ଭଦ୍ରକ,୧୨ା୧(ସନାତନ ରାଉତ): ପାଟ୍ରୋଲିଂ ସମୟରେ ଭଦ୍ରକ ଗ୍ରାମାଞ୍ଚଳ ପୋଲିସକୁ ଏକ ବଡ଼ ସଫଳତା ମିଳିଛି। ୧୫.୬ ଗ୍ରାମର ବ୍ରାଉନସୁଗାର ଜବତ ହେବା ସହ ୨ ଜଣଙ୍କୁ ଗିରଫ କରାଯାଇଛି।
ସୂଚନାନୁଯାୟୀ, ଗୁରୁବାର ରାତିରେ ପାଟ୍ରୋଲିଂ ସମୟରେ ଚରମ୍ପା ମାଷ୍ଟର କଲୋନୀ ବଉଳପୋଖରୀଠାରେ ୨ ଯୁବକ ବୁଲୁଥିବାର ଦେଖି ପୋଲିସର ସନ୍ଦେହ ସୃଷ୍ଟି ହୋଇଥିଲା। ପୋଲିସ ସେମାନଙ୍କୁ ତଲାସୀ ନେବା ପରେ ବ୍ରାଉନସୁଗାର ବାହାରିବାରୁ ଗିରଫ କରି ଥାନାକୁ ଆଣିଥିଲା। ୨ ଗିରଫ ଅଭିଯୁକ୍ତ ହେଉଛନ୍ତି ପୁରୁଣାବଜାର ଥାନା ଛକର ସେକ୍ ଇଫତେଖାର ଓ ସମ୍ବଲପୁର ଜିଲା ଧନୁପାଲି ଥାନା ସୁନାପାଲିର ମହମ୍ମଦ ଇମ୍ରାନ ବୋଲି ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି ଏସ୍ଡିପିଓ ସୌରଭ ଓତା। ଇଫତେଖାରଙ୍କଠାରୁ ୬.୩ ଗ୍ରାମର ବ୍ରାଉନ ସୁଗାର ଓ ଇମ୍ରାନଙ୍କଠାରୁ ୯.୩ ଗ୍ରାମର ବ୍ରାଉନସୁଗାର ଓ ଗୋଟିଏ ମୋବାଇଲ ଜବତ କରାଯାଇଛି। ଉଭୟଙ୍କୁ ଶୁକ୍ରବାର କୋର୍ଟ ଚାଲାଣ କରାଯିବ। ସମ୍ମିଳନୀରେ ଥାନାଧିକାରୀ ଅମିତାଭ ଦାଶ ଉପସ୍ଥିତ ଥିଲେ।
