ବଇଣ୍ଡା, ୧୮ା୧୨ (ପରିକ୍ଷିତ ସାହୁ): ସରକାରୀ ଡାକ୍ତରଖାନା ହୋଇଥିବାରୁ ଚିକିତ୍ସାରେ ନାନା ସୁବିଧାର ସୁଯୋଗ ନେବାକୁ ଆସୁଛନ୍ତି ରୋଗୀ। ହେଲେ ମେଡିକାଲରେ ପହଞ୍ଚିବା ପରେ ଧାରଣା ବଦଳି ଯାଉଛି ସେମାନଙ୍କର। ଡାକ୍ତରଙ୍କୁ ଦେଖା କରିବା ତ ଦୂରର କଥା ନର୍ସ କି କମ୍ପାଉଣ୍ଡର ନ ଥିବା ଶୁଣିବା ପରେ ନିରାଶରେ ଅନ୍ୟତ୍ର ଯିବାକୁ ପଡ଼ୁଛି ସେମାନଙ୍କୁ। ଏପରି ଅବ୍ୟବସ୍ଥାର ଚିତ୍ର ଦେଖିବାକୁ ମିଳୁଛି ଅନୁଗୋଳ ଜିଲା କିଶୋରନଗର ବ୍ଲକ ହଣ୍ଡପା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ। ସମସ୍ତ ଭିତ୍ତିଭୂମି ଥାଇ ବି ଏହି ସ୍ବାସ୍ଥ୍ୟକେନ୍ଦ୍ରରୁ ରୋଗୀଙ୍କୁ ସେବା ମିଳୁ ନ ଥିବାରୁ ଅସନ୍ତୋଷ ପ୍ରକାଶ ପାଇଛି। ଏ ନେଇ ସ୍ଥାନୀୟ ଅଞ୍ଚଳବାସୀ ରାଜ୍ୟ ସ୍ବାସ୍ଥ୍ୟମନ୍ତ୍ରୀଙ୍କ ଠାରୁ ଆରମ୍ଭ କରି ଜିଲା ପ୍ରଶାସନ, ଆଠମଲ୍ଲିକ ବିଧାୟକ, ସମ୍ବଲପୁର ଏମ୍ପିଙ୍କୁ ଅଭିଯୋଗ କରିଥିଲେ ମଧ୍ୟ ସୁଫଳ ମିଳୁନାହିଁ। ସମସ୍ୟା ସମ୍ପର୍କରେ ହଣ୍ଡପା ଗ୍ରାମବାସୀ ଶନିବାର ଅନୁଗୋଳ ଜିଲାପାଳଙ୍କୁ ଅଭିଯୋଗ ପତ୍ର ମାଧ୍ୟମରେ ଅବଗତ କରାଇଛନ୍ତି।
ଗ୍ରାମବାସୀଙ୍କ କହିବା ଅନୁଯାୟୀ, ଏହି ସ୍ବାସ୍ଥ୍ୟକେନ୍ଦ୍ର ଉପରେ ହଣ୍ଡପା, ବିଲେଇନାଳି, ଲୁହାମୁଣ୍ଡା, କଟରଙ୍ଗା, ନାକିଚି ପଞ୍ଚାୟତର ୩୦ ହଜାର ଲୋକ ନିର୍ଭରଶୀଳ। ଏଠାରେ ମୃତଦେହ ବ୍ୟବଚ୍ଛେଦ ବ୍ୟବସ୍ଥା ଥିବାରୁ ସ୍ବାସ୍ଥ୍ୟକେନ୍ଦ୍ରର ଗୁରୁତ୍ୱ ଯଥେଷ୍ଟ ଅଧିକ। କିଶୋରନଗର ଓ ହଣ୍ଡପା ଥାନା ଅଞ୍ଚଳର ସମସ୍ତ ଅପମୃତ୍ୟୁ, ହତ୍ୟା, ଦୁର୍ଘଟଣାରେ ମୃତଦେହ ଏଠାରେ ବ୍ୟବଚ୍ଛେଦ କରାଯାଉଛି। କିନ୍ତୁ ଡାକ୍ତର ନ ଥିବା ଯୋଗୁ ଠିକ୍ ସମୟରେ ବ୍ୟବଚ୍ଛେଦ ହେଇପାରୁ ନାହିଁ। ଏହି ସ୍ବାସ୍ଥ୍ୟକେନ୍ଦ୍ରରେ ନିଯୁକ୍ତ ହୋଇଥିବା ଡାକ୍ତର ଉଚ୍ଚ ଶିକ୍ଷା ପାଇଁ ଯାଇଥିବା ବେଳେ ଆୟୁଷ ଡାକ୍ତର, କମ୍ପାଉଣ୍ଡର, ଷ୍ଟାଫ ନର୍ସ ପଦବୀ ଖାଲି ପଡିଛି। ଜଣେ ମାତ୍ର ପୁରୁଷ ସ୍ବାସ୍ଥ୍ୟକର୍ମୀ ଥିଲେ ବି ରୋଗୀମାନେ ସ୍ବାସ୍ଥ୍ୟ ସେବା ନ ପାଇ ଫେରିଯାଉଛନ୍ତି। ବିଶେଷକରି ଷ୍ଟାଫ ନର୍ସ ନ ଥିବା ଯୋଗୁ ଗ୍ରାମାଞ୍ଚଳରୁ ଆସୁଥିବା ଗର୍ଭବତୀମାନେ କିଶୋରନଗର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଯିବାକୁ ବାଧ୍ୟ ହେଉଛନ୍ତି। ସାମାନ୍ୟ ଥଣ୍ଡା, ଜ୍ୱର ରୋଗୀ ୭ କି.ମି. ଦୂର ବଇଣ୍ଡା ନଚେତ ୫୦ କି.ମି. ଦୂର ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟକୁ ଯାଇ ଅଯଥା ଖର୍ଚ୍ଚାନ୍ତରେ ପଡ଼ୁଛନ୍ତି। ସରକାରଙ୍କ ପକ୍ଷରୁ ଆସୁଥିବା ଔଷଧ ମଧ୍ୟ ଠିକ୍ ଭାବେ ମିଳୁନାହିଁ। ତୁରନ୍ତ ସ୍ଥାୟୀ ଡାକ୍ତର ନିଯୁକ୍ତ କରା ନ ଗଲେ ଆନ୍ଦୋଳନ କରାଯିବ ବୋଲି ହଣ୍ଡପା ଗ୍ରାମବାସୀ ଚେତାବନୀ ଦେଇଛନ୍ତି। ଏ ନେଇ ଜିଲା ସ୍ବାସ୍ଥ୍ୟ ଅଧିକାରୀ ଅଭୟ ଚରଣ ସାଇଁ କହିଛନ୍ତି, ଜିଲାରେ ୪୦ ପ୍ରତିଶତ ଡାକ୍ତର ପଦବୀ ଖାଲି ରହିଛି। ସମସ୍ୟା ନେଇ ସରକାରଙ୍କୁ ଅବଗତ କରାଯାଇଛି। ଖୁବ୍ଶୀଘ୍ର ଡାକ୍ତର ପଦପୀ ପୂରଣ କରାଯିବ।
