ନୂଆଦିଲ୍ଲୀ,୨।୧୨: ଦକ୍ଷିଣ ଆଫ୍ରିକାରେ ପ୍ରଥମେ ଚିହ୍ନଟ ହୋଇଥିବା କରୋନାର ନୂତନ ଭାରିଆଣ୍ଟ୍ ଇତିମଧ୍ୟରେ ଆମେରିକାେ ସମେତ ୨୫ ଦେଶରେ ପହଞ୍ଚିଛି। ଓମିକ୍ରନ ଭାରିଆଣ୍ଟର ବଢୁୁଥିବା ବିପଦକୁ ଦୃଷ୍ଟିରେ ରଖି ଭାରତରେ ଏହାର କରୋନା ଟିକା କୋଭିଶିଲ୍ଡର ବୁଷ୍ଟର୍ ଡୋଜ ପ୍ରସ୍ତୁତି ପାଇଁ ସେରମ ଇନଷ୍ଟିଚ୍ୟୁଟ ଅଫ ଇଣ୍ଡିଆ ପକ୍ଷରୁ ଡ୍ରଗ୍ କଣ୍ଟ୍ରୋଲର ଜେନେରାଲ ଅଫ୍ ଇଣ୍ଡିଆ (ଡିସିଜିଆଇ) ଙ୍କଠାରୁ ଅନୁମୋତି ଲୋଡାଯାଇଛି।
କିଛି ଅଧିକାରୀଙ୍କ କହିବାନୁସାରେ, କରୋନା ଭାଇରସ, ଓମିକ୍ରନ ଭାରିଆଣ୍ଟର ସଂକ୍ରମଣ ରୋକିବା ଲାଗି ବୁଷ୍ଟର ଡୋଜ୍ ଲାଗି ସ୍ବୀକୃତି ମାଗିଛି। କେନ୍ଦ୍ର ସରକାର ସଂସଦକୁ ସୂଚନା ଦେଇଛନ୍ତି ଯେ କରୋନା ମହାମାରୀ ଉପରେ ଗଠିତ ନ୍ୟାଶନାଲ ଟେକ୍ନିକାଲ ଗ୍ରୁପ୍ ଆଣ୍ଡ ଇମ୍ୟୁନାଇଜେଶନ ଏବଂ ନ୍ୟାଶନାଲ ଏକ୍ସପର୍ଟ ଗ୍ରୁପ୍ ମଧ୍ୟ ବୁଷ୍ଟର ଡୋଜର ବୈଜ୍ଞାନିକ ଦିଗ ଉପରେ ବିଚାର କରୁଛନ୍ତି।
ରାଜସ୍ଥାନ, ଛତିଶଗଡ, କର୍ଣ୍ଣାଟକ ଏବଂ କେରଳ ଭଳି ରାଜ୍ୟ ମଧ୍ୟ ଓମିକ୍ରନ ଭାରିଆଣ୍ଟ ଆସିବା ପରେ ବୁଷ୍ଟର ଡୋଜ ପାଇଁ କେନ୍ଦ୍ର ସରକାରଙ୍କ ଅନୁମୋଦନ ଲାଗି ଦାବି କରିଛନ୍ତି। ନିକଟରେ ଏକ ଟିଭି ଚ୍ୟାନେଲକୁ ଦେଇଥିବା ଏକ ସାକ୍ଷାତକାରରେ ସେରମ ଇନଷ୍ଟିଚ୍ୟୁଟର ମୁଖ୍ୟ ଅଦାର ପୁନାୱାଲା କହିଛନ୍ତି ଯେ ସମ୍ଭବତଃ ଅକ୍ସଫୋର୍ଡ ବୈଜ୍ଞାନିକମାନେ ଏକ ନୂତନ ଟିକା ଖୋଜୁଛନ୍ତି। ଯାହା ଏହି ଓମିକ୍ରନ୍ ଲଢ଼େଇରେ ବୁଷ୍ଟର ଡୋଜ୍ ଭଳି କାର୍ଯ୍ୟ କରିବାକୁ ସକ୍ଷମ ହୋଇପାରିବ।
ସୂଚନାଯୋଗ୍ୟ, ବିଶ୍ୱ ସ୍ବାସ୍ଥ୍ୟ ସଂଗଠନ ଅନୁଯାୟୀ, ଓମିକ୍ରନ୍ ଭାରିଆଣ୍ଟ୍ ସର୍ବାଧିକ ପରିବର୍ତ୍ତନଶୀଳ। ସବୁଠାରୁ ଭୟଙ୍କର ବିଷୟ ହେଉଛି ଯେ, ଏହି ଭାରିଆଣ୍ଟର ସ୍ପାଇକ ପ୍ରୋଟିନ ସର୍ବାଧିକ ପରିବର୍ତ୍ତନ କରିଥାଏ। ତେଣୁ ଏହା ପୂର୍ବର ସମସ୍ତ ଭାରିଆଣ୍ଟ ତୁଳନାରେ ଅଧିକ ଦ୍ରୁତ ଗତିରେ ସଂକ୍ରମଣ କରିବାକୁ ସକ୍ଷମ। ଦକ୍ଷିଣ ଆଫ୍ରିକାର ସ୍ବାସ୍ଥ୍ୟ ଅଧିକାରୀଙ୍କ ଅନୁଯାୟୀ, ଉଭୟ ଡୋଜ୍ ନେଇଥିବା ଲୋକେ ଓମିକ୍ରନ୍ରେ ଆକ୍ରାନ୍ତ ହୋଇଛନ୍ତି।
