଂ ପରାମର୍ଶ ଗ୍ରହଣ କରିବା ପରେ ସ୍ବରାଷ୍ଟ୍ରମନ୍ତ୍ରଣାଳୟ ଅପରାଧିକ ଆଇନକୁ ସମ୍ପୂର୍ଣ୍ଣ ରୂପେ ସଂଶୋଧନ କରିବାକୁ ଚାହୁଁଛନ୍ତି। ଗଣତନ୍ତ୍ରର ତିନୋଟି ସ୍ତମ୍ଭ ମଧ୍ୟରୁ ସଂସଦର ମହତ୍ତ୍ୱ ଉପରେ ଗୁରୁତ୍ୱ ଦେଇ ଶାହା କହିଛନ୍ତି ଯେ ଆଇନ ତିଆରି ପ୍ରକ୍ରିୟାରେ ସଂସଦର ପ୍ରତି ସଦସ୍ୟଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଛି।
ଶାହା କହିଛନ୍ତି ଯେ ଅପରାଧିକ ଆଇନରେ ବ୍ୟାପକ ସଂଶୋଧନ କରିବାର ଏହି ପ୍ରୟାସରେ ସଂସଦର ପ୍ରତି ସଦସ୍ୟଙ୍କ ପରାମର୍ଶ ଅମୂଲ୍ୟ ପ୍ରମାଣିତ ହେବ।
