ନୂଆଦିଲ୍ଲୀ,୧୨ା୯:ଚନ୍ଦ୍ର ମିଶନର ସଫଳତା ପରେ ଭାରତୀୟ ବୈଜ୍ଞାନିକମାନେ ଏବେ ସମୁଦ୍ରାୟନ ପ୍ରୋଜେକ୍ଟ ଲାଗି ପ୍ରସ୍ତୁତ ହେଉଛନ୍ତି। ଏହି ପ୍ରୋଜେକ୍ଟ ଅଧୀନରେ ୩ଜଣ ଲୋକଙ୍କୁ ସମୁଦ୍ରର ୬ହଜାର ମିଟର ଗଭୀରକୁ ଏକ ବୁଡ଼ା ଜାହାଜ ସାହଯ୍ୟରେ ଛଡ଼ାଯିବ। ଏହି ଯନ୍ତ୍ରର ନାମ ‘ମତ୍ସ୍ୟ ୬୦୦୦’। ଏହା ସମୁଦ୍ରର ଗଭୀରତା ମଧ୍ୟରୁ ନିକେଲ୍, ମାଙ୍ଗାନିଜ୍, କୋବାଲ୍ଟ ଭଳି ମୂଲ୍ୟବାନ ଧାତୁ ତଥା ଖଣିଜ ପଦାର୍ଥର ସନ୍ଧାନ କରିବ। ‘ମସତ୍ୟ ୬୦୦୦’କୁ ପ୍ରସ୍ତୁତ କରିବା ଲାଗି ପ୍ରାୟ ୨ବର୍ଷ ଲାଗିଥିଲା। ବଙ୍ଗୋପସାଗର ତଥା ଚେନ୍ନାଇ ଉପକୂଳରେ ୨୦୨୪ ପ୍ରଥମାର୍ଦ୍ଧରେ ଏହାର ପ୍ରଥମ ପରୀକ୍ଷଣ କରାଯିବ। ଏହାର ଡିଜାଇନ୍ ଆଟ୍ଲାଣ୍ଟିକ ମହାସାଗରରେ ବୁଡ଼ିଥିବା ପାଣି ଜାହାଜ ‘ଟାଇଟନିକ’ ସହ ସାମଞ୍ଜସ୍ୟ ରହିଛି।
ଜାତୀୟ ମହାସାଗର ଉଦ୍ୟୋଗିକ ସଂସ୍ଥାନ(ଏନ୍ଆଇଓଏସ୍)ର ବୈଜ୍ଞାନିକମାନେ ମତ୍ସ୍ୟ ୬୦୦୦କୁ ବିକଶିତ କରିଛନ୍ତି। ଏଥିସହ ଏହାର ଡିଜାଇନ୍, ଉପକରଣ, ପରୀକ୍ଷଣ ଓ ପରିଚାଳନା ପ୍ରକ୍ରିୟା ବିଷୟରେ ମଧ୍ୟ ବୈଜ୍ଞାନିକମାନେ ସମୀକ୍ଷା କରିଛନ୍ତି। ସମୁଦ୍ରାୟନ ମିଶନ, ଗଭୀର ମହାସାଗର ମିଶନର ଏକ ଅଂଶ। ୨୦୨୪ ପ୍ରଥମାର୍ଦ୍ଧରେ ଆମେ ଏହାକୁ ସମୁଦ୍ରର ୫୦୦ ମିଟର ଗଭୀରକୁ ଛାଡ଼ିବା ସହ ପ୍ରଥମ ପରୀକ୍ଷଣ କରିବୁ ବୋଲି ଭୂବିଜ୍ଞାନ ମନ୍ତ୍ରଣାଳୟର ସଚିବ ଏମ୍. ରବିଚନ୍ଦ୍ରନ୍ କହିଛନ୍ତି। ୨୦୨୬ ସୁଦ୍ଧା ଏହି ମିଶନ ଶେଷ ହେବ ବୋଲି ଆଶା କରାଯାଉଛି। ଆମେରିକା, ରୁଷିଆ, ଜାପାନ, ଫ୍ରାନ୍ସ ଏବଂ ଚାଇନା ପୂର୍ବରୁ ମତ୍ସ୍ୟ ୬୦୦୦ ଭଳି ଜାହାଜ ବିକଶିତ କରିଥିବାବେଳେ ଏବେ ଭାରତ ଏହି ତାଲିକାରେ ସ୍ଥାନ ପାଇଛି। ମତ୍ସ୍ୟ ୬୦୦୦ ନିକେଲ୍, କୋବଲ୍ଟ, ମାଙ୍ଗାନିଜ୍ ବ୍ୟତୀତ ହାଇଡ୍ରୋଥର୍ମାଇଲ ସଲ୍ଫାଇଡ ଏବଂ ଗ୍ୟାସ୍ ହାଇଡ୍ରେଟ୍ ବିଷୟରେ ମଧ୍ୟ ସନ୍ଧାନ କରିବ। ଏନ୍ଆଇଓଟି ନିର୍ଦ୍ଦେଶକ ଜି.ଏ. ରାମଦାସ୍ କହିଛନ୍ତି, ୩ ଜଣ ଲୋକଙ୍କ ଲାଗି ସେମାନେ ମତ୍ସ୍ୟ ୬୦୦୦ ମଧ୍ୟରେ ୨.୧ ମିଟର ବ୍ୟାସର ଏକ ସ୍ଥାନ ନିର୍ମାଣ କରିଛନ୍ତି। ଏହି ଜାହାଜ ଯେପରି ୧୨ରୁ ୧୬ ଘଣ୍ଟା ଅନବରତ ଚାଲିପାରିବ ତାକୁ ଦୃଷ୍ଟିରେ ରଖି ବିକଶିତ କରାଯାଇଛି। ତେବେ ଏହି ଯାନକୁ ଅମ୍ଳଜାନ ଯୋଗାଣ ଅନବରତ ଚାଲିବ। ସେହିପରି ଏହି ଯାନରେ ଆବଶ୍ୟକତା ଅନୁଯାୟୀ ସମସ୍ତ ପ୍ରକାର ବ୍ୟବସ୍ଥା କରାଯାଇଛି, ଯାହା ପରିସ୍ଥିତି ଅନୁସାରେ ବଦଳିପାରିବ ବୋଲି ନିର୍ଦ୍ଦେଶକ ରାମଦାସ କହିଛନ୍ତି।
