କେନ୍ଦୁଝର,୬ା୨(ସ୍ବ.ପ୍ର.): କେନ୍ଦୁଝର ପୁରୁଣା ସହର ଶ୍ରୀ ଶ୍ରୀ ବଳଦେବଜୀଉ ମନ୍ଦିର ପରିସରରୁ ପ୍ରାୟ ୪ଟି ଚନ୍ଦନ ଗଛ ଚୋରି ହୋଇଥିବାରୁ ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ମନ୍ଦିର ପରିସରରେ ସିସିଟିଭି ଲାଗିଥିବା ବେଳେ ସୁରକ୍ଷା ବଳ ନିୟୋଜିତ ସତ୍ତ୍ୱେ କିଭଳି ଚୋରି ହୋଇଛି ଏ ନେଇ ଯାଞ୍ଚ ପରେ ସବୁ ଜଣାପଡ଼ିବ ବୋଲି ଉପଜିଲାପାଳ ତଥା ଦେବୋତ୍ତର ବିଭାଗ ନିର୍ବାହୀ ଅଧିକାରୀ ରାମଚନ୍ଦ୍ର କିସ୍କୁ କହିଛନ୍ତି। କିଛିଦିନ ତଳେ ଆନନ୍ଦପୁରସ୍ଥିତ ମା’ ଥାନପତି ମନ୍ଦିର ପରିସରରୁ ଗୋଟିଏ ଚନ୍ଦନ ଗଛ ଚୋରି ହୋଇଥିବା ବେଳେ ଚମ୍ପୁଆସ୍ଥିତ ନିକୋଲଶନ ଫରେଷ୍ଟ ଟ୍ରେନିଂ ସ୍କୁଲ ପରିସରରୁ ୧୧ଟି ଚନ୍ଦନ ଗଛ ଚୋରି ହୋଇଥିବା ଜଣାପଡ଼ିଛି। କେତେକ ଚୋରି ବିଭାଗର ବିଫଳତା ପାଇଁ ରିପୋର୍ଟ ହେଉ ନ ଥିବାରୁ ବହୁ ଚୋରି ଜଣା ପଡୁନାହିଁ ବୋଲି ମତ ପ୍ରକାଶ ପାଇଛି। ଫଳରେ ଜିଲାରେ ଚନ୍ଦନ କାଠ ମାଫିଆ ସକ୍ରିୟ ହୋଇ ପଡ଼ିଥିବାବେଳେ ବନ ଓ ପୋଲିସ ବିଭାଗ ଧରିବାରେ ବିଫଳ ହେଉଥିବାରୁ ପୁଣି ଅନ୍ୟ ସ୍ଥାନରେ ଚୋରି ହେବା ଆଶଙ୍କା ନେଇ ସାଧାରଣ ଲୋକେ ଚିନ୍ତିତ ହୋଇ ପଡ଼ିଛନ୍ତି।
